Pravaabaroncy z «Viasny» 29 žniŭnia abjavili ab pryznańni palityčnymi źniavolenymi jašče siamnaccaci čałaviek. Ahulnaja kolkaść palitviaźniaŭ u Biełarusi ciapier składaje 1496 čałaviek.
Imiony novych palitviaźniaŭ — Barys Vitko, Michaił Litvak, Siarhiej Adaśka, Aleh Prakapčuk, Valeryj Chamienka, Alaksiej Charsiejeŭ, Julija Kołas, Jahor Žukaŭ, Alaksandr Pabiaržyn, Jaŭhien Choładaŭ, Andrej Chałupka, Siarhiej Korsak, Alaksandr Bireta, Alaksandr Kulikoŭ, Siarhiej Safronaŭ, Valeryj Krancevič, Alaksiej Afanaśjeŭ.
Chto hetyja ludzi i čamu pravaabaroncy ličać ich spravy palityčna matyvavanymi, možna daviedacca pa spasyłcy.
Pavodle pravaabaroncaŭ, ciapier u Biełarusi 1496 palitviaźniaŭ. Apošnim časam ahulny rost ich kolkaści nie vielmi vialiki, i navat adznačajecca peŭnaje źnižeńnie (raniej užo niekalki razoŭ kolkaść pryznanych palitviaźniami pierasiahała 1500 čałaviek). Ale heta nie tamu, što represii ŭ Biełarusi mienšajuć, — prosta paralelna z novymi vypadkami źniavoleńnia pa kryminalnych spravach idzie praces vyzvaleńnia tych asudžanych, chto całkam adbyŭ svoj termin. Taksama sudy niekatorym prysudžajuć «chatniuju chimiju», paśla čaho čałaviek vychodzić z-za turemnych ścien, tamu bolš nie ličycca viaźniem.
Varta taksama ŭličvać, što ŭ statystyku ŭvachodziać daloka nie ŭsie, chto znachodzicca ŭ źniavoleńni z palityčnych pryčyn, realnaja kolkaść biełaruskich palitviaźniaŭ našmat bolšaja. Pra vielmi mnohich pravaabaroncam prosta ničoha nie viadoma.
Śpis usich ludziej, aficyjna pryznanych palitviaźniami ŭ Biełarusi, hladzicie tut.
Kamientary