У Індыйскім акіяне адновяць пошукі зніклага ў сакавіку 2014 года самалёта Боінг 777-200 авіякампаніі Malaysia Airlines. Ён знік з радараў, калі выконваў рэйс MH370 з Куала-Лумпура ў Пекін. Целы 227 пасажыраў і 12 членаў экіпажа не былі выяўленыя, нагадвае Расійская служба Радыё Свабода.
Пошукавыя работы будзе праводзіць амерыканская кампанія Ocean Infinity, дапамагаць ёй будзе Міністэрства транспарту Малайзіі. Рашэнне аднавіць расследаванне было прынята на падставе даследаванняў і даных вялікай колькасці экспертаў.
Пошукавая аперацыя пачнецца прыкладна за паўтары тысячы кіламетраў ад горада Перт на паўднёва-заходнім узбярэжжы Аўстраліі. Час яе пачатку пакуль не паведамляецца.
Нагадаем, што самалёт, які накіроўваўся з Куала-Лумпура ў Пекін праз нейкі час пасля ўзлёту нечакана развярнуўся на 180 градусаў і паляцеў у бок Аўстраліі і дабраўся да Ціхага акіяна.
Калі Ocean Infinity выявіць абломкі самалёта, кампанія атрымае 70 мільёнаў даляраў. Кантракт заключаны на 18 месяцаў. Кампанія Ocean Infinity была заснавана ў 2017 года. Яна праводзіць марскія даследаванні з дапамогай дронаў.
Ocean infinity раней знаходзіла зніклыя судны. Напрыклад, з дапамогай яе тэхналогій былі знойдзеныя аргенцінская падводная лодка «Сан-Хуан», патанулая ў 2018 годзе з 44 людзьмі на борце, і французская падводная лодка «Мінерва», зніклая ў 1968-м.
Кампанія таксама прымала ўдзел у пошуках трохмачтавага судна «Вынослівасць», якое належала ірландскаму даследніку Эрнэсту Шэклтану. Яно затанула ў 1915 годзе ў Антарктыдзе. Яго абломкі былі выяўленыя ў 2022 годзе.
Раней пошукі малайзійскага лайнера праходзілі на плошчы 120 тысяч квадратных кіламетраў. У розны час і ў розных месцах былі выяўленыя 27 магчымых фрагментаў. Эксперты зрабілі выснову, што авіялайнер разваліўся, але чаму і дзе — у паветры або пры ўдары аб паверхню акіяна — да гэтага часу не ясна.
Вынікі расследавання былі апублікаваныя ў 2018 годзе. Эксперты не змаглі ўсталяваць абставіны і прычыны катастрофы, не выключыўшы «магчымасці ўмяшання трэціх асоб».
Цяпер чытаюць
Бухі Ігар з Віцебска ўжо не ведае, як адбіцца ад падарункаў ад розных брэндаў. І ўжо звальняецца з завода21
Каментары