«Bajusia rasčaravać pradaŭca». Ekśpiert rastłumačyŭ, čamu manieta za 16 tysiač moža być pieraacenienaj
Na internet-placoŭcy ay.by źjaviłasia abjava ab prodažy maniety naminałam 10 polskich hrošaj, adčakanienaj u 1840 hodzie. Uładalnik acaniŭ redki łot u 17 999 biełaruskich rubloŭ.
Zhodna ź infarmacyjaj, manieta była vypuščanaja Varšaŭskim manietnym dvarom. Asablivaść ekzemplara zaklučajecca ŭ materyjale — miedź. Pradaviec miarkuje, što heta mahła być probnaja čakanka, što robić manietu asabliva kaštoŭnaj. Miednyja 10 hrošaŭ 1840 hoda adnosiacca da katehoryi R4, što aznačaje, što isnuje mienš za dziesiać takich ekzemplaraŭ. Pry hetym anałahičnyja maniety z srebra kaštujuć značna tańniej.
Pradaviec adznačyŭ, što manieta znachodzicca ŭ dobrym stanie (VF — Very Fine), choć i maje nievialikija ślady znosu. Dla paćvierdžańnia materyjału manietu aściarožna ačyścili ad ciomnaj paciny.
Tarhi zaviaršajucca 8 lipienia.
Situacyju prakamientavaŭ Onliner.by navukovy supracoŭnik Akademii navuk Usievaład Jurhienson. Ekśpiert raspavioŭ, što, na jaho dumku, realnaja kaštoŭnaść maniety moža być mocna pieraacenienaj, i rastłumačyŭ, z čym heta źviazana. Voś jaho kamientar
«Bajusia rasčaravać pradaŭca, ale z kudy bolšaj dolaj vierahodnaści heta manieta — usiaho tolki miednaja pasrebranaja padrobka tych časoŭ, zroblenaja na škodu abaračeńniu. Biezumoŭna, reč cikavaja, ale daloka nie takaja redkaja, jak chaciełasia b dumać.
Sprava ŭ tym, što miedny 1-hrošavik i srebrany 10-hrošavik mieli adnolkavaje afarmleńnie i dyjamietr. U toj čas umielcy časta zrezvali adzinku, napajvali ličbu 10, pakryvali manietu srebram i pradavali jak bolš kaštoŭnuju. Pik padobnych padrobak jakraz pryjšoŭsia na 1840 hod.
Nie vyklučaju i varyjant pamyłki pradaŭca pry vyznačeńni mietału. U spłavie 10-hrašavikoŭ srebra źmiaščałasia vielmi mała — proba 194-ja (mienš za 20 % srebra i bolš za 80 % miedzi). Pry peŭnych umovach takija maniety mohuć nabyvać «miedny» vyhlad.
Važna ŭličvać i toje, što pry čystcy paciny vierchni, adbieleny, płast maniety vielmi lohka paškodzić. Pry čakancy manietu adbielvali, kab stvaryć uražańnie bolšaha ŭtrymańnia srebra, ale ŭ spłavie jaho praktyčna nie było. Paśla ačystki manieta mahła stać bolš «miednaj» na vyhlad.
Takim čynam, śćviardžać, što manieta sapraŭdy miednaja i pry hetym nie źjaŭlajecca padrobkaj, možna tolki paśla detalovaj ekśpiertyzy, uklučajučy analiz składu spłavu. Sudziačy pa fota, chutčej za ŭsio, idzie havorka nie pra miedny probny varyjant, a pra paškodžanuju pavierchniu nizkaprobnaha biljona (spłavu srebra i miedzi ź minimalnym utrymańniem srebra)».
Chto taki Michaił Miachovič — siłavik, jaki viadzie kanał HUBAZiKa i adkazvaje za prabiŭ ludziej20
Kamientary