Jakija źmieny praduhledžvajucca novymi hienpłanami haradoŭ-spadarožnikaŭ Minska?
22 maja Łukašenka svaim ukazam zaćvierdziŭ novyja hienieralnyja płany troch haradoŭ-spadarožnikaŭ Minska: Fanipala, Smalavičaŭ i Rudzienska. Jakich źmien zaraz čakać hetym haradam, napisała ahienctva «Minsk-Naviny».
Najbolš značnyja pieramieny adbuducca ŭ Smalavičach: u paraŭnańni z raniejšymi płanami ciapier prapanujecca pavialičyć nasielnictva horada amal udvaja. U toj ža čas u Fanipali hłabalnych pieramien nie pradbačycca, a ŭ Rudziensku hienpłan uvohule pierahledžany ŭ advarotny bok.
Smalavičy
Pa raniejšaj viersii hienpłana nasielnictva horada da 2030 hoda pavinna było b skłaści 30 tysiač čałaviek. Ale siońnia prapanujecca pavialičyć kolkaść da 50 tysiač čałaviek. Pra heta zajaviŭ namieśnik dyrektara «BiełNDIP horadabudaŭnictva» Juryj Vińnikaŭ.
«Płanujecca, što prykładna 70% žycharoŭ zmohuć pracavać u Smalavičach u śfiery absłuhoŭvańnia albo ŭ industryjalnym parku «Vialiki kamień», — skazaŭ jon, zaŭvažyŭšy, što tolki 30% žycharoŭ Smalavičaŭ buduć jeździć na pracu ŭ Minsk.
Rudziensk
Raniej stajała zadača pavialičyć płošču horada z 0,4 da 2,4 tysiačy ha, nasielnictva — z 11,5 da 81 tysiačy čałaviek. Pavodle novaha hienpłana nasielnictva horada-spadarožnika składzie, adnak, tolki 41 tysiaču čałaviek.
«Jość ahulnyja ličby płanavanaha nasielnictva pa ŭsich spadarožnikach stalicy — heta 120 tysiač čałaviek. Ich treba raŭnamierna raźmierkavać pa šaści haradach», — rastłumačyŭ łohiku hetaha rašeńnia Vińnikaŭ.
Raspracoŭščyki hienpłanaŭ u 2014-m prymali taksama pad uvahu abmiežavańni dla raźvićcia niekatorych haradoŭ. Naprykład, Smalavičam pad zabudovu patrebnyja byli dadatkovyja ziemli. Jak adznačyŭ Vińnikaŭ, jany vakoł horada vysakabalnyja sielskahaspadarčyja, na ich zasvajeńnie była strohaja zabarona. Tamu dla hetaha spadarožnika zakłali ličby mienšyja, čym chaciełasia b.
«A vakoł Rudzienska raźmieščanyja samyja nizkabalnyja ziemli. My raźličvali, što ich budzie praściej dałučyć da horada. Značyć, źjavicca prystojny terytaryjalny rezierv dla raźvićcia, a ź im — i dla pavieličeńnia nasielnictva», — ličyć śpiecyjalist.
Adnak akazałasia, što ŭ cełym Rudziensk — horad bolš składany dla zasvajeńnia. Jon i dalej ad Minska, i pryrodnyja ŭmovy tam śpiecyfičnyja. Tamu płan raźvićcia byŭ pierahledžany.
Fanipal
Hłabalnych pieramien u hetym horadzie-spadarožniku Minska čakać nie varta. Havorka idzie tolki pra aptymizacyju raniejšaha hienpłana.
«Kali raniej my istotna źmianiali paramietry horada, to ciapier paličyli, što takija hruntoŭnyja pieramieny nie patrabujucca. Tamu što terytoryi dla asvajeńnia i raźvićcia abmiežavanyja, — raskazaŭ Juryj Vińnikaŭ. — Haradskaja zabudova raźmieščanaja pamiž aŭtadarohaj R-1 i čyhunkaj, da jakoj z druhoha boku prymykaje pramysłovaja zona. Raźvićcio horada-spadarožnika ŭ bok Minska taksama prablematyčna ŭ suviazi z najaŭnaściu radoviščaŭ budaŭničych materyjałaŭ (piasku, hliny)».
Adnak pa novym hienpłanie Fanipal usio ž «pryraście» z 17,5 da 29 tysiač čałaviek. Płošča horada pavialičycca pieravažna na paŭdniovaj uskrainie za košt dałučeńnia sielskahaspadarčych ziamiel.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary