Hod tamu ŭ Biełarusi zabaranili rost cen. Jak ceny z taho času źmianilisia?
Hod tamu ŭrad pryniaŭ pastanovu ab rehulavańni cen. Jana vyznačała maksimalnyja handlovyja nadbaŭki na tavary, pavyšać jakija možna było tolki z dazvołu čynoŭnikaŭ. Pastanova narabiła šmat šumu i navat pryviała da zatrymańniaŭ supracoŭnikaŭ handlu, jakija zavyšali ci zanižali ceny. A što za hety čas stała z cenami?
Analizavać budziem zhodna z aficyjnymi ličbami Biełstata. Dla adliku hladzim na listapad 2022 hoda, jaki staŭ pieršym poŭnym miesiacam, kali ceny rehulavalisia štučnym čynam. Paraŭnoŭvać budziem ź vieraśniem 2023 hoda, bo heta samyja śviežyja danyja ad Biełstata na hety momant.
Što stała tańniej?
Zhodna z aficyjnaj statystykaj, ceny ŭpali na takija tavary, jak rys, mannyja i hreckija krupy.
Tak, kiłahram rysu ŭ listapadzie 2022 hoda kaštavaŭ u siarednim pa krainie 4,39 rubla. Ciapier — 3,89 rubla.
Mannyja krupy stracili ŭ canie 22 kapiejki. U vieraśni kiłahram hetaj krupy kaštavaŭ 1,97 rubla, a ŭ listapadzie minułaha hoda — 2,19.
Kudy bolš zaŭvažnaje padzieńnie cany ŭ hreckich krupaŭ. U listapadzie 2022 hoda kiłahram hrečki kaštavaŭ 4,99 rubla, a ŭ sioletnim vieraśni cana źniziłasia da 3,14 rubla.
Taksama davoli mocna źnizilisia ceny na mołatuju kavu i čornuju harbatu.
Kiłahram mołataj kavy, pa źviestkach Biełstata, u listapadzie 2022-ha hoda kaštavaŭ 45,03 rubla, a ciapier — 41,12 rubla.
Harbata zhubiła ŭ canie bolš za 15 rubloŭ u pieraliku na kiłahram — z 56,37 rubla da 41,12.
Zhuščonka — etałon stabilnaści
Ceny na zhuščonku za 10 miesiacaŭ amal nie źmianilisia — 3,85 rubla suprać 3,86.
Kiłahram cukru prybaviŭ u siarednim 6 kapiejek. Było 2,55, stała 2,61 rubla.
Pšaničnaja muka za hety ž pieryjad padaražeła na 4 kapiejki z 1,49 rubla da 1,53.
Prykmietna padaražeŭ baton. Dziesiać miesiacaŭ tamu vychodziła 2,85 rubla za kiłahram, ciapier — 3,52 rubla.
Žytni chleb taksama padaražeŭ, ale nieistotna — 2,58 i 2,63 rubla adpaviedna.
Kiłahram jałavičyny biez kostki ŭ listapadzie 2022 hoda ŭ siarednim kaštavaŭ 19,03 rubla, a ciapier — 20,51 rubla.
Kiłahram tuški kuraniaci-brojlera taksama prybaviŭ u canie za hetyja 10 miesiacaŭ: 6,08 rubla ŭ vieraśni suprać 5,80 rubla ŭ letašnim listapadzie.
Padaražeła i harełka. U vieraśni hetaha hoda litr kaštavaŭ 22,86 rubla, a ŭ listapadzie 2022-ha — 19,46.
Treba adznačyć, što inflacyja za hety čas zapavoliłasia. Za 9 miesiacaŭ biahučaha hoda jana skłała 3,6%.
Ekanamist BEROC Nastaśsia Łuzhina ŭ kamientary Deutsche Welle kaža, što strohaje rehulavańnie cen sapraŭdy paŭpłyvała na zapavoleńnie inflacyi. Adnak heta ŭ peŭnaj miery adbyłosia b i biez pastanovy biełaruskaha ŭrada, bo ceny na enierhanośbity na suśvietnym rynku istotna źnizilisia, što ŭ 2022-m było asnoŭnym drajvieram inflacyi pa ŭsim śviecie. A da sankcyj vytvorcy i pastaŭščyki paśpieli prystasavacca. Na biełaruski rynak paśla pieraaryjentacyi impartu stali pastupać novyja, bolš tannyja tavary z krain Azii i Afryki, jakija vycieśnili bolš darahija. Praz heta nie zdaryłasia deficytu tavaraŭ.
Čytajcie taksama:
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie55
Kamientary