NATA aficyjna pryznała sprobu Kramla likvidavać kiraŭnika adnaho z najbujniejšych jeŭrapiejskich vytvorcaŭ zbroi
Havorka idzie pra Armina Papierhiera, hienieralnaha dyrektara samaha paśpiachovaha abaronnaha kancerna Hiermanii Rheinmetall, jaki hraje istotnuju rolu ŭ pastaŭkach zbroi Ukrainie. Pa słovach vysokapastaŭlenaha čynoŭnika NATA, Papierhier byŭ nie adziny bačny zachodni dziejač, na zabojstva jakoha Kreml adpraviŭ svaich ahientaŭ.
Vysokapastaŭleny pradstaŭnik NATA paćvierdziŭ infarmacyju, što Rasija sprabavała zabić kiraŭnika niamieckaha vytvorcy ŭzbrajeńnia Rheinmetall Armina Papierhiera, adnaho z klučavych sajuźnikaŭ Ukrainy, pieradaje vydańnie Politico.
Pa słovach namieśnika pamočnika hienieralnaha sakratara NATA pa inavacyjach, hibrydnych i kibiertechnałohijach Džejmsa Apaturaja, zmova, jakuju sarvali vyviedki ZŠA i Hiermanii, była častkaj bolš maštabnaj sieryi płanaŭ Kramla pa zabojstvie kiraŭnikoŭ abaronnaj pramysłovaści pa ŭsioj Jeŭropie.
«My nazirali vypadki sabatažu ŭ krainach NATA ciaham apošnich dvuch hadoŭ, pad jakimi ja maju na ŭvazie sychod ciahnikoŭ z rejek, akty padpału, napady na ŭłasnaść palitykaŭ, zmovy z metaj zabojstva lidaraŭ pramysłovaści, naprykład kiraŭnika Rheinmetall, ale byli i inšyja zmovy», — zajaviŭ Apaturaj na pasiadžeńni kamiteta Jeŭraparłamienta pa hibrydnych vojnach.
Čynoŭnik NATA dadaŭ, što rasiejcy nabirajuć ludziej dla svaich zmoŭ u internecie, vykarystoŭvajučy dla špijonskaj dziejnaści «złačynnyja hrupoŭki, vypadkovuju moładź ci mihrantaŭ», kab «pasiejać smutu i padarvać padtrymku Ukrainy».
Zajava Apaturaja stała pieršym publičnym pryznańniem Zachadu nakont taho, što Kreml advažyŭsia na zabojstva vysokapastaŭlenych zachodnich dziejačaŭ, jakija adkazvajuć za vajskovuju moc NATA. Heta taksama stała adnym z samych hučnych aficyjnych abvinavačvańniaŭ u adras Kramla, jaki zaŭsiody admaŭlaje svaju datyčnaść da padobnych dziejańniaŭ.
U razmovie z členami Jeŭraparłamienta Apaturaj adznačyŭ, što stratehičnaja daktryna Rasii zaklučajecca ŭ dasiahnieńni pieramohi, «vykarystoŭvajučy lubyja srodki», uklučajučy paškodžańnie infrastruktury ci palityčnaje ŭmiašańnie. Vysokapastaŭleny čynoŭnik NATA nastojliva zaklikaje Jeŭropu pierajści da «vajskovaha myśleńnia», pakul jašče jość čas.
Rasija vynošvaje płany zachopu krain Bałtyi, častki Finlandyi i Narviehii. NATA źmianiaje płany procidziejańnia joj
Jeŭropie treba dziesiać hadoŭ, kab całkam padrychtavacca da abarony — kiraŭnik Rheinmetal
«Ja dumaŭ, što ruskija chutka pieramohuć, ale vyjšła, jak zaŭsiody». Spoviedź idejnaha rasijskaha špijona, jaki atrymaŭ va Ukrainie pažyćciovaje
Žonka Statkieviča raskazała, pra što paśpieła parazmaŭlać ź im13
Kamientary