Administracyja Trampa pazbaviła Harvard prava navučać zamiežnych studentaŭ

Administracyja Donalda Trampa pazbaviła Harvardski ŭniviersitet prava navučać zamiežnych studentaŭ, pra heta paviedamiła Ministerstva ŭnutranaj biaśpieki ZŠA, piša Bi-bi-si.

Ministr unutranaj biaśpieki ZŠA Kryści Noem rasparadziłasia spynić dziejańnie siertyfikata Harvardskaha ŭniviersiteta na prava ažyćciaŭlać prahramu pa studenckich abmienach. Zamiežniki, jakija płanujuć vučycca ŭ ZŠA, pavinny atrymać vizu kłasa F abo M. Tolki navučalnyja ŭstanovy, siertyfikavanyja dla pryjomu studentaŭ i ŭdzielnikaŭ prahram abmienu (SEVP), mohuć vydavać nieabchodnyja dla atrymańnia vizy dakumienty.

Heta aznačaje, što Harvard bolš nie zmoža prymać na navučańnie zamiežnych studentaŭ. Zamiežniki, jakija ŭžo vučacca ŭ Harvardzie, buduć vymušanyja pierajści na navučańnie ŭ inšy ŭniviersitet, inakš jany straciać prava na znachodžańnie ŭ krainie.

Pavodle źviestak univiersiteta, u minułym navučalnym hodzie ŭ Harvardzie navučałasia kala 7000 zamiežnych studentaŭ — heta 27,2% ad ahulnaj kolkaści navučencaŭ.

«Administracyja ličyć Harvard adkaznym za raspalvańnie hvałtu, antysiemityzmu i kantakty z Kamunistyčnaj partyjaj Kitaja», — skazała Krysty Noem, adznačyŭšy, što dla ŭniviersitetaŭ «heta pryvilej, a nie prava — prymać zamiežnych studentaŭ» i atrymlivać vyhadu ad bolš vysokaj apłaty za navučańnie.

Harvard u svajoj zajavie nazvaŭ hety krok administracyi Trampa niezakonnym.

«My całkam addanyja zachavańniu zdolnaści Harvarda prymać mižnarodnych studentaŭ i navukoŭcaŭ, jakija pachodziać z bolš čym 140 krain i mocna ŭzbahačajuć Univiersitet — i hetuju krainu», — havorycca ŭ zajavie Harvarda.

«Heta akcyja adpłaty pahražaje nanieści surjoznuju škodu harvardskaj supolnaści i našaj krainie i padryvaje akademičnuju i daśledčuju misiju Harvarda», — padkreślivajecca ŭ zajavie ŭniviersiteta.

U siaredzinie krasavika Ministerstva adukacyi ZŠA abviaściła pra zamarozku fiederalnych hrantaŭ dla Harvarda. Padstavaj dla hetaha stała admovu ŭniviersiteta vykonvać patrabavańni viedamstva, siarod jakich byŭ aŭdyt «pohladaŭ studentaŭ i supracoŭnikaŭ».

U pryvatnaści, ad univiersiteta patrabavali raspracavać sistemu, jakaja dazvolić praduchilić pryjom zamiežnych studentaŭ, «varoža nastrojenych da amierykanskich kaštoŭnaściaŭ i instytutaŭ». A taksama — pravieści aŭdyt (znoŭ ža, z pryciahnieńniem starońnich ekśpiertaŭ) prahram, jakija byli zaŭvažanyja ŭ antysiemityźmie i inšych formach nianaviści. Univiersitet admoviŭsia vykanać hetyja patrabavańni, paśla čaho paśledavali pahrozy Trampa pazbavić Harvard śpiecyjalnaha padatkovaha statusu i mahčymaści prymać zamiežnych studentaŭ.

Univiersitet padaŭ u sud na administracyju, patrabujučy adnavić finansavańnie.

U kancy krasavika Harvardski ŭniviersitet vypuściŭ dva dakłady — adzin pra antysiemityzm i antyizrailskija nastroi ŭ univiersiteckim asiarodździ, druhi — pra antyisłamizm. Abodva dakłady krytyčna vykazvajucca pra kulturu ŭ kampusie i reakcyju ŭniviersiteta na składzienuju situacyju.

Paśla publikacyi dakładaŭ prezident Harvarda Ałan Harbier paprasiŭ prabačeńnia za toje, što ŭniviersitet nie apraŭdaŭ čakańniaŭ studentaŭ i prafiesury.

• 8
• 1
• 2
• 3
• 0
• 0
• 1
• 0