Biełarus, jaki haładaŭ u Litvie z-za niavydačy aŭtamabila, spyniŭ akcyju i viartajecca dadomu

«Čaho ja moh dabicca, taho dabiŭsia», — skazaŭ jon, adznačyŭšy, što haładać dalej — značyć nahniatać abstanoŭku i davać abvinavačańni ŭ pravakacyi, piša abw.by.

Haładoŭka biełarusa doŭžyłasia 12 dzion. «Pa-sapraŭdnamu pačnu jeści, kali da Minska dabiarusia», — skazaŭ jon.

Z Kłajpiedy Aleksijevič pierajechaŭ u Vilniu, dzie praciahnuŭ akcyju pratestu i vychodziŭ da budynka siejma.

«Ja byŭ zaprošany ŭ budynak siejma. Tut sa mnoj sustreŭsia vielmi razumny čałaviek. My ź im doŭha hutaryli. Ja vykłaŭ sutnaść našaj prablemy i majoj asabista, što, kali biełarusy buduć tut hublać hrošy i aŭtamabili, heta sieje niedavier biełarusaŭ da Litvy. Jon usio ŭvažliva vysłuchaŭ, ja zrazumieŭ, što ŭ jaho jość mahčymaści danieści hetaje mierkavańnie da samych vysokich lidaraŭ. Taksama jon paraiŭ usio vykłaści ŭ piśmovym vyhladzie i pieradać u siejm, što ja i zrabiŭ. Jon zapeŭnivaŭ mianie, što lepšaje, što ja mahu zrabić u hetaj situacyi, — vyjści z haładoŭki, bo toje, čaho ja moh dasiahnuć, ja dasiahnuŭ. Ja trapiŭ u siejm, danios svajo mierkavańnie. Ja vahaŭsia, ale zrazumieŭ, što supracoŭnik siejma maje racyju», — skazaŭ Ryhor Aleksijevič na videa.

Jon paprasiŭ usich, chto jaho padtrymlivaŭ, bolš nie pisać nijakich listoŭ u jahonuju padtrymku.

Ryhor Aleksijevič viarnuŭsia ŭ Biełaruś. Biez aŭtamabila, jaki pa-raniejšamu zastajecca ŭ Kłajpiedzie.

U Litvie praz sankcyi zachraśli kala 4000 aŭtamabilaŭ biełarusaŭ.

Ciapier hetaja kolkaść skaračajecca, bo niekatoryja vyvoziać aŭtamabili praz Hruziju i Turcyju. Ale heta niatanna. 53-hadovy Ryhor Aleksijevič nie pahadziŭsia na taki šlach, paličyŭšy, što Litva niezakonna ŭtrymlivaje aŭtamabili i prymušaje biełarusaŭ źviartacca da darahich alternatyŭnych šlachoŭ.

Svoj hibrydny Honda CR-V 2020 hoda vypusku jon vyjhraŭ na aŭkcyjonie 23 krasavika 2024 hoda. Pakul aŭtamabil znachodziŭsia na šlachu ŭ Litvu, byli pryniaty miery pa ŭzmacnieńni sankcyj u adnosinach da hramadzian Biełarusi. Pry abmierkavańni abmiežavańniaŭ była praduhledžana ahavorka: kali mašyny byli nabyty da 1 lipienia, to ich vypuskać u abarot možna. Ale Litva hetaha nie zrabiła.

Aŭtamabil prybyŭ u Kłajpiedu 16 žniŭnia. Litoŭskaja mytnia admoviłasia vydać transpartnuju dekłaracyju dla vyvazu aŭtamabila ŭ Biełaruś. Ryhor Aleksijevič pryjechaŭ u Kłajpiedu, kab na miescy razabracca ŭ situacyi. Kali jamu ŭ čarhovy raz admovilisia addać aŭtamabil, abjaviŭ haładoŭku. Jamu navat udałosia atrymać tranzitnyja litoŭskija numary, ale nie ŭdałosia zabrać aŭtamabil z porta.

• 2
• 1
• 4
• 1
• 0
• 1
• 0
• 0