Małajzija adnović pošuk «Boinha», jaki tajamniča źnik u 2014 hodzie
U Indyjskim akijanie adnoviać pošuki źnikłaha ŭ sakaviku 2014 hoda samalota Boinh 777-200 avijakampanii Malaysia Airlines. Jon źnik z radaraŭ, kali vykonvaŭ rejs MH370 z Kuała-Łumpura ŭ Piekin. Cieły 227 pasažyraŭ i 12 členaŭ ekipaža nie byli vyjaŭlenyja, nahadvaje Rasijskaja słužba Radyjo Svaboda.
Pošukavyja raboty budzie pravodzić amierykanskaja kampanija Ocean Infinity, dapamahać joj budzie Ministerstva transpartu Małajzii. Rašeńnie adnavić rasśledavańnie było pryniata na padstavie daśledavańniaŭ i danych vialikaj kolkaści ekśpiertaŭ.
Pošukavaja apieracyja pačniecca prykładna za paŭtary tysiačy kiłamietraŭ ad horada Piert na paŭdniova-zachodnim uźbiarežžy Aŭstralii. Čas jaje pačatku pakul nie paviedamlajecca.
Nahadajem, što samalot, jaki nakiroŭvaŭsia z Kuała-Łumpura ŭ Piekin praź niejki čas paśla ŭźlotu niečakana raźviarnuŭsia na 180 hradusaŭ i palacieŭ u bok Aŭstralii i dabraŭsia da Cichaha akijana.
Kali Ocean Infinity vyjavić abłomki samalota, kampanija atrymaje 70 miljonaŭ dalaraŭ. Kantrakt zaklučany na 18 miesiacaŭ. Kampanija Ocean Infinity była zasnavana ŭ 2017 hoda. Jana pravodzić marskija daśledavańni z dapamohaj dronaŭ.
Ocean infinity raniej znachodziła źnikłyja sudny. Naprykład, z dapamohaj jaje technałohij byli znojdzienyja arhiencinskaja padvodnaja łodka «San-Chuan», patanułaja ŭ 2018 hodzie z 44 ludźmi na borcie, i francuzskaja padvodnaja łodka «Minierva», źnikłaja ŭ 1968-m.
Kampanija taksama prymała ŭdzieł u pošukach trochmačtavaha sudna «Vynoślivaść», jakoje naležała irłandskamu daśledniku Ernestu Šekłtanu. Jano zatanuła ŭ 1915 hodzie ŭ Antarktydzie. Jaho abłomki byli vyjaŭlenyja ŭ 2022 hodzie.
Raniej pošuki małajzijskaha łajniera prachodzili na płoščy 120 tysiač kvadratnych kiłamietraŭ. U rozny čas i ŭ roznych miescach byli vyjaŭlenyja 27 mahčymych frahmientaŭ. Ekśpierty zrabili vysnovu, što avijałajnier razvaliŭsia, ale čamu i dzie — u pavietry abo pry ŭdary ab pavierchniu akijana — da hetaha času nie jasna.
Vyniki rasśledavańnia byli apublikavanyja ŭ 2018 hodzie. Ekśpierty nie zmahli ŭstalavać abstaviny i pryčyny katastrofy, nie vyklučyŭšy «mahčymaści ŭmiašańnia trecich asob».
Kamientary