Na lačeńnie chłopčyka z Mahilova sabrali $3 miljony. Heta samy vialiki zbor u historyi krainy

Z hetaj chvarobaj pacyjentaŭ čakaje atrafija ŭsich ciahlic i pavolnaje zhasańnie. Ale niadaŭna ŭ maleńkich pacyjentaŭ i ich baćkoŭ źjaviłasia nadzieja — preparat «Elevidys». Praŭda, ukoł pryznany samym darahim u śviecie: košt adnoj injekcyi składaje $2,9 miljona.

Dyjahnaz Arciomu pastavili ŭ lutym minułaha hoda, a zbor na ratavalny ŭkoł baćki abviaścili ŭ krasaviku. Tady Alena i Viktar pryznavalisia, što rašeńnie pačać zbor srodkaŭ dałosia im niaprosta — suma zdavałasia zanadta vialikaj.

— Ale adzin naš znajomy skazaŭ: «Ujavicie: u Biełarusi 5 miljonaŭ pracujučych ludziej. Kali kožny admovicca ŭsiaho ad adnaho kubačka kavy na vašu karyść, vy zmožacie sabrać usiu sumu». I ja pačała dumać: a raptam heta i praŭda mahčyma? — raspaviadała tady Alena.

Prablema była ŭ tym, što zbor treba było nie prosta zakryć, a zrabić heta maksimalna chutka. Ukoł treba paśpieć uvieści da taho momantu, pakul chłopčyku nie spoŭnicca 5 hadoŭ i 11 miesiacaŭ. Dzień naradžeńnia Arcioma ŭ žniŭni, ale treba było zakłaści čas na padrychtoŭku.

Naprykancy hoda žurnalisty źviazvalisia z Alenaj — tady było sabrana kala 86%. Maci chłopčyka raspaviała, što kali letam raźličvali zakryć zbor da krasavika, to zaraz krajni termin pierasunuli na luty. Inakš možna było nie paśpieć: lekary kožny miesiac znachodzili ŭ Arcioma źmieny, na žal, nie ŭ lepšy bok. Paškodžanyja ciahlicy adnaŭleńniu nie padlahajuć, možna zachavać tolki tyja, jakija jašče nie zakranuty chvarobaj.

U vyniku zbor byŭ całkam zakryty mienš čym za 9 miesiacaŭ.

Da hetaha biełarusy maksimalnuju sumu — $1,9 młn — źbirali na lačeńnie dziaciej sa SMA.

— Viedajecie, adčuvańni jak paśla ekzamiena. Spačatku navat nie razumieješ, što adbyvajecca, tolki nakočvajecca stomlenaść. I, viadoma, ślozy. Ich było šmat! Sapraŭdny patok (uśmichajecca). Heta ślozy i palohki, i radaści, i ŭdziačnaści. Nie mahu navat apisać, nakolki my ŭdziačnyja ŭsim ludziam, jakija adhuknulisia. Adrazu paśla publikacyi artykuła pra nas byŭ, badaj, samy vialiki ŭsplosk. Usim vielizarny dziakuj! — padzialiłasia z nami Alena.

Ciapier siamji treba zaniacca farmalnaściami — vyrašyć, jak pieraličyć takuju sumu ŭ kliniku ŭ Dubai, dzie Arciomu pavinny zrabić injekcyju. U siarednim uvieś praces zajmaje niekalki miesiacaŭ.

A pakul treba praciahvać padrychtoŭku: na nastupnym tydni Padjałoŭskija pajeduć u Rasiju, kab zrabić śpiecyjalny test.

— Užo ŭ Dubai kala dvuch tydniaŭ budzie prachodzić abśledavańnie. Tolki paśla taho, jak śpiecyjalisty ŭpeŭniacca, što dzicia hatovaje, jany zakažuć ukoł. Jon dastaŭlajecca śpiecyjalnym hruzam pry vielmi nizkaj tempieratury. Paśla injekcyi jašče treba prajści etap karancinu i reabilitacyi. Usiaho nam daviadziecca pravieści ŭ Arabskich Emiratach kala troch miesiacaŭ.

U vyniku lačeńnie pavinna zaviaršycca jakraz da taho momantu, kali Arciomu spoŭnicca 6 hadoŭ.

• 20
• 0
• 0
• 1
• 1
• 3
• 0
• 7