Prakuratura rastłumačyła Taisie Danilevič pravy hramadzianaŭ + fota dakumienta

Ale parušeńniaŭ zakanadaŭstva z boku čynoŭnicy, jakaja patrabavała ad nastaŭnikaŭ vyjści z apazicyjnych partyj, nie znojdziena.

19 lutaha Minskaja abłasnaja prakuratura dasłała niaśvižskamu nastaŭniku Alesiu Jaźvinskamu adkaz na jahonuju skarhu na dziejańni zahadčycy ŭpraŭleńnia adukacyi Minabłyvykankamu Taisy Danilevič. Nahadajem, što 15 studzienia 2010 h. čynoŭnica vyklikała da siabie šeść nastaŭnikaŭ ź Minskaj vobłaści: nastaŭnicu historyi z Puchaviččyny Natallu Iljinič, nastaŭnica anhielskaj movy z Łahojščyny Mikołu Laščuna, nastaŭnika hieahrafii ź Niaśvižčyny Uładzimira Parejku, nastaŭnika fizkultury ź Vilejki Siarhieja Klimionka, nastaŭnicu defiektołaha ź Lubani Nadzieju Ahafonavu. Usie jany źjaŭlajucca siabrami apazicyjnych partyj. Pavodle słovaŭ nastaŭnikaŭ, čynoŭnica ŭ hrubaj formie zapatrabavała ad ich abo zvolnicca, albo syści z partyj. A. Jaźvinski i N. Iljinič źviarnulisia ŭ prakuraturu.

U adkazie z prakuratury havorycca, što z tłumačeńniaŭ samoj Danilevič, a taksama jaje namieśnikaŭ Siemienčuka O. A. i Malec Ł.E. vynikaje nastupnaje:

nastaŭnikaŭ nasamreč vyklikali ŭ abłasnoje ŭpraŭleńnie adukacyi, ale padstavaj dla razmovy pasłužyła niedastatkovaja jakaść pracy.

Ź lista vynikaje, što parušeńniaŭ zakanadaŭstva z boku čynoŭnicy nie znojdziena, a tamu niama i padstavaŭ dla prakurorskaha reahavańnia na skarhu. Pry hetym adznačajecca, što «z metaj niedapuščeńnia parušeńnia dziejnaha zakanadaŭstva i vyrašeńnia situacyi Danilevič T.I. była zaprošanaja ŭ prakuraturu Minskaj vobłaści, dzie joj rastłumačyli kanstytucyjnyja i pracoŭnyja pravy hramadzianaŭ, u tym liku i na svabodu dumki i pierakanańniaŭ, a taksama prava hramadzianaŭ Respubliki Biełaruś na svabodu abjadnańniaŭ u palityčnyja partyi.

***

A čamu nas adrazu da ministra nie vyklikali?

Voś jak adkaz z prakuratury prakamientavaŭ nastaŭnik ź Niaśviža Aleś Jaźvinski.

Naprykancy lutaha ja narešcie atrymaŭ adkaz na maju skarhu z abłasnoj prakuratury, z nahody niepravamiernych dziejańniaŭ kiraŭnicy abłasnoha adździeła adukacyi spadaryni T.I.Danilevič.

