«Pryjazdžaješ biez ofiera — budzie ciažka». Ajcišnik-sieńjor pracuje ŭ šviejcarskim banku. Voś jak da hetaha išoŭ

«Maju žonku zaŭvažyli i zaprasili»: šlach u Šviejcaryju

— U IT ja pracuju ŭžo 12 hadoŭ, z 2013 hoda. Uvachod u prafiesiju pačynaŭsia paralelna z majoj adukacyjaj u BDU na fakultecie prykładnoj matematyki i infarmatyki (FPMI). U Biełarusi ja adpracavaŭ čatyry hady. Zatym pastupiŭ u mahistraturu aŭstryjskaha Vienna University of Economics and Business u halinie Quantitative Finance (ličbavyja, abo kolkasnyja finansy). Hety ŭniviersitet rehularna traplaje ŭ 1% lepšych biźnies-škoł śvietu, a jaho mahistarskaja prahrama uvachodzić u TOP-20 u śviecie ŭ svajoj halinie.

Dla padrychtoŭki da navučańnia ŭ Aŭstryi my z žonkaj pastupili ŭ amierykanski World Quant University na Master of Science in Financial Engineering. Heta online prahrama, ale vielmi hodnaja. Pastupleńnie ŭ aŭstryjskuju VNU dapamahło nam zrabić vizy.

Žyćcio ŭ Aŭstryi — heta dva samyja składanyja hady ŭ maim žyćci. Paralelna z vučobaj u dźviuch mahistraturach my pracavali part-time 50%.

I ŭ dadatak udzielničali ŭ dadatkovaj prahramie ŭ halinie partfolia mieniedžmienta. Akramia taho, na druhim kursie mahistratury ja padpracoŭvaŭ repietytaram, chłopcy prasili im dapamahčy, kab ich nie adličyli. U hety pieryjad ja byŭ na miažy vyharańnia, dajšoŭ da svajho asabistaha limitu. My z žonkaj dapamahali adzin adnamu, naprykład, rabili chatnija zadańni za dvaich, pakul druhi spaŭ, i abiedźvie mahistratury paśpiachova skončyli.

Paśla hetych dvuch hadoŭ vielmi-vielmi-vielmi intensiŭnaj pracy i vučoby nam krychu pašancavała. U prahramie pa partfolia mieniedžmientu maju žonku zaŭvažyli i zaprasili pajechać u Šviejcaryju na pracu. Kampanija, jakaja arhanizavała hetuju prahramu, bazujecca ŭ Šviejcaryi. I jana nabirała supracoŭnikaŭ u svoj šviejcarski ofis.

«Pryjšłosia pačynać z samaha-samaha nizu»: pošuki pracy

Zaraz my žyviem u vielmi pryhožaj šviejcarskaj vioscy na bierazie voziera. Z akna ja baču hory i voziera. Adnak heta nie vielmi blizka da Ciurycha, mnie davodzicca jeździć u horad na pracu. Takaja voś raspłata za pryhažość pryrody.

Žyllo (3 pakoi, 90 kvadratnych mietraŭ u šmatkvaternym domie) my arandujem. Sprava ŭ tym, što zrabili zaprašeńnie na pracu mienavita ŭ hetuju viosku, i kampanija daje subsidyju na dziciačy sadok i na arendu žylla. Tamu my płacim paŭtary tysiačy frankaŭ u miesiac, što vielmi tanna. Ale heta, chutčej, vyklučeńnie.

Pavialičyć

Žonka ź pieršaha dnia i da hetaha času pracuje ŭ hetaj kampanii. U jaje ŭsio stabilna.

A voś u mianie byŭ inšy šlach. Tamu što tym ludziam, jakija pryjazdžajuć u Šviejcaryju biez ofiera, znajści tut pracu vielmi ciažka. U maim vypadku za plačyma byli try mahistratury ŭ vielmi pavažanych, dobrych navučalnych ustanovach. Viadoma, nie Oksfard, ale najlepšaja biełaruskaja, najlepšaja aŭstryjskaja adukacyja i davoli dobraja prahrama amierykanskaha ŭniviersiteta.

