Ekanomika Biełarusi pierastała raści. Toje samaje ŭ Rasii i Łatvii. A voś Polšča i Litva rastuć stabilnieńka
Śviežyja źviestki Biełstata pakazvajuć, što biełaruskaja ekanomika roŭnieńka paŭtaraje rasijskija trendy.
Rost vałavaha ŭnutranaha praduktu Biełarusi ŭ studzieni-lipieni zapavoliŭsia da 1,3%. Ciažka skazać, nakolki aficyjnaj ekanamičnaj statystycy možna daviarać — Biełstat zasakreciŭ šmatlikija jaje siehmienty. Tym nie mienš, kidajecca ŭ vočy, što haspadarčyja pakazčyki Biełarusi paŭtarajuć rasijskija.
U Rasii ekanamičny rost u druhim kvartale hetaha hoda ŭpaŭ da 1,1%. Čakajecca, što hadavy pakazčyk rostu dasiahnie tam 1—1,5 pracenta. Adbyvajecca prahnazavanaje achaładžeńnie rasijskaj ekanomiki paśla dvuch hadoŭ rostu, jaki kampiensoŭvaŭ padzieńnie haspadarki ŭ vyniku sankcyj i vajny ŭ 2022-m.
Toj rost siłkavali hrošy, jakija dziaržava pampavała na vajennyja patreby. Hety pieryjad skončyŭsia.
Prablemy pieražyvaje i Łatvija. Jaje haspadarka doŭhija hady była ŭ značnaj stupieni zaviazanaja na rasijski rynak, tranzit u Rasiju i rasijskich turystaŭ.
Ciapier jana najbolš pakutuje ad nieabchodnaści razryvu z ahresiŭnym partnioram. VUP Łatvii ŭ pieršym kvartale hetaha hoda ŭpaŭ na 0,3%. A prahnoz dla Łatvii na ceły hod piesimistyčny: 0,5% rostu.
U toj ža čas ekanomiki Polščy i Litvy praciahvajuć dynamičny rost.
U Litvie jość užo źviestki pra druhi kvartał. VUP vyras na 3% u hadavoj prajekcyi. Miarkujecca, što takuju ličbu składzie i pa vynikach hoda.
U Polščy rost u pieršym kvartale składaŭ 3,2%. Hadavy prahnoz składaje 3,3%.
Na stolki ž, jak čakajecca, u 2025-m vyraście ekanomika Ukrainy, što zusim niakiepska dla vajujučaj krainy. Ukrainskaja haspadarka mahła b vyraści i bolš, ale čakajecca mienšy, čym u minułym hodzie, uradžaj zbožža.
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ10
Kamientary