«Šmat mastactva. Ale ŭsio śmiardzić mačoju i dziarmom», — apisvaje błohier mnohija stancyi.
Lonia Paškoŭski, viadomy jutub-prajektam «Chaču dadomu», pravioŭ 24 hadziny ŭ mietro Ńju-Jorka, kab vyvučyć horad ź niečakanaha boku. Miascovaje mietro — heta ceły śviet, u jakim pierasiakajucca ŭsie sacyjalnyja płasty horada: bahatyja i biednyja, biazdomnyja i trejdary z Uoł-Stryt, usie nacyi i prafiesii.
Zajcy ŭ mietro i jak pierac čyli dapamoh u baraćbie ź imi
Košt bileta na adnu pajezdku ŭ ńju-jorkskim mietro składaje 2,75 dalara. Bieźlimitny prajazny na miesiac kaštuje 140 dalaraŭ. Mietro pracuje kruhłasutačna. Jak raspavioŭ Paškoŭski, na znak pratestu ludzi, jakija ličać, što pajezdka ŭ takich umovach stolki nie kaštuje, prachodziać biaspłatna. Pa jaho nazirańniach, kožny piaty pranikaje ŭ mietro biaspłatna roznymi sposabami: pieraskokvaje cieraz turnikiet, prałazić pad im, prachodzić razam z druhim pasažyram pa adnoj apłacie. Jašče adzin sposab uvajści — skarystacca dźviaryma dla vychadu ŭ čas, kali vychodziać ludzi ź ciahnika, jaki pryjechaŭ.
Zhodna z aficyjnaj statystykaj, kožny dzień ź piaci miljonaŭ pasažyraŭ 400 tysiač jeduć zajcami. Na hetym mietro hublaje bolš za miljon dalaraŭ za dzień.
Niekalki dziesiacihodździaŭ tamu dla ŭvachodu ŭ mietro vykarystoŭvalisia žetony. Błohier raspaviadaje, jak u toj čas ludzi prachodzili biaspłatna:
«Jany zapichvali ŭ adtulinu dla pryjomu žetonaŭ abhortki ad doŭhich žujek-płaścinak. Heta nie dazvalała žetonu hłyboka pravalvacca. A potym hubami hety žeton vysmoktvali nazad. Kab z hetym zmahacca, rabotniki mietro ŭ adtuliny sypali pierac čyli. Kali ludzi sprabavali vysmaktać žeton, to atrymlivali dobruju dozu piercu».
Vyhlad stancyj: pacuki, pach mačy i eklektyka
Paškoŭski adznačaje, što mietro Ńju-Jorka vielmi brudnaje. Na kožnaj stancyi znajšli prytułak bamžy. Na rejkach — hory śmiećcia, jakoje pastajanna zaharajecca. Praz heta začyniajucca stancyi, zatrymlivajucca ciahniki. «Ciahniki ŭvohule nie chodziać zhodna z raskładam, i ty pastajanna zatrymlivaješsia dzieści ŭ tuneli, možaš prastajać i hadzinu. Heta adbyvajecca kožny dzień. U hetym mietro ničoha nie pracuje narmalna», — dzielicca nazirańniami błohier.
Šmat stancyj mietro Ńju-Jorka pabudavana bolš za sto hadoŭ tamu (mietro ŭ horadzie pačało pracavać u 1868 hodzie). Sami stancyi vyhladajuć vielmi zaniadbanymi. Šmat dziesiacihodździaŭ ich nichto nie ramantavaŭ.
«Atrymlivajecca takaja eklektyka. U azdableńni stancyj zastałosia šmat starych detalaŭ, jakija śviedčać pra toje, što niekali hetaje miesca vyhladała pryhoža i doraha. Šmat mastactva. U toj ža čas heta ŭsio vielmi staroje i ahidna brudnaje. Biehajuć pacuki. Usio śmiardzić mačoju i dziarmom», — kaža błohier.
Ale ŭ mietro jość i sučasnyja čystyja i akuratnyja stancyi, jakija, pavodle słoŭ błohiera, nahadvajuć stancyi Minskaha mietrapalitena. Na niekatorych stancyjach jość ustanovy, dzie možna pajeści, nie vychodziačy ź mietro. Na takich stancyjach možna znajści i biaspłatnuju prybiralniu.
U vypusku Paškoŭski taksama hutaryć ź miascovymi i kaštuje fast-fud, jaki pradajuć u padziemcy.
Čytajcie jašče:
15-siekundnaje videa ź minskaha mietro šakavała amierykancaŭ. Tvit ź im sabraŭ 5 miljonaŭ prahladaŭ
Minski mietrapaliten pakaža načnoje žyćcio padziemki
Biełaruski jutub-błohier Paškoŭski vydaŭ repartaž pra Ukrainu
Kamientary