Tramp nakiravaŭ Nacyjanalnuju hvardyju ŭ Vašynhton i zapatrabavaŭ ad biazdomnych pakinuć horad

«Siońnia ŭ Vašynhtonie Dzień vyzvaleńnia, i my źbirajemsia viarnuć sabie našu stalicu, — zajaviŭ Tramp na pres-kanfierencyi ŭ Biełym domie. — Ja nakiroŭvaju Nacyjanalnuju hvardyju dla adnaŭleńnia pravaparadku i hramadskaj biaśpieki ŭ Vašynhtonie».

Jon taksama abviaściŭ, što ŭ miežach mieraŭ pa baraćbie z hvałtoŭnaj złačynnaściu ŭ amierykanskaj stalicy palicyja Vašynhtona pierachodzić pad fiederalny kantrol.

Pavodle słoŭ Trampa, jon choča zrabić horad «biaśpiečniejšym i pryhažejšym, čym kali-niebudź».

Raniej Tramp nazvaŭ mera Vašynhtona Miuryel Baŭzier «dobrym čałaviekam, jaki sprabuje niešta zrabić», ale adznačyŭ, što niahledziačy na jaje namahańni, uzrovień złačynnaści raście, a horad stanovicca «brudniejšym i mienš pryvabnym».

U lipieni Tramp padpisaŭ ukaz, jaki spraščaje aryšty biazdomnych, a na minułym tydni nakiravaŭ supracoŭnikaŭ fiederalnych pravaachoŭnych orhanaŭ na vulicy Vašynhtona.

«Biazdomnyja pavinny źjechać, NIEADKŁADNA, — napisaŭ Tramp u niadzielu ŭ svajoj sacyjalnaj sietcy Truth Social. — My damo vam miescy dla pražyvańnia, ale DALOKA ad stalicy. Złačyncy, vam źjazdžać nie treba. My pasadzim vas u turmu, dzie vam i miesca».

«Ciarpieć dalej my nie majem namieru. My chočam viarnuć sabie našu stalicu. Dziakuj za ŭvahu da hetaha pytańnia!» — prakamientavaŭ Tramp fatahrafii namiotaŭ biazdomnych i kuč śmiećcia.

Što mienavita źbirajecca rabić Tramp, pakul niezrazumieła. U svajoj pramovie ŭ 2022 hodzie jon prapanavaŭ pierasialić biazdomnych u «jakasnyja» namioty, ustalavanyja na tannych ziamielnych učastkach za miežami haradoŭ, zabiaśpiečyŭšy im dostup da prybiralniaŭ i miedycynskich pasłuh.

Tramp taksama razhladaje mahčymaść razhortvańnia da 1000 vajskoŭcaŭ Nacyjanalnaj hvardyi ŭ akruzie Kałumbija, i pavodle słoŭ adnaho pradstaŭnika abaronnaha viedamstva i dvuch amierykanskich čynoŭnikaŭ, moža zrabić adpaviednuju zajavu ŭžo ŭ paniadziełak, paviedamlaje NBC.

Pavodle słoŭ čynoŭnikaŭ, kolki mienavita vajskoŭcaŭ budzie razhornuta, pakul nie vyrašana. Najbolš vierahodna, što heta buduć hvardziejcy akruhi Kałumbija.

Usie, chto havaryŭ z NBC, adznačyli, što kančatkovaje rašeńnie jašče nie pryniata i zahady jašče nie padpisanyja. U piatnicu Tramp zahadaŭ fiederalnym ahienctvam, u tym liku palicyi parkaŭ ZŠA, Upraŭleńniu pa baraćbie z narkotykami, FBR i Słužbie maršałaŭ, nakiravać svaich supracoŭnikaŭ u Vašynhton, kab strymać «całkam niekantralujemy» ŭzrovień złačynnaści.

Pradstaŭnik Biełaha doma paviedamiŭ Nacyjanalnamu hramadskamu radyjo, što ŭ subotu viečaram na vulicach horada dziejničała da 450 fiederalnych ahientaŭ.

Heta rašeńnie było pryniata paśla taho, jak 19-hadovy były supracoŭnik Departamienta pa efiektyŭnaści ŭrada (Doge) padvierhsia napadu ŭ Vašynhtonie: mierkavana, u jaho chacieli ŭhnać aŭtamabil. Pa hetaj spravie ŭžo zatrymanyja dvoje 15-hadovych padletkaŭ.

Tramp vykazaŭsia z nahody hetaha incydentu ŭ sacyjalnych sietkach, apublikavaŭšy fatahrafiju skryvaŭlenaha chłopca. U svaim paviedamleńni prezident zajaviŭ, što hety incydent śviedčyć pra toje, što «złačynnaść u Vašynhtonie całkam vyjšła z-pad kantrolu». Tramp taksama prapanavaŭ pryciahvać da adkaznaści niepaŭnaletnich, jakija ździejśnili padobnyja złačynstvy, jak darosłych, «pačynajučy z 14 hadoŭ».

«Kali akruha Kałumbija nie voźmiecca za rozum, pryčym chutka, u nas nie zastaniecca inšaha vybaru, jak uziać horad pad fiederalny kantrol i kiravać im jak śled, i dać złačyncam zrazumieć, što im heta bolš nie syści z ruk», — havorycca ŭ paviedamleńni Trampa.

Mer Vašynhtona Baŭzier zajaviła: «My nie nazirajem usplosku złačynnaści».

U niadzielnym intervju telekanału MSNBC jana skazała: «Sapraŭdy, u 2023 hodzie my sutyknulisia z žachlivym usploskam złačynnaści, ale ciapier nie 2023 hod. Za apošnija dva hady my vydatkavali vielizarnyja srodki na baraćbu z hvałtoŭnaj złačynnaściu ŭ hetym horadzie i źnizili jaje da najnižejšaha ŭzroŭniu za apošnija 30 hadoŭ».

Jana raskrytykavała namieśnika kiraŭnika aparata Biełaha doma Styviena Milera za toje, što jon nazvaŭ stalicu ZŠA «horšaj za Bahdad». «Lubaje paraŭnańnie z krainaj, razadranaj vajnoj, źjaŭlajecca pierabolšańniem i chłuśnioj», — zajaviła Baŭzier.

Uzrovień zabojstvaŭ na dušu nasielnictva ŭ Vašynhtonie ŭ paraŭnańni ź inšymi haradami ZŠA zastajecca adnosna vysokim: sioleta zarehistravana 98 zabojstvaŭ. Uzrovień zabojstvaŭ u stalicy ZŠA raście ŭžo na praciahu dziesiacihodździa.

Adnak pavodle fiederalnych dadzienych za studzień, letaś u Vašynhtonie byŭ zafiksavany najnižejšy za 30 hadoŭ uzrovień hvałtoŭnych złačynstvaŭ, uklučajučy ŭhony aŭtamabilaŭ, napady i rabavańni.

Zhodna sa statystykaj staličnaha palicejskaha ŭpraŭleńnia, jakuju pryvodzić ABC News, za pieršyja siem miesiacaŭ hetaha hoda kolkaść hvałtoŭnych złačynstvaŭ u stalicy krainy skaraciłasia na 26% u paraŭnańni z anałahičnym pieryjadam 2024 hoda. Kolkaść ŭhonaŭ aŭtamabilaŭ u horadzie taksama źniziłasia na 38% u hetym hodzie ŭ paraŭnańni ź minułym hodam.

• 1
• 0
• 1
• 3
• 1
• 0
• 0
• 0