Kitajskaja abaronnaja kampanija Kestrel Defense prezientavała novy typ bajavoha ekzaškileta, pryznačanaha dla pavyšeńnia efiektyŭnaści vajskoŭcaŭ, što kirujuć dronami i vysokatechnałahičnymi sistemami na poli boju.
Jak paviedamlaje Defence blog, u kitajskich sacyjalnych sietkach źjavilisia pieršyja foty novaj raspracoŭki kitajskich vajskovych inžynieraŭ — ekzaškileta ź intehravanaj padtrymkaj dla zapusku i kiravańnia małymi bieśpiłotnymi latalnymi aparatami.
Sistema raspracavanaja śpiecyjalna dla apierataraŭ dronaŭ, artyleryjskich padraździaleńniaŭ i hrup raźviedki. Jana zabiaśpiečvaje dadatkovuju fizičnuju padtrymku bajca padčas praciahłych apieracyj, pavyšaje ciahavitaść i dazvalaje vytrymlivać bolšyja nahruzki.
Śpiecyjalnyja šarnirnyja apory dla ruk i noh dajuć mahčymaść daŭžejšy čas stajać na kukiškach abo kaleniach, što asabliva karysna pry dystancyjnym kiravańni dronami.
Na śpinie ekzaškileta raźmieščany modulny raniec, u jakim zachoŭvajecca krynica siłkavańnia i, napeŭna, abstalavańnie dla pieradačy danych. Na šlemie zamacavanaja sistema vizualizacyi: u jaje ŭvachodzić dysplej i vizar z dapoŭnienaj realnaściu. Hetyja srodki zabiaśpiečvajuć apierataru ahlad pola boju ŭ režymie realnaha času i intehrujuć videastrym ź bieśpiłotnika.
Lohki karkas kaściuma i ruchomyja złučeńni dazvalajuć sałdatu svabodna pierasoŭvacca, adnačasova niesučy dadatkovyja prybory ci zbroju. U infarmacyjnych materyjałach kampanii havorycca, što ekzaškilet moža pracavać u źviazcy z raźviedvalnymi dronami i kvadrakoptarami.
Dakładnyja techničnyja charaktarystyki novaj kitajskaj raspracoŭki pakul nie apublikavanyja. Kali jana sapraŭdy hatovaja da zapusku ŭ vytvorčaść, to heta aznačaje istotnuju navinku kitajskich vajskovych inžynieraŭ.
Jakija ekzaškilety dla vajskoŭcaŭ vypuskajucca ŭ śviecie
Apošnija hady rapracoŭkaj ekzaškiletaŭ dla patrebaŭ armii zajmajucca navukoŭcy šerahu krain. Adnak havaryć pra paśpiachovaść pakul nie davodzicca.
U ZŠA z 2013 hoda vialisia raboty nad prajektam TALOS (Tactical Assault Light Operator Suit) — bajavoha ekzaškileta dla śpiecnaza. Płanavałasia, što hety kaścium budzie abstalavany modulami suviazi, navihacyi, sistemaj manitorynhu stanu bajca, a taksama inavacyjnaj abaronaj — «vadkaj kieramičnaj branioj», u asnovie jakoj — nanačaścicy i vałokny z kieŭłaru.
U 2019 hodzie prajekt byŭ aficyjna zavieršany, bo pryznali, što realizavać jaho zhodna ź pieršapačatkovaj zadumaj niemahčyma pry sučasnym abo bližejšym uzroŭni technałohij. Tym nie mienš, raspracoŭka TALOS istotna paskoryła stvareńnie šerahu pieradavych kampanientaŭ, jakija ŭžo znajšli prymianieńnie ŭ inšych abaronnych prahramach.
Nie byli kamiercyjalizavanyja i inšyja raspracoŭki, pryznačanyja dla vajskoŭcaŭ, takija, jak ekzaškilety dla nižnich kancavin BLEEX ci ONIX, a taksama ekzaškilet z hidraŭličnym pryvadam, pryznačany, kab nasić hruzy HULC.
U Rasii viadziecca raspracoŭka sistemy bajavoj ekipiroŭki novaha pakaleńnia z aktyŭnym ekzaškiletam «Lehijanier». Jana pryznačanaja dla źnižeńnia nahruzki na aporna-ruchalny aparat vajskoŭca i palapšeńnia jaho fizičnaj vynoślivaści. Niekalki hadoŭ tamu pisali, što jana moža źjavicca ŭ hetym hodzie.
Jak adznačajuć ekśpierty, da hetaj pary jašče nivodzin ekzaškilet nie źjaviŭsia na poli boju. Pry ŭsich svaich pieravahach jany doraha kaštujuć, jany składanyja ŭ absłuhoŭvańni, patrabujuć śpiecyjalnaj padrychtoŭki i navučańnia apierataraŭ.
Da taho ž jany istotna abmiažoŭvajuć dziejańni bajca. Kali ŭ hramadzianskaj śfiery z hetym možna źmirycca i pajści na kampramisy, to na froncie, dzie važnaja kožnaja siekunda, heta niedapuščalna.
Ciapier čytajuć
Stała viadoma, dzie pracuje favarytka Łukašenki Uładlena Zajcava14
Kamientary