57-hadovaha čyhunačnika z Bresta asudzili za «łajki» ŭ «Adnakłaśnikach» pad videa Ramančuka
U sudzie Maskoŭskaha rajona Bresta sudzili Hienadzia Vasiluka pavodle č. 1 art. 367 (paklop na Łukašenku) Kryminalnaha kodeksa. Spravu razhladała sudździa Ina Kłyšpač, prakuroram byŭ Jahor Kronda.
Spačatku 15 vieraśnia Hienadziu Vasiluku pryznačyli štraf za «raspaŭsiud ekstremisckich materyjałaŭ». U Hienadzia na staroncy ŭ «Adnakłaśnikach» znajšli padpiski na «ekstremisckija» materyjały. Akramia hetaha, Vasiluka zvolnili z łakamatyŭnaha depo «pa pahadnieńni bakoŭ», piša «Viasna».
7 śniežnia 2023 hoda Hienadzia zatrymali ŭ miežach kryminalnaj spravy za «paklop na Łukašenku» (č. 1 art. 367 KK) i źmiaścili pad vartu ŭ SIZA. Spravu razhladali 22 i 26 lutaha 2024 hoda.
Mužčynu abvinavacili ŭ tym, što jon 8, 9 i 17 červienia 2022 hoda pastaviŭ reakcyju «kłas» u sacsietcy «Adnakłaśniki» pad tryma videarolikami z udziełam ekanamista Jarasłava Ramančuka.
Hienadź pryznaŭ vinu i paviedamiŭ, što ŭ nazvanyja dni červienia jon jeździŭ u viosku ŭ Žabinkaŭskim rajonie, što paćviardžaje vypiska ad mabilnaha apieratara. Mužčyna karystajecca knopkavym telefonam, tamu ŭ vioscy jon nie moh zachodzić u «Adnakłaśniki».
Prakuror Jahor Kronda paličyŭ vinu Hienadzia całkam dakazanaj i zaprasiŭ dla jaho adzin hod i šeść miesiacaŭ kałonii. Prysud ahučvali na pasiadžeńni 26 lutaha, ale jaho vynik pravaabaroncam nieviadomy.
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary