Režym Łukašenki časova stanie mienš ahresiŭnym da susiedziaŭ, ale stratehična budzie imknucca da avałodańnia atamnaj zbrojaj

Skazać, što Łukašenku niajomka ad navin ź Irana, Kuby i Ukrainy — heta miakka skazać. Minsk da apošniaha i nie razumieŭ da kanca, jak interpretavać palityku administracyi Trampa, i vahaŭsia, jak padavać siabie ŭ novym raskładzie, kab nie pamylicca. Śledam za Maskvoju ŭ Minsku spadziavalisia, što Vašynhton usio ž achviaruje Ukrainaj dziela padziełu śvietu na śfiery ŭpłyvu, a Jeŭropa pachiśniecca. Łukašenka ŭciahnuŭsia ŭ doŭhija pieramovy z pradstaŭnikami Trampa.

Vašynhton z sajuźnikami, pakul Ukraina źviazvaje ruki Rasii, vybivaje adnaho za adnym sajuźnikaŭ Maskvy. Źmiena režymu ŭ Tehieranie nie tolki pakinie Maskvu biez płyni zbroi, ale i adreža Rasiju z poŭdnia. Ukraina ž i trymaje front, i staična vytrymała sprobu chaładamoru.

Minsk niervozna sočyć i za tym, što jeŭrapiejskija krainy intensiŭna ŭzbrojvajucca i ŭzmacniajuć siłavyja struktury. Jeŭrapiejcy byli vyklučna miralubnymi — da napadu na Ukrainu. Da 2022‑ha jany trymali siłavyja arsienały minimalnymi, dumali tolki pra ekanomiku i kulturu. Ale žyćcio prymusiła.

Ludzi schilnyja interpretavać dziejańni inšych u mieru ŭłasnaj razbeščanaści. Tak i łukašenkaŭski Minsk prymaŭ miralubnaść za słabaść. 

Łukašenku nie pahražaje los Madura i Chamieniei, a Astrašyckamu Haradku — amierykanskija rakietnyja ŭdary, tamu što Biełaruś ciapier — faktyčna častka Rasii. Amierykancy nie buduć zachodzić u častku Rasii.

Ale amierykancy zadali novyja praviły hulni ŭ tym liku i «dziaržavam siaredniaj mahutnaści». Kali amierykancy robiać tak, to čamu hetaksama nie mohuć rabić inšyja?

«Sproba fizičnaj likvidacyi lidaraŭ Irana navat biez farmalnaha abviaščeńnia vajny śviedčyć ab kančatkovym zamacavańni terarystyčnych praktyk u palitycy asobnych dziaržaŭ. U hetaj suviazi ŭźnikaje pytańnie: kali možna adnamu, čamu inšyja pavinny siabie abmiažoŭvać? I da čaho ŭ kančatkovym vyniku pryjdzie čałaviectva?» — pytajecca deputat Nacyjanalnaha schodu i rupar režymu Alaksandr Špakoŭski, faktyčna paŭtarajučy vysnovy, jakija źnienavidny jamu Juval Noj Charary zrabiŭ u lutym 2022 hoda.

Akazvajecca, heta moža pracavać u abodva baki, chto b moh padumać.

Minsk hadami ŭ intaresach Rasii hibrydna vajavaŭ suprać susiednich dziaržaŭ — prynamsi, paskudziŭ čym tolki moh. I voś u Minsku ŭśviadomili, što moža ž i adkaz prylacieć. Što Ukraina, Polšča i Litva, jakaja dahetul prosta adharodžvalisia ad škodnaha susieda, u niejki momant mohuć pačać adkazvać siłaj, hibrydnaj ci pramoj. Voś čamu ŭ Minsku padcisnuli chvasty.

Pavialičyć

Pa słovach Špakoŭskaha, vusnami jakoha havoryć siłavaja viarchoŭka, «ciapier tolki najaŭnaść jadziernaj zbroi i palityčnaja vola da jaje vykarystańnia moža być harantyjaj suvierenitetu i biaśpieki».

Minsk vidavočna prajaŭlaje ŭsio bolšuju cikavaść da ŭsiaho, što źviazana ź jadziernaj temaj. Jość padstavy mierkavać, što łukašenkaŭcy chacieli b mieć ułasnuju jadziernuju zbroju, a nie prosta bojehałoŭki, raźmieščanyja Rasijaj. Mikoła Statkievič u svaim niadaŭnim tryvožnym artykule, napisanym z hledzišča prafiesijnaha rakietčyka, pravilna stavić pytańnie: jadziernaja zbroja stvaraje strašennuju pahrozu dla Biełarusi.

Režym Alaksandra Łukašenki nie zmoža stvaryć atamnuju zbroju sam, nie zmoža i kupić dy dastavić abstalavańnie z Paŭnočnaj Karei biez zhody Rasii. Tolki Maskva moža dać Minsku atamnuju zbroju ŭ rasparadžeńnie — adkryta ci zrabiŭšy ŭražańnie, što biełarusy skrali jaje z kryčaŭskaha vajenhandlu. Ale ci realna takoje? Ja b nie vyklučaŭ takoj opcyi, bo heta dazvolić «paŭnočnakareizavać» Biełaruś dazvańnia, da čaho Maskva paśladoŭna šturchała łukašenkaŭcaŭ usie apošnija hady.

• 6
• 0
• 5
• 1
• 4
• 0
• 2
• 0