Prakurorski adkaz mianie, miakka kažučy, vielmi ździviŭ, pakolki pry razhladzie skarhi, jak heta vykładajecca na papiery, da ŭvahi byli ŭziatyja tolki tłumačeńni Danilevič i dvuch jaje namieśnikaŭ, jakija prysutničali ŭ kabiniecie pad čas našaha vizitu ŭ abłana. Zrazumieła, što mohuć «śviedčyć» niepasrednyja padnačalenyja na svaju načalnicu z reputacyjaj «krutoha» kiraŭnika, ale nie heta hałoŭnaje. Paśla pračytańnia adkazu abłasnoha orhana pa nahladu za zakonnaściu ŭźnikaje pytańnie — ci cikaviać prakurorskich rabotnikaŭ fakty, śviedčańni śviedak i ci kirujecca prakuratura zvyčajnaj čałaviečaj łohikaj i zdarovym sensam? Nijakaj krytyki i analizu nie vytrymlivaje samo tłumačeńnie sp. Danilevič, jakaja kaža, što nahodaj vykliku nastaŭnikaŭ, jakija ŭsie jak adzin źjaŭlajucca siabrami apazicyjnych partyj, z roznych rajonaŭ vobłaści, stała «niedastatkovaja jakaść pracy»?! Heta jak? U majho kalehi Uładzimira Parejki nie tolki niama zaŭvah pa pracy, ale naadvarot, jość tolki vysokija dasiahnieńni jaho vučniaŭ na alimpijadach roznaha ŭzroŭniu. Voś kab jaho vyklikali dy ŭznaharodzili, heta było b całkam łahična. A voś jak možna vyklikać na «razmovu» da abłasnoha načalnika nastaŭnika za niejkija niedachopy ŭ školnaj pracy, kali dla hetaha na miescy jość dyrektar i, jak maksimum, — rajonny adździeł? A čamu adrazu nie da ministra adukacyi, za toje, što ja, naprykład, za 30 hadoŭ pracy ŭ škole nastaŭnikam fizkultury nie padrychtavaŭ nivodnaha majstra sportu? Absurd dy i tolki.

Dalej u liście havorycca, što Danilevič usio ž taki vyklikali ŭ prakuraturu i rastłumačyli niedapuščalnaść parušeńnia Kanstytucyi i pravoŭ hramadzian… A navošta, kali jana ničoha nie parušała? Na miescy sp. Danilevič ja pakryŭdziŭsia b na prakuraturu za heta.

Mianie, razam z kaleham ź viaskovaj škoły, u supravadžeńni adkaznaha rabotnika RAA terminova vyzvalili ad urokaŭ, na słužbovym aŭtamabili dastavili ŭ kabiniet načalnika adukacyi ŭsioj vobłaści, dziela taho, kab prosta parazmaŭlać pra toje-sioje, jak palepšyć jakaść majoj asabistaj pracy. Chiba ž heta nie padobna na kazku i chto moža ŭ heta pavieryć? Ci moža načalnik adukacyi vobłaści ciapier budzie piersanalna zajmacca kožnym šarahovym nastaŭnikam z dvuch dziesiatkaŭ rajonaŭ?

Ja nikoli nie sydu sa škoły «po sobstviennomu žiełaniju», bo viedaju, što dzieci ŭ škole čakajuć mianie i moj «dabravolny» sychod budzie zdradaju pierad imi.

Vynik rasśledavańnia prakuratury, jak ja zrazumieŭ, taki — mnie namiakajuć, što ja durnavaty čałaviek, vydumlaju kazki pra svajho vysokaha načalnika, ź jakim ja raniej nikoli i nidzie nie sustrakaŭsia, bo pracujem my zusim na roznych słužbovych uzroŭniach. Vidać prakuratura ŭ niečym maje racyju, bo kali ŭ hramadstvie niešta robicca nienarmalna, voś tady čałaviečaja prystojnaść robicca duraściu. Ja naŭmysna nie vykarystaŭ zapis na mabilnym telefonie, zrobleny ŭ kabiniecie Danilevič, bo liču heta nieprystojnym, pakolki zrabiŭ jaho nie adkryta i prysutnyja nie padazravali ab hetym. Zrabiŭ dla siabie, kab paśla prasłuchać i praanalizavać, ale ja nie škaduju, što vynik abłasnoj prakurorskaj pravierki atrymaŭsia takim. Kožny z udzielnikaŭ zmoh pakazać čaho jon varty, a dla mianie hałoŭnaje, heta zachavać čałaviečuju prystojnaść.

U kancy prakurorskaha adkazu zaznačajecca, što kali ja nie pahadžajusia z rašeńniem abłasnoj instancyi, dyk maju prava źviarnucca ŭ Hienieralnuju prakuraturu RB. A što, moža i maje sens pravieryć na što vartaja i Hienieralnaja prakuratura ŭ siońniašniaj Biełarusi?

Hladzi jašče:
Aleś Jaźvinski: Patomny nastaŭnik ź Niaśviža

• 0
• 0
• 0
• 0
• 0
• 0
• 0
• 0