Plus u Aŭstryi ja pracavaŭ na niadrennych pazicyjach, paŭtara hoda ŭ Raiffeisen Bank i kala paŭhoda ŭ inviestycyjnym fondzie.

I ŭsio roŭna było nievierahodna składana. Ja prosta nie moh zrazumieć, kaho ž jany šukajuć, kali ŭ mianie nie atrymlivajecca ŭ mnohich vypadkach navat prosta trapić na intervju.

U dadatak nie pašancavała ŭ tym płanie, što heta byŭ pieryjad pandemii COVID-19.

Usiaho na pošuk pieršaj šviejcarskaj pracy syšło kala troch miesiacaŭ. Z pazicyjami midł-uzroŭniu ničoha nie atrymlivałasia. U vyniku z usimi maimi adukacyjami i dośviedam pryjšłosia pačynać z samaha-samaha nizu — pačaŭ padavacca na džunijorskija pazicyi i stažyroŭki ŭ dobryja kampanii. Prykładna praź miesiac ja atrymaŭ stažyroŭku — hod u adździele partfolia-mieniedžmienta ŭ dobraj strachavoj kampanii. Heta surjoznaja praca, surjoznaja kampanija — ale, tym nie mienš, heta była mienavita stažyroŭka. Paśla jaje mnie nie zmahli prapanavać pastajanny kantrakt, prosta ja vykanaŭ prajekt — i mnie skazali «da pabačeńnia».

Potym ja pačaŭ pracavać na šviejcarskaj fondavaj biržy. Heta była paŭhadavaja stažyroŭka ŭ vielmi dobraj kampanii.

Abiacali, što paśla stažyroŭki pracaŭładkujuć. U vyniku, kali ja paśpiachova vykanaŭ prajekt, usie zastalisia zadavolenyja. «Dziakuj vialiki, vydatnaja praca, ale, na žal, u nas niama adkrytych pazicyj». Atrymałasia, što mianie tut u druhi raz kinuli.

Ja byŭ užo davoli zły na padobnyja karparacyi i zrazumieŭ, što treba dziejničać niejak pa-inšamu. I pajšoŭ u nievialikuju šviejcarskuju kampaniju, padobnuju na startap, tam pracavała litaralna čałaviek 10. Damoviŭsia, što ŭ mianie adrazu budzie prapisana midłaŭskaja pazicyja Quantitative Analyst.

Ja pracavaŭ u hetaj kampanii i paralelna praciahvaŭ šukać novuju pracu: razumieŭ, što treba ruchacca dalej. Pracadaŭcu vielmi padabałasia, što ja dobra pracuju za zarpłatu istotna nižej siarednierynkavaj. Pieršapačatkova my damaŭlalisia, što budziem pierahledžvać zarpłatu kožnyja try miesiacy, tak jak pačynaŭ ja z 65 tysiač frankaŭ u hod pry siaredniaj zarpłacie na takich pazicyjach kala 100 tysiač [šviejcarski frank u pieršaj pałovie 2025 hoda tarhujecca na ŭzroŭni 1,03 — 1,08 jeŭra i 1,10-1,27 dalara].

Na taki dempinh ja pajšoŭ z-za nieabchodnaha dla mianie pastajannaha kantraktu i całkam addalenaj pracy. Plus spadziavaŭsia, što što chutka dakažu svaju kaštoŭnaść i zarpłatu mnie padvysiać. Zarpłata sapraŭdy nabližałasia da siaredniaj, ale pracy rabiłasia ŭsio bolš. Uzrovień zaniataści vyras da dvuch fułtajm prajektaŭ adnačasova, i mnie nie zdavałasia spraviadlivym pracavać za adnu zarpłatu z takoj nahruzkaj.

Uvieś hety čas ja rehularna padavaŭsia na roznyja pazicyi, i praz paŭtara hoda na mianie vyjšaŭ šviejcarski bank UBS (na jaho vakansii ja adhukaŭsia ź pieršaha dnia žyćcia ŭ Šviejcaryi). Paśla sieryi ź piaci ci šaści davoli składanych intervju ja atrymaŭ ofier.

