Łukašenka padpisaŭ zakon ab amnistyi, jakaja anansavałasia z pačatku hoda
Alaksandr Łukašenka padpisaŭ zakon «Ab amnistyi ŭ suviazi z 80-hodździem vyzvaleńnia Biełarusi ad niamiecka-fašysckich zachopnikaŭ». Dakumient apublikavany 3 lipienia na Nacyjanalnym pravavym internet-partale, paviedamlaje BiełTA.
Zakon vyznačaje pieralik katehoryj asudžanych, jakija padlahajuć vyzvaleńniu ad pakarańnia i inšych mier kryminalnaj adkaznaści.
Da takich katehoryj adniesienyja, u pryvatnaści:
- niepaŭnaletnija;
- ciažarnyja žančyny;
- žančyny i adzinokija mužčyny, jakija majuć dziaciej va ŭzroście da 18 hadoŭ, za vyklučeńniem tych, chto ździejśniŭ naŭmysnaje złačynstva ŭ dačynieńni da niepaŭnaletniaha;
- asoby, jakija dasiahnuli piensijnaha ŭzrostu;
- invalidy I i II hrupy;
- asoby, chvoryja na aktyŭnuju formu tubierkulozu i ankałahičnyja zachvorvańni;
- hramadzianie, jakija paciarpieli ad katastrofy na Čarnobylskaj AES;
- asoby, jakija atrymali ranieńni abo zachvorvańnia pry vykanańni abaviazkaŭ u pieryjad vajskovaj słužby.
Adnačasova zakonam vyznačajucca katehoryi asob, u dačynieńni da jakich amnistyja nie budzie prymianiacca. Heta, naprykład, asoby:
- da jakich na praciahu 2021-2024 hadoŭ užyvalisia amnistyja abo pamiłavańnie i jakija znoŭ ździejśnili naŭmysnaje złačynstva ŭ pieryjad niaźniataj abo niepahašanaj sudzimaści;
- jakija na dzień pastanovy prysudu abo ŭstupleńnia jaho ŭ zakonnuju siłu całkam nie pakryli pryčynienuju złačynstvami škodu, nie zapłacili dachod, atrymany złačynnym šlacham, a taksama dachod, atrymany ad vykarystańnia majomaści, zdabytaj złačynnym šlacham abo nabytaj na srodki, zdabytyja złačynnym šlacham;
- jakija dapuścili asabliva niebiaśpiečny recydyŭ złačynstvaŭ albo pryznanyja va ŭstanoŭlenym paradku asabliva niebiaśpiečnymi recydyvistami;
- jakim pakarańnie ŭ vyhladzie śmiarotnaha pakarańnia ŭ paradku pamiłavańnia zamieniena pakarańniem u vyhladzie pazbaŭleńnia voli abo pažyćciovaha pazbaŭleńnia voli i inšyja.
Raniej i sam Łukašenka, i inšyja jahonyja čynoŭniki nieadnarazova padkreślivali, što ŭ dačynieńni da palitviaźniaŭ hetaja amnistyja prymianiacca nie budzie.
U toj ža čas 2 lipienia padčas vystupleńnia na ŭračystym pasiadžeńni z nahody aficyjnaha Dnia niezaležnaści Łukašenka skazaŭ pra namier vyzvalić niekatorych palitźniavolenych, jakija majuć ciažkija zachvorvańni, pieradusim ankałahičnyja. Nijakich padrabiaznaściaŭ, adnak, praź jaki miechanizm heta źbirajucca zrabić, pakul niama.
Top-7 novaŭviadzieńniaŭ amnistyi-2024 — palohka žančynam, asudžanym za narkotyki ci zabojstva, u jakich jość dzieci
Kubrakoŭ nie vyklučyŭ, što amnistyju prymieniać i da palitźniavolenych. Ale ŭ zabojcaŭ šancaŭ bolš
Amnistyja-2024 nie zakranie palitviaźniaŭ i zakładčykaŭ. Što viadoma pra płany ŭładaŭ?
Łukašenka anansavaŭ amnistyju-2024 i choča pierahledzieć niekatoryja artykuły Kryminalnaha kodeksa
Kaho z palitviaźniaŭ mohuć vypuścić paśla anonsu Łukašenki?
Łukašenka anansavaŭ vyzvaleńnie ciažkachvorych palitviaźniaŭ
Kamientary