U Minsku źjaviŭsia čarhovy pomnik milicyjanieru. U stalicy ich užo šeść
U centry Minska źjaviŭsia jašče adzin pomnik milicyjanieru. Jon raźmiaściŭsia kala novaha budynka HUUS Minharvykankama na Dabramyślenskim zavułku, piša Blizko.by.
Skulptura staić kala prachadnoj na terytoryju kompleksu. Heta milicyjanier u formie savieckaha ŭzoru: pojas z partupiejaj źvierchu mundzira, štany‑halife, boty, sumka‑płanšet, pistalet u kabury. Taksama možna razhladzieć pahoni z čatyrma kapitanskimi zoračkami.
Imia skulptara nie viadoma.
Heta ŭžo daloka nie pieršaja skulptura, pryśviečanaja milicyjantam i ŭvohule supracoŭnikam orhanaŭ unutranych spraŭ.
U lutym 2017 hoda na vulicy Haradski Vał nasuprać budynka MUS źjaviłasia skulptura haradovaha (aŭtar Alaksandr Draniec). Fihura vyklikała rezanans u hramadstvie ŭ pieršuju čarhu dziŭnym pasyłam. Jaje ŭstanavili da 100‑hodździa minskaj milicyi.
Dataj naradžeńnia minskaj milicyi ličycca 4 sakavika 1917 hoda, kali atrady bajavoj arhanizacyi pad kiraŭnictvam Frunze razzbroili byłuju carskuju palicyju i haradavych. Niahledziačy na hety fakt, ustalavali pomnik nie pieršamu milicyjantu, a mienavita haradavomu.
Minčanie pačali ładzić roznyja pierformansy z pomnikam, časam chulihanskija. Za što potym byli vymušanyja zapisvać na videa vybačeńni. Paśla taho, jak tahačasny ministr MUS Ihar Šunievič pakinuŭ pasadu, pieraśled za abrazu pomnika spyniŭsia.
U mai 2018‑ha ŭnutry dvara Akademii MUS na praśpiekcie Mašerava ŭstalavali skulpturu vypusknika Akademii. Aŭtar — Chizry Asadułajeŭ.
U listapadzie 2018‑ha ŭnutry dvara ŭpraŭleńnia ŭnutranych spraŭ Minskaha abłvykankama na vulicy Kalvaryjskaj pastavili pomnik supracoŭnikam milicyi, jakija zahinuli pry vykanańni słužbovaha abaviazku. Heta supracoŭnik milicyi na kaleniach ź dziaŭčynkaj. Aŭtar skulptury — Alaksandr Tuchto.
Jość i jašče adna skulptura, jakuju tematyčna možna adnieści da hrupy vyjaŭ, pryśviečanych milicyjantam. Jana pakazvaje saboj junaha inśpiektara DAI ŭ mundziry, furažcy, z žezłam i Praviłami darožnaha ruchu ŭ rukach.
Hetaja skulptura (taksama nieviadomaha šyrokaj hramadskaści aŭtara) źjaviłasia ŭ 2018 hodzie padčas kapitalnaha ramontu dvara damoŭ № 79 i 81 pa vulicy Plachanava. U 2019‑m hety dvor pryznali najlepšym u Minsku. Skulptura taksama vyklikała supiarečlivyja reakcyi siarod minčan: častka haradžan ličyć, što ŭ junaha inśpiektara vielmi ŭžo dziŭny vyraz tvaru.
Taksama ŭ Minsku jość pamiatny znak, pryśviečany zahinułym pry vykanańni słužbovym supracoŭnikam i vajskoŭcam MUS (skulptary A. Draniec i V. Antanovič). Pomnik — ščyt, mieč, vianok i simvolika MUS. Jakich‑niebudź piersanažaŭ na hetym pomniku niama.
Ciapier čytajuć
Zasnavalnik dabračynnych fondaŭ dla dapamohi dzieciam Łysiankoŭ dabiehaŭsia — jaho zatrymaŭ DFR5
Zasnavalnik dabračynnych fondaŭ dla dapamohi dzieciam Łysiankoŭ dabiehaŭsia — jaho zatrymaŭ DFR
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ99
Kamientary
U tym liku pa praźmiernaj kolkaści milicyi i inšych karnikaŭ, pa kolkaści "sacyjalnaha" žylla dla ich, pa nasyčanaści videakamierami.