U Minsku pradajuć budynki byłoha chaba «Ok16» na Kastryčnickaj
Na aŭkcyjonnaj placoŭcy «IPM-Tarhi» źjaviŭsia łot: u Minsku pa adrasie Kastryčnickaja, 16 pradajuć staradaŭnija zavadskija karpusy. Hety akurat tyja pamiaškańni, u jakich u 2017-2021 hadach raźmiaščaŭsia znakamity chab «Ok16».
U skład łota ŭvachodziać try budynki ahulnaj płoščaj 6 158 kvadratnych mietraŭ na terytoryi ŭ 1,75 hiektara:
- vytvorčy korpus H płoščaj 4 157 kvadratnych mietraŭ;
- vytvorčy korpus D płoščaj 1 115 kvadratnych mietraŭ;
- vytvorčy korpus Ž płoščaj 886 kvadratnych mietraŭ.
Hetyja pamiaškańni byli pabudavanyja ŭ 1907 hodzie jak zavod «Enierhija» (z 1930 — Minski mašynabudaŭničy zavod imia Varašyłava, z 1961 — Minski stankabudaŭničy zavod imia Kastryčnickaj revalucyi).
Ale najbolšuju hramadskuju viadomaść jany nabyli niekalki hadoŭ tamu, kali budynki ŭ sakaviku 2017 hoda kupiŭ Biełhazprambank, jaki ciapier paznačany ŭ łocie jak pradaviec.
Nabyvalisia budynki nie dla vytvorčych, a dla kulturnych metaŭ. Užo tady Biełhazprambank na čale ź Viktaram Babarykam byŭ viadomy karparatyŭnaj kalekcyjaj z Šahałam i Sucinym, padtrymkaj mižnarodnaha teatralnaha fiestyvalu «Teart» i «Vosieńskim sałonam» z adsyłkaj da paryžskich «Viesnavych sałonaŭ».
Vysokija stoli i adsutnaść kałon dazvolili pieratvaryć prastoru ŭ teatralnuju zału i zrabić jaje prydatnaj dla pastanovak ekśpierymientalnaha teatra. Za čas isnavańnia «Ok16» siehmient alternatyŭnaha biełaruskaha teatra ŭmacavaŭsia. Tut byli pastaŭleny śpiektakli, jakija stali adnymi z najlepšych za apošnija hady, — «Vartavyja Tadž-Machała», «Kryžovy pachod dziaciej» ci «Z vučylišča».
U toj ža čas chab mieŭ šerah pamiaškańniaŭ, dzie adbyvalisia jak teatralnyja fiestyvali, tak i kancerty akademičnaj muzyki, maštabnyja vystavy, adukacyjnyja mierapryjemstvy, IT-kanfierencyi dy inšaje.
Pavodle zadumy prastora musiła stać kulturnym inkubataram i kulturnym aksielerataram. «U inkubatary maładym kamandam dajecca šaniec z nula na lhotnych umovach stvaryć, naprykład, svoj biznes. Aksieleratar — miesca, kudy prychodzić užo žyvy prajekt, kab vyraści ŭ jakaści, pamierach i efiektyŭnaści. My chočam stać svojeasablivaj piasočnicaj, kudy možna pryjści i z nula niešta stvaryć, ale asnoŭnaja naša meta — dapamahčy vyraści prajektam, jakija ŭžo isnujuć», — tłumačyŭ u 2018 hodzie kiraŭnik prajekta Hieorhij Zaborski.
Za karotki čas «Ok16» staŭ samaj prestyžnaj alternatyŭnaj kulturnaj placoŭkaj horada. Letam 2019 hoda jaje art-dyrektarkaj stała Maryja Kaleśnikava, jana ž zaśpieła kryzis praz pandemiju — tady kamanda prastory pierajšła na 90-pracentnuju dystancyjnuju pracu i ščylna zaniałasia svajoj prysutnaściu ŭ virtualnaj prastory. Jak akazałasia, viarnucca da paŭnavartasnaj pracy joj nie daviałosia. Paśla taho, jak Viktar Babaryka vyrašyŭ u 2020 hodzie bałatavacca ŭ prezidenty, a Kaleśnikava stała adnoj ź jaho najbližejšych paplečnic, chab razam ź imi trapiŭ pad represii i musiŭ spačatku faktyčna, a paśla i farmalna spynić svaju dziejnaść.
Paśla źjaŭlalisia čutki, što ŭ pamiaškańniach byłoha chaba chočuć raźmiaścić handlovyja abjekty, ale, jak vyhladaje, hetym namieram ździejśnicca nie ŭdałosia. I ciapier budynki pradajucca z małatka.
Startavaja cana łota — 10 miljonaŭ rubloŭ. Krok aŭkcyjonu składaje 5% ad biahučaj ceny. Akramia taho, pieramožca tarhoŭ apłačvaje ŭznaharodžańnie arhanizataru tarhoŭ (2% ad cany prodažu łota) i 500 rubloŭ vydatkaŭ. Heta značyć, što pakupnik pavinien budzie vykłaści za budynak 10 710 500 rubloŭ, abo prykładna 3,34 miljona dalaraŭ pa aktualnym kursie.
Tarhi pačnucca 6 žniŭnia ŭ 11:00.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary