«Hladzieli z dakoram, typu «čaho prypiorlisia», a ŭ kramie suvieniraŭ spytali, navošta my raźviazali vajnu». Rasijski turyst pra Biełaruś

Pra svaju pajezdku ŭ Biełaruś raskazaŭ adzin z rasijskich aŭtaamataraŭ na śpiecyjalizavanym sajcie. Mužčyna ź siamjoj płanavaŭ prajechać pa maršrucie Viciebsk — Minsk — Brest — Biełaviežskaja pušča — Hrodna — Minsk. Ale z-za niehatyŭnaha ŭražańnia paśla naviedvańnia pieršych dvuch haradoŭ kampanija viarnułasia dadomu. Što ich tak nie zadavoliła?

Pieršaje, na što rasijski padarožnik źviartaje ŭvahu, heta stan daroh: «Usie pišuć, što darohi ŭ Biełarusi prosta idealnyja. Heta niapraŭda. U RF daroha da Maskvy značna lepšaja».

Druhi momant, jaki vyklikaŭ niezadavolenaść u aŭtaamatara, — chutkasny režym. Jon skardzicca na toje, što abmiežavańnie chutkaści možna pieravysić tolki na 10 kiłamietraŭ na hadzinu. Pry hetym na darohach šmat kamier videafiksacyi.

Nie spadabaŭsia rasijaninu i styl jazdy na vulicach stalicy: «Na mašynie niervaŭ nie chopić jeździć, bo ŭsie platucca, a adzinki haniajuć pa vydzielenaj pałasie. A voś maršrutki i tralejbusy nosiacca, byccam śpiašajucca na pažar, i ludzi ŭ sałonie lotajuć z boku ŭ bok».

U Viciebsku i Minsku rasijanina ździvili amal pustyja vulicy i adsutnaść naviedvalnikaŭ u turystyčnych miescach.

«Viciebsk nahadvaje pravincyjny horad RF z padraźbitymi darohami. Dastatkova adyści z centralnaj vulicy ŭ dvor, jak tam adrazu — śmiećcie, pachi, brud i burjan».

U Minsku rasijanin źviarnuŭ uvahu na vialikuju kolkaść zakrytych sietkavych mahazinaŭ. «Spytali, čamu zakrytyja, skazali — nie akupajucca. Akramia turystaŭ z RF i trochi z Kitaja bolš nichto da ich nie jedzie. Łahična. Servis na nuli, i vakoł markotnaja karcina».

Aŭtar taksama krytykuje darohi i vulicy stalicy Biełarusi, jakija «dalokija ad daskanałaści i patrabujuć ramontu, jak i tratuary, šmat čaho razburana».

Niezadavolenaść ruskaha turysta vyklikała i toje, što ŭ mietro abjavy prypynkaŭ robiacca na biełaruskaj i anhlijskaj movach. «Braty nazyvajecca! Davodzicca pastajanna krucić hałavoj, kab nie prajechać mima».

Paźniej, adkazvajučy na kamientary da svajho dopisu, mužčyna raskazaŭ pra adnosiny biełarusaŭ da rasijan:

«Kali daviedvalisia, što my z Rasii, to pry apłacie čeka ŭ punkcie charčavańnia prasili pakinuć na čaj. (…) Inšyja prosta hladzieli z dakoram typu «čaho prypiorlisia». Adna žančyna, pradavačka ŭ kramie suvieniraŭ, pačała vykazvacca, navošta vy raźviazali vajnu, siadzicie ŭ svajoj Rasii i niama čaho vam vajavać ź inšymi. (…) Nas vietliviej da SVA sustrakali na Ukrainie, čym sustreli ŭ RB».

Jak adznačaje aŭtar, «uražańnie ad dvuch haradoŭ raźviejała mif pra toje, što ŭ RB vaŭ!».

«My vyrašyli nie jechać dalej, a navastryli łyžy nazad u RF. (…) Druhi raz tudy nie pajedziem, za hetyja hrošy ź lepšymi vidami i ŭzroŭniem servisu možna pravieści čas u Maskvie».

• 78
• 9
• 224
• 5
• 4
• 0
• 1
• 1