«НН» удалося здабыць стэнаграму сэансу сувязі паміж робатам на борце БелКА і цэнтрам кіраваньня палётамі, які раскватараваны ў Драздах. Фэльетон Лёліка Ушкіна.
«НН» удалося здабыць стэнаграму сэансу сувязі паміж робатам на борце БелКА і цэнтрам кіраваньня палётамі, які раскватараваны ў Драздах. Фэльетон Лёліка Ушкіна.
Вы асабіста бачылі мэталалом, які застаўся ад спадарожніка БелКА? І я ня бачыў. Скажу вам па сакрэце: уся інфармацыя пра яго падзеньне – гэта такая ваенная хітрасьць, каб абдурыць патэнцыйнага праціўніка. Насамрэч БелКА ў плянавым рэжыме арэ касьмічную прастору.
«НН» удалося здабыць стэнаграму першага сэансу сувязі паміж робатам на борце БелКА і цэнтрам кіраваньня палётамі, які раскватараваны ў Драздах.
— БелКА, БелКА, выклікае зямля. Як сытуацыя?
— Гаворыць БелКА. Палёт ідзе нармальна. Бачу на курсе невядомую плянэту. Дазвольце даслаць робата-разьведчыка СтрэлКА?
— Дазваляю. (паўза.) СтрэлКА, як прайшло прызямленьне? Паглядзіце, ці там ёсьць гуманоіды, зь якімі можна заключыць пагадненьне аб стварэньні міжплянэтнай саюзнай дзяржавы і на дурняк атрымліваць палезныя выкапні? Дазваляю нават паабяцаць ім адзіную валюту.
— СтрэлКА на сувязі. Прызямленьне прайшло нармальна. Бачу некалькі гуманоідаў. Спрабую ўвайсьці ў кантакт. (Пасьля паўзы.) Цэнтар, яны кажуць, што гэта плянэта, дзе модна быць сябрам БРСМ. Цэнтар, чаму маўчыце?
— Але, але: (горача дыхаючы) гэта тая самая мэта, якую паставіў таварыш Праляскоўскі: «Стварыць моду на сяброўства ў БРСМ». Даю загад: наладзіць супрацоўніцтва з мэтаю будаваньня шматполюснага космасу.
— Цэнтар, прыём. Яны кажуць, што капаюць Аўгустоўскі канал па экватары плянэты. Прапануюць узяць лязэрную рыдлёўку і дзяўбсьці зь імі грунт. Ой, а гэта хто?..
Шум і трэск у этэры.
— СтрэлКА, СтрэлКА, гэта Цэнтар, што здарылася?
Шум і трэск у этэры.
— Гаворыць Цэнтар, выклікаю борт спадарожніка БелКА. БелКА, відавочна, нашаму разьведыку – хана. Загадваю паслаць робата і даставіць на борт чорную скрынку ад СтрэлКІ, каб даведацца пра падрабязнасьці. Прыём.
Паўза.
— Гаворыць БелКА, чорная скрынка дастаўленая. Уключаю запіс.
Шум стужкі.
— Вы хто такія?
— Мы крутыя гуманоіды-бээрэсээмаўцы. Быць бээрэсээмаўцам модна і крута!
— Вы крутыя бээрэсээмаўцы? А мы зараз праверым. Як называецца праграма арганізацыі на 2006–2010 гады, прынятая на апошнім пленуме?
— «Будучае бацькаўшчыны будаваць маладым».
— А колькі адсоткаў прадпрыемстваў АПК застаюцца яшчэ па-за полем зроку БРСМ?
— 43!
— Пацаны, гэта не БРСМ. Гэта лахі. Сапраўдная лічба – 40. Мачы іх. Вось табе, вось. А гэта хто з вамі? Іншаплянэтнік? А, гэта кшталту дыплямата-вычварэнца! Братва, трымай яго. А ну, даставай свае парнаграфічныя матэрыялы!..
Гук удараў.
Канец запісу.
— БелКА, БелКА, гаворыць Цэнтар кіраваньня палётамі. Загадваю тэрмінова пакінуць арбіту шызовай плянэты.
— БелКА: ёсьць драпаць ад псыхаў! Працягваю місію. Палёт ідзе нармальна.
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках24
Каментары