Apošnija dva z pałovaj hady pracuju ŭ UBS. Zaraz — na pasadzie Senior Quantitative Consultant. Heta sieńjorskaja pazicyja, na jakoj ja dapamahaju roznym kamandam ukaraniać IT-rašeńni na bazie ML. My robim roznyja madeli, jakija dapamahajuć banku raźličvać ryzyki, a taksama lepš arhanizoŭvać svaje inviestycyi.

Maje vysnovy z asabistaha dośviedu pošukaŭ (i dapamohi ŭ pošuku inšym ludziam). Navat biez uskładniajučych faktaraŭ kštałtu pandemii znajści pracu ŭ Šviejcaryi z našym hramadzianstvam vielmi składana. I navat z hramadzianstvam dziaržavy-člena ES. U Šviejcaryi vielmi vysokaja kankurencyja, tamu što siudy ściakajucca śpiecyjalisty z usiaho śvietu. Patrebny albo dastatkova vialiki dośvied, albo realna mocny profil. I idealna padrychtavanyja dakumienty ab adukacyi, pracy: tut ich vielmi ŭvažliva vyvučajuć.

Niejak ja padavaŭsia na džunijorskuju pazicyju ŭ toj ža UBS. Patrapiŭ u finał, dzie zastavałasia dvoje kandydataŭ. U vyniku ofier atrymaŭ niemiec, jaki šeść (!) hadoŭ pracavaŭ na anałahičnaj pazicyi ŭ Hiermanii. Nahadaju, što heta była džunijorskaja pazicyja!

U Biełarusi i Aŭstryi, darečy, ja prachodziŭ intervju vielmi chutka, i praktyčna kožnaje zakančvałasia ofieram.

«Praktyčna nie byvaje takoha, kab u ofisie chto-niebudź śmiajaŭsia»: praca ŭ šviejcarskim banku

Pierapracoŭvać u majoj kampanii asablivaj patreby niama. U nas całkam narmalny pracoŭny hrafik — prykładna pa vosiem hadzin. Pry hetym aficyjny pracoŭny dzień krychu bolš, 8,5 hadzin.

Samaje hałoŭnaje — kab praca była zroblena svoječasova i jakasna. Tamu ja i maje kalehi sfakusavany nie na tym, kolki hadzin my praviali ŭ ofisie, a na tym, nakolki dobra my zrabili svaju pracu, ci zadavoleny klijent, ci paśpiavajem ŭ terminy, ci usio dobra z prajektam. Adznaču, što terminy całkam realistyčnyja. Ja b nie skazaŭ, što my zabivajemsia na pracy.

Ludzi ŭ kamandzie nievierahodna vysoka adukavanyja. Va ŭsich jak minimum adna vielmi dobraja mahistratura, u mnohich PhD. Dvoje kaleh, skončyli Oksfard, niekalki — Šviejcarskuju vyšejšuju techničnuju škołu Ciurycha, dzie navučaŭsia i vykładaŭ Albiert Enštejn. Tamu tut niama asablivych prablem z kamunikacyjaj. Razmoŭnaja mova anhlijskaja, usie vielmi intelihientnyja.

Pavialičyć

Nie skažu, što atrymlivajecca zavodzić siabroŭ na pracy, heta nie tak lohka. I jašče tut vielmi pracoŭnaja atmaśfiera. Praktyčna nie byvaje takoha, kab u ofisie chto-niebudź śmiajaŭsia, znosiny nie nadta «žyvyja». Moža, heta asablivaść banka — bo ŭ Biełarusi ja pracavaŭ u zvyčajnaj IT-kampanii. Tam było realna viesieła. My mahli paśmiajacca, pažartavać, niešta parabić takoje viasiołaje. Tut usio niejkaje bolš surjoznaje. Heta nie značyć, što heta drenna, heta prosta pa-inšamu.

