Mikałaj Aŭtuchovič moža pačać čarhovuju haładoŭku — z pryčyny adsutnaści bolšaści zuboŭ. Svajaki naviedali ŭ turmie Ŭładzimiera Asipienku. Arcioma Dubskaha uznaharodzili premija «Chartyi −97» za mužnaść u zmahańni za pravy čałavieka.
Hałoŭnaj navinoj hetaha tydnia ŭ spravie Mikałaja Aŭtuchoviča i Ŭładzimiera Asipienki z Vaŭkavysku stała toje, što jany zaviaršyli aznajamleńnie z kryminalnaj spravaj, pavodle jakoj ich abvinavacili ŭ padrychtoŭcy da teraryzmu. Advakaty Pavał Sapiełka i Tamara Sidarenka ličać vinu svaich padabaronnych niedakazanaj i tamu planujuć źviarnucca z chadajnictvami da śledčych, kab tyja spynili spravu.
Jak pačuvajecca Mikałaj Aŭtuchovič, jaki ŭletku trymaŭ trochmiesiačnuju haładoŭku? Advakat Pavał Sapiełka kaža, što jahony padabaronny Aŭtuchovič maje terminovuju patrebu ŭ pasłuhach stamatolaha-pratezista, ale administracyja mienskaha śledčaha izalatara na heta nie źviartaje ŭvahi:
«Aŭtuchovič častku zuboŭ, jakija pavodle pryrody musiać być ŭ rocie, nosić u kišeni. A ŭ medyčnaj dapamozie jamu admaŭlajuć, spasyłajucca na toje, što heta nibyta nia taja patreba, kab vyvozić jaho z turmy ŭ cyvilny špital. U vyniku kali raniej Aŭtuchovič trymaŭ haładoŭku pavodle niejkich pracesualnych mierkavańniaŭ, to chutka jon moža znoŭ pačać haładavać prosta tamu, što nia zmoža jeści».
Uładzimiera Asipienku 23 śniežnia ŭ śledčym izalatary naviedali svajaki. Dačka Asipienki Ludmiła pieradała viaźniu dyplom ab uznaharodžańni jaho premijaj hramadzkaj inicyjatyvy «Chartyja-97» za mužnaść u zmahańni za pravy čałavieka. Pavodle Ludmiły Asipienki, jaje tata byŭ vielmi ŭściešany ŭvahaj hramadztva:
«Vykazaŭ vialikuju padziaku ŭsim, i vam, žurnalistam, za toje, što jaho padtrymlivajecie. Jamu vielmi pryjemna atrymlivać listy, adčuvać padtrymku. Heta daje jamu siły ciarpieć usio heta i čakać lepšaha».
«Tata kazaŭ, što kryminalnaja sprava suprać jaho składajecca tolki ź mierkavańniaŭ śviedak, a sapraŭdnych dokazaŭ u joj niama», — raspaviała Ludmiła Asipienka.
Premiju «Chartyi-97» za mužnaść ŭ zmahańni za pravy čałavieka atrymaŭ i viazień mahiloŭskaj kalonii Arciom Dubski. Premiju ŭručyli 23 śniežnia jahonaj maci, Alenie Dubskaj.
Viaźnia Babrujskaj kalonii pradprymalnika Andreja Bandarenku musili vyzvalić z karceru i nakiravać ŭ mienski śledčy izalatar da novaha sudovaha pasiedžańnia pavodle jahonaj spravy, adnak hetaha nie adbyłosia. Siastra Bandarenki Iryna paviedamiła 25 śniežnia:
«Advakat ź minułaha tydnia adpraŭlaje ŭ kaloniju zapyty, ale adtul ničoha nie paviedamlajuć. I jon nia zvonić. Tamu my ničoha nia viedajem».
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami33
Kamientary