Syrski abmalavaŭ situacyju na froncie, na niekatorych kirunkach rasiejcy majuć pośpiechi
Hałoŭnakamandujučy Uzbrojenych Sił Ukrainy Alaksandr Syrski paviedamlaje, što situacyja na froncie abvastryłasia.
«Sprabujučy zachapić stratehičnuju inicyjatyvu i prarvać liniju frontu praciŭnik zasiarodziŭ asnoŭnyja namahańni na niekalkich kirunkach, stvaryŭšy značnuju pieravahu ŭ siłach i srodkach. Aktyŭna atakuje pa ŭsioj linii frontu, na niekatorych kirunkach — maje taktyčnyja pośpiechi. Adbyvajecca dynamičnaja źmiena stanovišča, asobnyja pazicyi pierachodziać «z ruk u ruki» niekalki razoŭ na praciahu sutak, što sparadžaje nieadnaznačnaje razumieńnie situacyi», — piša hałoŭnakamandujučy ŭ telehram-kanale.
Na Łuhanskim kirunku, piša Syrski, rasijskaje vojska hałoŭnaj zadačaj stavić vyjści na administracyjnuju miažu Łuhanskaj vobłaści.
Na Kupianskim kirunku rasiejcy siarodzili siły ŭ rajonie viosak Stelmachoŭka i Bierastava. «Tam vorah mieŭ častkovy pośpiech, ale dziejańniami našych padraździaleńniaŭ byŭ spynieny», — adznačaje Syrski. Taksama rasiejcy praciahvajuć nastup na siało Ciarni na Limanskim kirunku, sprabujuć vycieśnić ukrainskija vojski za raku Čorny Žarabiec.
«Najbolš składanaja situacyja na Pakroŭskim i Kurachaŭskim kirunkach, dzie praciahvajucca žorstkija bai. Praciŭnik na hetych kirunkach zadziejničaŭ da čatyroch bryhad, sprabuje raźvić nastup na zachad ad Aŭdziejeŭki i Marjinki, prabivajučysia da Pakroŭska i Kurachava. Padraździaleńni sił abarony Ukrainy, zachoŭvajučy žyćcio i zdaroŭje našych abaroncaŭ, pieramiaścilisia na novyja rubiažy na zachad ad Biardzičava, Siamionaŭki i Novamichajłaŭki.
U cełym, na hetych kirunkach praciŭnik dasiahnuŭ peŭnych taktyčnych pośpiechaŭ, ale apieratyŭnaj pieravahi atrymać nie zmoh».
Napružanaj zastajecca abstanoŭka na poŭdni, u Zaparožskaj i Chiersonskaj abłaściach. Na Novapaŭłaŭskim kirunku, adznačaje Syrski, rasiskaja armija sprabuje nastupać u rajonie Staramajorskaha, na Arechaŭskim — u rajonach Rabocina i Viarbovaha, na Chiersonskim — sprabuje vybić ukrainskija vojski z Krynak.
«Pośpiechu nie maje ni na adnym z kirunkaŭ. Bolš za toje, na Chiersonskim kirunku našym padraździaleńniam udałosia prasunucca ŭ rajonie Vielikanskaha i ŭstalavać kantrol nad vostravam Niestryha», — dadaje Syrski.
Kamientary