Uitkaf pieradaŭ orden ad Pucina namieśnicy dyrektara CRU — jaje syn vajavaŭ za Rasiju i zahinuŭ
Majkł Hłos padarožničaŭ pa śviecie, pakul nie apynuŭsia ŭ Rasii. Tam jon pačaŭ zmahacca z «zachodniaj hiehiemonijaj» i apynuŭsia na froncie.
Śpiecpasłańnik Donalda Trampa Styŭ Uitkaf pieradaŭ rasijski orden siamji amierykanca Majkła Hłosa, jaki ŭ 2024 hodzie zahinuŭ na vajnie va Ukrainie.
Hłos byŭ synam namieśnicy dyrektara CRU pa ličbavych inavacyjach Džulijan Halina. Orden Mužnaści joj praz Uitkafa pieradaŭ Uładzimir Pucin. U ZŠA mnohija kamientatary nazvali heta dypłamatyčnym vypadam, uličvajučy vysokuju pasadu maci Hłosa ŭ śpiecsłužbach, piša CNN.
Sam Uitkaf bačyŭ situacyju inakš. Orden Mužnaści — heta ŭznaharoda, jakaja zvyčajna ŭručajecca rasijskim hramadzianam za «samaaddanyja akty mužnaści i dobleści padčas nadzvyčajnych situacyj, katastrof i vojnaŭ». Dla Uitkafa, jaki straciŭ syna z-za pieradaziroŭki apioidami, strata dziciaci — heta traŭmatyčny dośvied, jaki vychodzić za miežy hieapalityki. Pavodle słoŭ krynicy CNN, jon paličyŭ važnym uručyć uznaharodu Džulijan i jaje mužu. Navat niahledziačy na toje, što ich syn zahinuŭ, vajavaŭšy za Rasiju.
«Jana płakała razam z mužam. Dla Uitkafa hety momant «nie byŭ pra toje, za kaho jon vajavaŭ, a chutčej pra ŭspaminy pra našych dziaciej i hałoŭny pasył: «Davajcie skončym hetuju vajnu», — raskazaŭ vysokapastaŭleny čynoŭnik amierykanskaj administracyi.
CRU ŭ svajoj zajavie adznačyła, što smutkuje razam z namieśnicaj dyrektara i jaje siamjoj.
«Usia siamja CRU hłyboka smutkuje pra ich stratu. Džulijan i jaje muž paviedamili: «My abažali našaha syna i apłakvajem jaho stratu kožnaje imhnieńnie. My prosim pavažać naša prava na pryvatnaje žyćcio ŭ hety ciažki čas.
Džulijan Halina i jaje siamja pieražyli nievykaznuju asabistuju trahiedyju viasnoj 2024 hoda, kali jaje syn Majkł Hłos, jaki pakutavaŭ na psichičnyja prablemy, zahinuŭ, udzielničajučy ŭ kanflikcie va Ukrainie. Dla CRU śmierć Majkła — heta asabistaja sprava siamji Hłos, a nie pytańnie nacyjanalnaj biaśpieki», — zajaviŭ pradstaŭnik śpiecsłužby.
Uitkaf, jaki staŭ klučavym amierykanskim pierahavorščykam z Rasijaj, u hetym miesiacy jeździŭ u Maskvu na sustreču z Pucinym, a taksama ŭdzielničaŭ u samicie Trampa i Pucina na Alascy.
21-hadovy Hłos na radzimie byŭ ekaaktyvistam, zmahaŭsia za klimat i pravy žančyn. U 2023 hodzie jon kinuŭ kaledž i adpraviŭsia ŭ padarožža vakoł śvietu, jakoje skončyłasia tym, što jon padpisaŭ kantrakt ź Minabarony Rasii i zahinuŭ na froncie.
Ciapier čytajuć
Pamior narodny artyst Biełarusi Jarasłaŭ Jeŭdakimaŭ — vykanaŭca chitoŭ «Začarovanaja maja» i «Fantazior»15
Kamientary