Pornamahnat, jaki vałodaje OnlyFans, — biznesmien ukrainskaha pachodžańnia Leanid Radvinski. Voś što pra jaho viadoma
Za apošni hod prybytak sajta OnlyFans uźlacieŭ da niabiosaŭ. Viestka ab tym, što jaho ŭładalnik atrymaŭ u vyhladzie dyvidendaŭ bolš za 300 młn dalaraŭ, čarhovy raz spravakavała ŭsplosk cikavaści da jaho asoby, piša BBC.
Zvać hetaha čałavieka Leanid Radvinski, jon 41-hadovy amierykanski pradprymalnik i vychadziec z Ukrainy. Jaho bahaćcie siońnia aceńvajecca ŭ 2,1 młrd dalaraŭ ZŠA.
Radvinski kupiŭ OnlyFans u 2018 hodzie ŭ zasnavalnikaŭ płatformy — brytancaŭ, baćki i syna Haja i Cima Stokli. Hetaja para pačała biznes usiaho dvuma hadami raniej, inviestavaŭšy ŭ novaje pradpryjemstva 12500 dalaraŭ ZŠA.
Dakładny košt prodažu sajta nieviadomy, ale ličycca, što Radvinski zapłaciŭ za jaho miljony funtaŭ. Adkul ža jon ich uziaŭ?
Što my ŭvohule pra jaho viedajem?
Kali kazać prama, to vielmi mała. Niahledziačy na nievierahodnuju ščyraść, što panuje na OnlyFans, sam Radvinski trymaje svajo asabistaje žyćcio dalej ad hramadskaści. Dy i intervju jon daje vielmi redka.
Niejkija ŭryŭkavyja źviestki ab im možna zapazyčyć u profili pradprymalnika na LinkedIn i na jaho asabistym sajcie.
Kali vieryć infarmacyi na LinkedIn, to spadar Radvinski źjaŭlajecca vienčurnym inviestaram, fiłantropam i technałahičnym pradprymalnikam, jaki «adčuvaje asablivuju cikavaść da novych płatformaŭ sacyjalnych sietak».
Na svaim veb-sajcie jon taksama paviedamlaje, što apošnija dva dziesiacihodździ svajho žyćcia pryśviaciŭ «stvareńniu kampanij-raspracoŭščykaŭ prahramnaha zabieśpiačeńnia i ŭdzielničaŭ u ruchu za adkryty zychodny kod».
Radvinski naradziŭsia ŭ Adesie, i jaho kampanija achviaravała srodki ŭ kryptavalucie na akazańnie dapamohi Ukrainie, pryčym realny abjom achviaravańniaŭ u 2022 hodzie, pa danych CoinDesk, skłaŭ bolš za 1,3 młn dalaraŭ.
Jon taksama kaža, što achviaruje «vialikuju kolkaść času, namahańniaŭ i srodkaŭ na niekamiercyjnyja mety», na dabračynnaść i technałahičnyja raspracoŭki.
Aproč zaniatkaŭ prahramavańniem i fiłantropijaj, jon taksama «zaŭziaty čytač, zaŭsiody hatovy pazmahacca z kim-niebudź u šachmaty i žadaje vyvučycca na piłota viertalota». Pra heta havorycca na jahonym sajcie.
Dzie jon žyvie?
Baćki Leanida Radvinskaha emihravali ŭ Złučanyja Štaty, kali jon byŭ jašče dziciem, i, jak paviedamlaje brytanskaja hazieta Daily Telegraph, pasialilisia ŭ Čykaha. Ciapier jon žyvie ŭ «soniečnaj Fłarydzie», ale dzie mienavita — nieviadoma.
Forbes kaža, što adnosna małady miljarder žanaty, ale Bi-bi-si nie ŭdałosia dakładna ŭstanavić asobu jaho žonki.
Historyja biznesu
OnlyFans — nie pieršy biznes Radvinskaha, źviazany z pornaindustryjaj.
Jon vyvučaŭ ekanomiku ŭ Paŭnočna-Zachodnim univiersitecie niepadalok ad Čykaha, jaki skončyŭ u 2002 hodzie. Z taho času pradprymalnik zajmaŭsia niekalkimi prajektami.
Pierš čym stać adzinym akcyjanieram matčynaj kampanii OnlyFans, Fenix, jon zasnavaŭ biznes pa pieraadrasacyi sajtaŭ pad nazvaj Cybertania.
Pa danych Forbes, z kanca 1990-ch hadoŭ hetaja kampanija prapanoŭvała karystalnikam spasyłki na paroli da roznaha kantentu, u tym liku i da parnahrafii.
Pierš čym kupić OnlyFans, jon taksama vałodaŭ paśpiachovym vebkam-biznesam, jaki taksama aryjentavany na darosłuju aŭdytoryju.
Bi-bi-si paprasiła Radvinskaha ab intervju, ale jon na hetuju prośbu nie adkazaŭ.
«Za kožnaha padpisčyka — 50 rubloŭ». U Minsku nabirajuć pracaŭnikoŭ na «OnliFansServis». Što?
Ustupili ŭ siłu novyja jeŭrapiejskija praviły dla technałahičnych hihantaŭ. Voś jak jany pracujuć
Heineken pradaŭ rasijski biznes vytvorcu «Dychłafosa» za 1 jeŭra
«Amkador» damoviŭsia pra supracoŭnictva z «DNR»
Kamientary