U pracy ŭ bujnoj internacyjanalnaj kampanii jość svaje asablivaści. Vielmi važna sačyć za tym, što i jak ty kažaš. Akramia karparatyŭnaj leksiki, važna dumać, kab vypadkova nie skazać čaho-niebudź, što moža być uspryniata jak rasizm, sieksizm. Albo niejak nie tak adazvacca ab mienšaściach. Heta moža pryvieści da surjoznych prablem.

Unutry kampanii staŭleńnie da ŭsich supracoŭnikaŭ narmalnaje, niejtralnaje. Ale pry pracaŭładkavańni isnuje svojeasablivaja ijerarchija. Spačatku, naturalna, buduć najmać šviejcarcaŭ. Kali šviejcarcy skončacca, pry inšych roŭnych buduć najmać niemcaŭ, francuzaŭ, italjancaŭ. Potym — inšych blizkich jeŭrapiejcaŭ, i potym užo ludziej ź inšych krain. U hetym vypadku ijerarchija isnuje. Ale jak tolki vy trapili ŭ sistemu — nijakich miežaŭ bolš niama.

Zrešty, u vypadku prasoŭvańnia pa karjernaj leśvicy mohuć być peŭnyja mierkavańni nakont taho, ź jakoj ty krainy. Ale heta źviazana, chutčej, z tym, što ŭ niemcaŭ rodnaja mova niamieckaja, što moža canicca starejšym kiraŭnictvam banka. Ja liču, što heta narmalny pracoŭny momant, kali znachodzišsia ŭ niamieckamoŭnaj častcy Šviejcaryi.

U Šviejcaryi vielmi mnohija razmaŭlajuć pa-anhlijsku. Tym nie mienš, vielmi pažadana viedać miascovuju movu rehijona, u jakim ty žyvieš. Tut jość try vialikija rehijony: niamieckamoŭny, frankamoŭny i itałamoŭny. I adna śpiecyfičnaja retaramanskaja mova, jakaja naohuł niezrazumieła na što padobnaja. Kali francuzskaja i italjanskaja movy ŭ Šviejcaryi całkam narmalnyja, to niamieckaja mova ŭ ich maje vielmi prykmietnyja dyjalektnyja adroźnieńni. Ja adnosna niadrenna viedaju niamieckuju movu, ale šviejcarskuju niamieckuju razumieju ź ciažkaściu.

«Pierachod u top-mieniedžmient — vielmi nietryvijalny»: karjera

Na pieršy pohlad zdajecca, što, prykłaŭšy takija ž namahańni ŭ Biełarusi, ja moh by dasiahnuć jašče bolšych karjernych vynikaŭ. Bo zaraz ja prosta sieńjor, a pierachod na pazicyi nastupnaha ŭzroŭniu ŭ kiraŭnictva kamandy abo top-mieniedžmient — vielmi nietryvijalny. Jon zanadta mocna zaležyć ad taho, jakija ŭ ciabie suviazi. Praces nadzvyčaj nieliniejny, nieprazrysty, patrabuje dobraha nietvorkinha i kryšačku ŭdačy.

Adnak prablema ŭ tym, što ŭ Biełarusi prosta nie było cikavaj mnie pracy — Data Science u halinie finansaŭ. Nie nadta raźvityja inviestycyi, nie nadta raźvity FinTech. Było zrazumieła, što kali ja chaču ŭ hetaj halinie raźvivacca, treba šukać mahčymaść u inšych krainach.

U cełym žyćcio na sieńjorskaj pazicyi ŭ banku abo ŭ inšaj dobraj kampanii ŭ Šviejcaryi — heta dobraje žyćcio. Tut skardzicca niama na što.

«Tut niama takoha vialikaha razryvu pamiž džunijorami i sieńjorami»: dachody i vydatki

U našaj śfiery navat u navičkoŭ zarpłaty dobryja, ad 4,5-5 tysiač frankaŭ u miesiac. Tut niama takoha vialikaha razryvu pamiž džuniorami i sieńjorami, jak u Biełarusi. Ty pačynaješ užo z davoli niadrennaj zarpłaty, i potym jana patrošku raście.

Zarobak u rajonie 100 tysiač frankaŭ bruta ŭ hod dla sieńjoraŭ — norma. Mocna zaležyć ad taho, kolki hadoŭ ty adpracavaŭ i ŭ jakoj arhanizacyi. Naprykład, u Google zarobak budzie prykładna ŭ dva razy bolšym, čym u maim banku. A ŭ jakoj-niebudź mienšaj kampanii moža być krychu mienšym.

Padatki tut usiaho pracentaŭ 20 ad zarpłaty. Dla Jeŭropy heta sapraŭdy vielmi dobry padatak. Uličvajučy pamiery zarpłat i padatkovyja staŭki, u Šviejcaryi možna dastatkova niadrenna nazapasić hrošaj.

Kali ŭ siamji atrymlivajecca adkłaści jakija-niebudź hrošy, ludzi ŭ asnoŭnym albo sprabujuć uziać ipateku, albo realizujuć jakija-niebudź piensijnyja płany. Mnohija šviejcarcy inviestujuć u finansavyja rynki. Asabista ja inviestuju ŭ akcyi. Pakolki ja prafiesijna pracuju ź inviestavańniem, to dapamahaju pačać inviestavać i razabracca ŭ hetym pytańni i inšym ludziam. U hetym hodzie ja raspracavaŭ i paśpiachova zapuściŭ svoj inviestycyjny kurs.

Pavialičyć

Ale i vydatki ŭ Šviejcaryi dastatkova vysokija. Patracić 7-8 tysiač frankaŭ u miesiac — heta ŭvohule nie prablema. Heta biez raskošy, prosta dobraje žyćcio.

Kali vaš muž ci žonka nie pracuje, abo, naprykład, u vas źjaŭlajucca dzieci — heta zusim inšaja razmova.

Ź dziećmi dva varyjanty: albo niechta adzin pierastaje pracavać, i vy całkam hublajecie adnu zarpłatu. Albo dzicia treba adpraŭlać u dziciačy sadok, jaki kaštuje tut prosta kaśmičnych hrošaj, prykładna try tysiačy frankaŭ u miesiac. Kali ŭ vas, naprykład, dvoje dziaciej małodšaha ŭzrostu, pracavać užo nie maje nijakaha finansavaha sensu. Mnohija žančyny ŭ Šviejcaryi pracujuć albo ŭ mocna ŭrezanym farmacie, albo uvohule nie pracujuć.

Ja viedaju ludziej, niemcaŭ, jakija prosta pajechali dadomu ŭ Hiermaniju, kali ŭ ich źjaviłasia dvoje dziaciej. Tamu što tam vydatki na dziaciej praktyčna nulavyja, a ŭ Šviejcaryi jany vielmi vialikija.

• Pieršy artykuł raschodaŭ — heta arenda žylla. Pra kuplu žylla ŭ Šviejcaryi, dumaju, možna na mnohija hady zabyć. Narmalnaje pa šviejcarskich mierkach žyllo ŭ narmalnym miescy (niedaloka ad Ciurycha abo inšych haradoŭ, dzie jość praca) budzie kaštavać ad miljona frankaŭ. A chutčej, ad paŭtara miljonaŭ. Zvyčajnaj zarpłaty sieńjora ŭ maim banku niedastatkova dla taho, kab kupić takoje žyllo. Tak, tut ipateka nie zanadta darahaja z punktu hledžańnia pracentnaj staŭki. Ale pry kupli vam treba ŭnieści pačatkovy płaciež minimum u 20% — dapuścim, 200 tysiač. I ŭziać kredyt na 800 tysiač frankaŭ, jaki pryjdziecca addavać usio žyćcio. Technična heta mahčyma, ale vyhladaje jak niebiaśpiečnaja ŭhoda.
• Jašče treba płacić strachoŭki. Abaviazkovyja miedycynskija — na siamju kala 700 frankaŭ u miesiac.
• Kali ŭ vas jość mašyna, treba apłacić miescy parkoŭki. Usie nieabchodnyja servisy — tysiačy dźvie z pałovaj u hod. Strachoŭka na mašynu moža być roznaj. Poŭnaje kaska — tysiačy dźvie ŭ hod.
• Zatym iduć vydatki na charčavańnie. U paraŭnańni z usim astatnim jany zusim nievialikija. Nie bolš tysiačy frankaŭ u miesiac. A voś pachod u narmalny restaran — jak minimum 100 frankaŭ.
• Ale samaje darahoje, što tut jość — heta miedycyna. U nas jość strachoŭka, jakaja całkam pakryvaje rody, absłuhoŭvańnie ŭ vypadku traŭmaŭ i niaščasnych vypadkaŭ. Ale voś pasłuhi kštałtu stamatałohii i ŭsio, što nie padpadaje pad vyznačeńnie niaščasnych vypadkaŭ, vielmi darahoje. I my imkniemsia hetym nie karystacca. Zaŭsiody tańniej źlotać kudy-niebudź i zrabić usio tam — naprykład, dadomu. Zrešty, standartnaja siamiejnaja strachoŭka pakryvaje ŭsie miedycynskija pasłuhi dla dziaciej, što vielmi dobra. Z maleńkimi dziećmi treba časta źviartacca da daktaroŭ, i pa fakcie takija zvaroty abychodziacca nie doraha.
• Kali vy zachočacie zdać na pravy, abo kali vy chočacie zaniacca jakim-niebudź chobi kštałtu parahłajdynha, dzie vam patrebny instruktar, heta ŭsio budzie vielmi doraha. Kala $5-10 tysiač. Rečy ŭ Šviejcaryi kaštujuć taksama, jak i paŭsiul, a voś praca čałavieka kaštuje vielmi doraha, prykładna $100 u hadzinu. U Biełarusi maje siabry-prahramisty karystajucca klininham, pasłuhami niań i hetak dalej — u Šviejcaryi takija rečy vielmi mocna kusajucca. Praŭda, jakaść pasłuh budzie vielmi dobraj.

Jość i dobryja naviny. Škoła i ŭniviersitety (kali vy, viadoma, tudy pastupicie) u Šviejcaryi praktyčna biaspłatnyja. Heta cudoŭna ŭ paraŭnańni z ZŠA, Vialikabrytanijaj.

«Dla śpiecyjalista-sieńjora adkaz nieadnaznačny»: ci varta pierajazdžać?

Žyćcio z dachodam u $3 — 3,5 tysiačy ŭ Biełarusi nie abaviazkova budzie prykmietna horš, čym z zarpłataj u 7 tysiač frankaŭ u Šviejcaryi. Kali jość dzieci, u Biełarusi ŭsia siamja lohka moža žyć na hetyja try tysiačy. U Šviejcaryi na svaje siem tysiač pry takim raskładzie pryjdziecca mocna napružycca. Heta ŭžo nie budzie bieskłapotnym žyćciom.

Što jašče źmianiłasia ŭ maim žyćci? Ja naradziŭsia ŭ biednaj siamji, dzie my, naturalna, na ŭsim ekanomili. Kali my stali pracavać prahramistami ŭ Biełarusi, užo nie było takoha, što my hladzieli na ceny praduktaŭ u kramie, my mahli bolš sabie dazvolić i dastatkova dobraj jakaści. Ciapier, u Šviejcaryi, my taksama kuplajem prosta toje, što nam treba, i dastatkova dobraj jakaści. Ja prykidvaju, patrebnaja ci mnie hetaja reč ci nie.

Tut nam padabajecca praktyčna ŭsio, i pierajazdžać my nikudy nie źbirajemsia. Ale pry hetym dla śpiecyjalista-sieńjora adkaz na pytańnie ab pierajeździe ź Biełarusi ŭ Šviejcaryju zusim nie vidavočny. I zaležyć ad mnohich faktaraŭ. Ja źjazdžaŭ ź Biełarusi tamu, što mnie prosta chaciełasia pryhod. Usie hetyja składanaści, źviazanyja ź pierajezdam, dla mianie byli nie składanaściami, a pryhodami.

