BiełKA: palot idzie narmalna

«NN» udałosia zdabyć stenahramu seansu suviazi pamiž robatam na borcie BiełKA i centram kiravańnia palotami, jaki raskvataravany ŭ Drazdach. Feljeton Lolika Uškina.

Vy asabista bačyli metałałom, jaki zastaŭsia ad spadarožnika BiełKA? I ja nia bačyŭ. Skažu vam pa sakrecie: usia infarmacyja pra jaho padzieńnie – heta takaja vajennaja chitraść, kab abduryć patencyjnaha praciŭnika. Nasamreč BiełKA ŭ planavym režymie are kaśmičnuju prastoru.

«NN» udałosia zdabyć stenahramu pieršaha seansu suviazi pamiž robatam na borcie BiełKA i centram kiravańnia palotami, jaki raskvataravany ŭ Drazdach.

— BiełKA, BiełKA, vyklikaje ziamla. Jak sytuacyja?

— Havoryć BiełKA. Palot idzie narmalna. Baču na kursie nieviadomuju planetu. Dazvolcie dasłać robata-raźviedčyka StrełKA?

— Dazvalaju. (paŭza.) StrełKA, jak prajšło pryziamleńnie? Pahladzicie, ci tam jość humanoidy, ź jakimi možna zaklučyć pahadnieńnie ab stvareńni mižplanetnaj sajuznaj dziaržavy i na durniak atrymlivać paleznyja vykapni? Dazvalaju navat paabiacać im adzinuju valutu.

— StrełKA na suviazi. Pryziamleńnie prajšło narmalna. Baču niekalki humanoidaŭ. Sprabuju ŭvajści ŭ kantakt. (Paśla paŭzy.) Centar, jany kažuć, što heta planeta, dzie modna być siabram BRSM. Centar, čamu maŭčycie?

— Ale, ale: (horača dychajučy) heta taja samaja meta, jakuju pastaviŭ tavaryš Pralaskoŭski: «Stvaryć modu na siabroŭstva ŭ BRSM». Daju zahad: naładzić supracoŭnictva z metaju budavańnia šmatpolusnaha kosmasu.

— Centar, pryjom. Jany kažuć, što kapajuć Aŭhustoŭski kanał pa ekvatary planety. Prapanujuć uziać lazernuju rydloŭku i dziaŭbści ź imi hrunt. Oj, a heta chto?..

Šum i tresk u etery.

— StrełKA, StrełKA, heta Centar, što zdaryłasia?

Šum i tresk u etery.

— Havoryć Centar, vyklikaju bort spadarožnika BiełKA. BiełKA, vidavočna, našamu raźviedyku – chana. Zahadvaju pasłać robata i dastavić na bort čornuju skrynku ad StrełKI, kab daviedacca pra padrabiaznaści. Pryjom.

Paŭza.

— Havoryć BiełKA, čornaja skrynka dastaŭlenaja. Uklučaju zapis.

Šum stužki.

— Vy chto takija?

— My krutyja humanoidy-beereseemaŭcy. Być beereseemaŭcam modna i kruta!

— Vy krutyja beereseemaŭcy? A my zaraz pravierym. Jak nazyvajecca prahrama arhanizacyi na 2006–2010 hady, pryniataja na apošnim plenumie?

— «Budučaje baćkaŭščyny budavać maładym».

— A kolki adsotkaŭ pradpryjemstvaŭ APK zastajucca jašče pa-za polem zroku BRSM?

— 43!

— Pacany, heta nie BRSM. Heta łachi. Sapraŭdnaja ličba – 40. Mačy ich. Voś tabie, voś. A heta chto z vami? Inšaplanetnik? A, heta kštałtu dyplamata-vyčvarenca! Bratva, trymaj jaho. A nu, dastavaj svaje parnahrafičnyja materyjały!..

Huk udaraŭ.

Kaniec zapisu.

— BiełKA, BiełKA, havoryć Centar kiravańnia palotami. Zahadvaju terminova pakinuć arbitu šyzovaj planety.

— BiełKA: jość drapać ad psychaŭ! Praciahvaju misiju. Palot idzie narmalna.

• 0
• 0
• 0
• 0
• 0
• 0
• 0
• 0