Madonna i Ełtan Džon pamirylisia. U čym sutnaść kanfliktu
Viadomyja śpievaki Madonna i Ełtan Džon pamirylisia i «zakapali siakieru vajny», pakłaŭšy kaniec 20-hadovaj varožaści. Pra heta 66-hadovaja karaleva pop-sceny paviedamiła ŭ svaim instahramie, adznačyŭšy, što daŭniaja kryŭda zastałasia ŭ minułym, a napieradzie — novaja staronka ŭ ichnych adnosinach, piša Bi-bi-si.
Zorki varahavali z pačatku 2000-ch. Ełtan Džon nieadnarazova niehatyŭna vykazvaŭsia pra Madonnu, krytykujučy jaje manieru vykanańnia i sceničny vobraz. Prymireńnie, pavodle śpiavački, adbyłosia za kulisami šou Saturday Night Live.
Madona raspaviała, što vyrašyła asabista sustrecca z Ełtanam, daviedaŭšysia, što jon budzie muzyčnym hościem šou. Ubačyŭšy kalehu pa scenie, Ełtan skazaŭ: «Prabač mianie». Paśla čaho pamiž imi, pavodle słoŭ Madonny, «zvaliłasia ściana», i jany «narešcie zakapali siakieru vajny».
Jana taksama apublikavała śviežaje fota, na jakim pazuje ŭ abdymkach 78-hadovaha śpievaka. Madona zhadała, jak u padletkavym uzroście tajkom uciakła z domu, kab ubačyć vystup Ełtana ŭ Detrojcie. Toj kancert, pa jaje słovach, źmianiŭ jaje žyćcio.
«Ja zaŭsiody adčuvała siabie aŭtsajdaram, a hledziačy na jaho na scenie, zrazumieła, što być inšaj — heta nie tolki narmalna, ale i nieabchodna», — napisała śpiavačka.
Jana dadała, što nie razumieła staŭleńnie Ełtana Džona da jaje.
«Ciaham dziesiacihodździaŭ mnie było baluča ŭśviedamlać, što čałaviek, jakim ja tak zachaplałasia, publična vykazvaŭ svaju niepryjaznaść da mianie jak da artystki».
Napružańnie ŭ adnosinach zorak pachodzić z nulavych hadoŭ.
U 2004-m Ełtan Džon raskrytykavaŭ naminacyju svajoj kalehi ŭ katehoryi «Lepšaje žyvoje vykanańnie» na premii Q Awards.
Śpiavak abvinavaciŭ Madonnu ŭ vystupie pad fanahramu.
«Kožnaha, chto prosta varušyć vusnami na scenie, a vy płacicie za heta 75 funtaŭ sterlinhaŭ (134 dalary ZŠA), treba rasstralać», — zajaviŭ ser Ełtan, majučy na ŭvazie ceny kvitkoŭ na kancerty suśvietnaha turne Madonny Reinvention Tour.
«Ź jakich časoŭ adkryvańnie rota pad fanahramu pačali nazyvać žyvym vykanańniem?» — dadaŭ tady vykanaŭca.
Kamanda Madonny admaŭlaje, što jana śpiavała pad fanahramu.
U nastupnyja hady Ełtan uzmacniŭ svaju krytyku.
U 2012 hodzie jon zajaviŭ, što artystka vyhladaje jak «stryptyziorka na kirmašy».
Taksama jon dadaŭ, što Madonna nie maje nijakaha šancu pieramahčy jaho ŭ baraćbie za «Załaty hłobus» u naminacyi «Lepšaja aryhinalnaja pieśnia».
Adnak śpiavačka atrymała hetuju prestyžnuju ŭznaharodu za trek Masterpiece, napisany śpiecyjalna dla filma «My. Vierym u kachańnie».
Paśla hetaha Madonna skazała žurnalistam, što spadziajecca, što ciapier Ełtan «budzie razmaŭlać sa mnoj ciaham nastupnych niekalkich hadoŭ, bo viadoma, što jon na mianie złujecca».
Novy pačatak
U svaim dopisie Madonna dapuściła, što ichniaje prymireńnie moža pryvieści da muzyčnaha partniorstva. Pavodle jaje słoŭ, Ełtan prapanavaŭ joj supracu, zhadaŭšy, što napisaŭ dla jaje pieśniu.
U adkaz śpiavak padziakavaŭ Madońnie za toje, što jana «prabačyła mianie i moj vialiki rot».
Jon dadaŭ, što nie hanarycca tym, što kazaŭ pra jaje ciaham mnohich hadoŭ, asabliva ŭličvajučy «inavacyjnuju pracu Madonny… jakaja prakłała šlach cełamu pakaleńniu žančyn-artystak da pośpiechu i viernaści sabie».
«Mianie ŭsio bolš zasmučaje ŭsia hetaja varožaść u našym śviecie, — adznačyŭ jon u kamientary da jaje dopisu ŭ instahramie. — Spadziajusia, što, abjadnaŭšysia, my zmožam zrabić vialikija spravy dla tych, chto sapraŭdy maje patrebu ŭ padtrymcy, i atrymać ad hetaha zadavalnieńnie».
Kamientary