«Masava da nas źviartajucca ludzi». U Hrodnie bjuć tryvohu ŭ suviazi z napłyvam reptylij
Niekalki hadoŭ tamu maleńkich čyrvanavuchich čarapašak pradavali pa ŭsioj krainie, ale ciapier ich prodaž u Biełarusi zabaranili. I Hrodzienski zaapark źviartajecca da ludziej z prośbaj nie zavodzić hetych paŭzunoŭ. Bo nadta časta jany ŭ vyniku robiacca biazdomnymi, paviedamlaje telekanał «Hrodna +»
Usio tamu, što mnohija patencyjnyja haspadary nie cikaviacca infarmacyjaj pra hadavancaŭ pierad tym, jak ich nabyvać, i ŭ vyniku, sami taho nie viedajučy, kuplajuć drapiežnika, jaki imkliva źmianiajecca ŭ pamierach.
Čyrvanavuchija čarapachi dla Hrodzienskaha zaaparka robiacca sapraŭdnym bolem. Siońnia reptylij u im užo bolš za 25, i achvotnych pazbavicca ad hadavancaŭ robicca ŭsio bolš.
Časam čarapach vypuskajuć u pryrodu, ale čaściej — prynosiać va ŭstanovu dla ŭtrymańnia žyvioł. Dachodzić da taho, što ich prosta padkidajuć da bramy zaaparka. U vyniku ekzatyčnyja paŭzuny traplajuć pad koły mašyn, a ŭ najlepšym vypadku — na apieracyjny stoł da vieterynara.
Ź minułaha hoda ŭ Biełarusi prodaž i ŭtrymańnie čyrvanavuchich čarapach zabaronieny zakonam. Hetyja hadavancy dapoŭnili čorny śpis praz patencyjnuju niebiaśpieku dla ŭładalnika i składanaści ŭ zabieśpiačeńni ŭmoŭ utrymańnia.
«Masava da nas źviartajucca ludzi, bo žyvioły pierastajuć jeści, u ich pačynajucca atyty.
I kali pačynaješ im raspaviadać, što hetyja čarapachi rastuć davoli vialikimi, što jany źjaŭlajucca drapiežnikami, što korm, jaki im prapanavali — heta naohuł nie asnova racyjonu, i što patrebny vialiki akvaryum, i filtry, i hrełki śpiecyjalnyja, i abstalavać treba tak, kab da pravadoŭ nie było dostupu, viadoma, heta ŭ ludziej vyklikaje vialiki šok»,— raspaviała Alena Kamarec, vieterynarnaja doktarka Hrodzienskaha zaaparka.
Akramia taho, lačeńnie ekzatyčnych čarapach — praciahły praces. Vieterynary praz raz sutykajucca z tym, što hadami jany ŭtrymlivajucca ŭ niapravilnych umovach. Heta pryvodzić da taho, što simptomy vyjaŭlajucca pozna i dapamahčy žyviołam užo nielha.
Aproč usiaho inšaha, vialikaj prablemaj čyrvanavuchija čarapachi nieŭzabavie mohuć stać i dla ŭsioj biełaruskaj pryrody. Bo jany — kankurenty dla biełaruskaj bałotnaj čarapachi.
«Čyrvanavuchaja čarapacha — invaziŭny vid, to-bok čužarodny, jaje naturalnaja terytoryja dla žyćcia ŭ pryrodzie — poŭdzień ZŠA i Mieksika. A pakolki ŭ nas zimy ŭžo stali davoli ciopłymi, čyrvanavuchaja čarapacha ŭžo sustrakajecca i ŭ našych biełaruskich vadajomach, i naohuł u mnohich krainach Jeŭropy i Azii, navat u Aŭstraliju zaviezienaja, — raskazała Taćciana Saŭčuk, lektar Hrodzienskaha zaaparka. —
A pakolki heta invaziŭny vid, to jana moža parušyć pryrodnuju ekasistemu, a pa-druhoje, moža być pahrozaj dla isnych vidaŭ. Kali čyrvanavuchaja budzie tak raspaŭsiudžvacca ŭ vadajomach Biełarusi, jość pahroza što jana moža paśla vycieśnić našu bałotnuju čarapachu».
Čytajcie taksama:
Jak siońnia škodziać biełaruskaj pryrodzie staradaŭnija štučnyja kanały?
Na Śvisłačy ŭ Minsku znajšli niezvyčajnuju čarapachu. Ale ciešycca z hetaha nie vypadaje
U Hrodnie ŭ race vyłavili redkuju čyrvanavuchuju čarapachu. Jana žyvie tolki ŭ ZŠA i Mieksicy
Pozna ŭviečary Łukašenka parazmaŭlaŭ jašče i z Džonam Koŭłam. Imavierna, havorka išła pra ŭmovy i terminy vyzvaleńnia palitviaźniaŭ2
Kamientary