Zaraz my znachodzimsia ŭ Šviejcaryi z pastajannym vidam na žycharstva, jaki atrymali paśla 5,5 hadoŭ pražyvańnia tut. Ci adčuvaju ja siabie svaim ci čužym? Ja b skazaŭ, što ŭ cełym svaim. Šviejcaryja davoli emihranckaja kraina. Nakolki ja viedaju, jana źjaŭlajecca krainaj z samym vialikim pracentam emihrantaŭ (pa dadzienych Jeŭrastata na 1 studzienia 2024 hoda Šviejcaryja zajmała treciaje miesca siarod krain ES i JEAST pa doli imihrantaŭ u ahulnaj kolkaści nasielnictva. Z pakazčykam u 31,2% jana sastupała tolki maleńkamu Lichtenštejnu (69,8%) i Luksiemburhu (51%) — Zaŭv. redakcyi). Prosta hetyja emihranty ŭ bolšaści z susiednich krain (Hiermanii, Francyi, Aŭstryi, Italii). I tamu ty nie bačyš, što heta emihranty.

Pavialičyć

Što mnie padabajecca ŭ Šviejcaryi bolš, čym u Biełarusi? U pieršuju čarhu, toj fakt, što tut niama takoha rassłajeńnia hramadstva. U Šviejcaryi zdajecca, byccam tut niama biednych ludziej. Navat minimalnaja zarpłata tut dastatkova dobraja, i ludzi ŭ lubych prafiesijach atrymlivajuć davoli šmat hrošaj. Skažam, dla kiroŭcy aŭtobusa nie prablema kupić sabie ajfon. Heta pryjemna — prosta znachodzicca siarod ludziej, u jakich usio dobra, jakija adzin adnaho pavažajuć i niejak bolš adzin pra adnaho kłapociacca. I kali jość davier adzin da adnaho ŭ hramadstvie, vielmi mnohija pytańni vyrašajucca našmat chutčej i efiektyŭniej.

U Biełarusi niejkaja radaść ad tvajoj asabistaj pieramohi azmročvałasia tym, što ty razumieŭ, što daloka nie ŭsie ŭ Biełarusi pracujuć u IT, i ty asabista nie možaš im usim dapamahčy.

Ja padtrymlivaju suviaź ź Biełaruśsiu, zaŭsiody vielmi rady viarnucca dadomu. Šviejcaryja — vielmi pryhožaja kraina, ale kali viartaješsia ŭ Biełaruś, niezvyčajna i pryjemna toje, što ty možaš hladzieć udaleč, na haryzont. Tamu što ŭ Šviejcaryi praktyčna zaŭsiody vočy ŭpirajucca ŭ jakija-niebudź hory.

Try parady ad Alaksandra biełaruskamu IT-śpiecyjalistu, jaki padumvaje ab pierajeździe ŭ Šviejcaryju:

1. Samaja važnaja parada. Kali vy pierajazdžajecie ź siamjoj, pierakanajciesia ŭ tym, što zarpłata, jakuju vam prapanujuć, zmoža pakryvać vydatki dla ŭsioj siamji niekalki hadoŭ. Całkam moža akazacca, što vašaj druhoj pałovie budzie składana znajści pracu, kali jana nie źjaŭlajecca IT-śpiecyjalistam. I navat IT-śpiecyjalistu znajści pracu moža być nialohka, bo kankurencyja varjackaja.
2. Budźcie hatovyja da taho, što Šviejcaryja — heta, pa sutnaści, vialikaja vioska. Vielmi pryhožaja, ale nie miehapolis. I niekamu moža nie chapać pačućcia vialikaha horada, takoj varušni.
3. Pierakanajciesia ŭ tym, što vam padychodzić paradak. Jość ludzi, jakim nie padabajecca, kali ŭsio vielmi dobra arhanizavana, usio stroha pa praviłach. Hetym ludziam u Šviejcaryi budzie ciažkavata, tamu što tut usio vielmi dakładna farmalizavana i prapisana. A voś ludziam, jakija lubiać paradak i arhanizavanaść, tut budzie dobra.

• 7
• 0
• 0
• 3
• 1
• 0
• 0
• 0