«Sychodzić epocha navukovaha stendapu». Biesarab pra źniaćcie z pasady byłoha kiraŭnika Akademii navuk

«Z Husakovym sychodzić epocha publičnaha navukovaha stendapu», — tłumačyć «Našaj Nivie» Siarhiej Biesarab. Mahčyma, miarkuje navukoviec, były kiraŭnik nadakučyŭ svaimi zajavami kiraŭnictvu krainy i pačaŭ razdražniać.

«Stendapier ad navuki. Prosty ahrarny chłopiec, jaki staŭ ministram navuki (staršynioj Prezidyuma NAN. — NN) i zachavaŭ u sabie hetu ahrarnaść, pranios praz usio žyćcio. Śvietły sum u mianie heta vyklikaje. Ale heta ŭ mianie — Husakoŭ ža byŭ datyčny da majho zvalnieńnia ŭ Akademii navuk, represij — i da mianie, i da kaleh».

Niahledziačy na ŭsio, Husakoŭ byŭ akademičnym čałaviekam. Lubiŭ ahrarnaje adździaleńnie NAN — na jaho nakiroŭvałasia značnaje finansavańnie, tłumačyć Biesarab. Heta jaho adroźnivaje ad Karanika.

«Niachaj jon kandydat navuk, ale jon nie pracavaŭ u navucy, nie maje da jaje dačynieńnia. Z takim ža pośpiecham možna było Karajeva pastavić na post ministra navuki — dać jamu jakuju-niebudź kandydackuju pa jurysprudencyi», — zaŭvažaje Biesarab.

Navukoviec dumaje, što źmiena Husakova na Karanika moža być žadańniem nie čuć uvohule nijakich zajaŭ z Akademii. Surazmoŭca taksama dapuskaje, što Karanik nadoŭha nie zatrymajecca na pasadzie i jaho pieraviaduć u inšaje miesca.

Biesarab upeŭnieny, što kiravać Akademijaj navuk pavinien čałaviek, jaki zdolny bačyć trendy — «na treć futurołah».

«Kali my chočam, kab navuka była vytvorčaj siłaj hramadstva, kab jana šanavałasia ŭ śviecie, to sapraŭdy pavinien być futurołah, daśviečany mulcidyscyplinarny śpiecyjalist, jaki bačyć suviazi pamiž roznymi halinami. Voś taki kiraŭnik Akademii — jak toj akademik Barysievič ci Vajtovič (kiraŭniki NANB u 1970-ch i 2000-ch hadach). Heta nastolki byli śvietłyja rozumy.

Ja Barysieviča nie viedaŭ — viedaŭ moj kiraŭnik navukovy. A voś z Vajtovičam ja sutykaŭsia nieadnarazova. Ja — chimik i ź im znachodziŭ takija temy… Vielmi erudziravany čałaviek».

Navukoviec sumniajecca, što pry Karaniku fokus z ahrarnaha siektaru pieraklučycca na miedycynski: chutčej, kaža jon, pieršaje adździaleńnie budzie pakutavać, a druhoje «nie zmoža narmalna pracavać».

«Biełaruś — kraina, jakaja paśla raspadu SSSR atrymała najbolšy kadravy navukovy patencyjał. I jon źniščany ŭščent. Niejkaja ironija losu dziŭnaja, navat ciažka pra heta dumać. I niama praśvietu», — kaža jon.

• 12
• 0
• 5
• 0
• 0
• 9
• 0
• 0