Jakija krainy lepš za ŭsio dajuć vizy biełarusam i kali pačynać afarmleńnie, kab paśpieć da letniaha adpačynku?

Francyja

Z 2 lutaha pačała pracavać novaja sistema zapisu na padaču na francuzskuju vizu.

Ciapier zapis na padaču dakumientaŭ pieradadzieny kampanii TLScontact. Zajaŭnikam treba zarehistravacca na sajcie apieratara, zapoŭnić ankietu, apłacić 8 jeŭra i čakać, kali na elektronnuju poštu pryjdzie data i čas padačy.

Ludzi, jakija ŭ pieršy dzień zapoŭnili zajavy, pačali atrymlivać zaprašeńni na padaču 9—10 lutaha. Sama data padačy ŭ ich — siaredzina sakavika.

U admysłovym čacie ŭ telehramie ludzi dzielacca nazirańniami, što ŭ siarednim Francyja vydaje paŭhadavyja vizy. Adna z karystalnic adspravazdačyłasia, što ŭ vieraśni minułaha hoda padavałasia z mužam na vizu praz turfirmu, i abodva atrymali paŭhadavyja vizy ŭ čystyja pašparty.

Pry hetym vizavaja ekśpiertka Anastasija Łysakoŭskaja ŭ kamientary «Našaj Nivie» adznačyła, što apošnim časam Francyja stała čaściej vydavać adnarazovyja vizy.

Admovy taksama sustrakajucca, ale ŭsio adno Francyja zastajecca dobrym varyjantam dla atrymańnia turystyčnaj vizy, u tym liku šmatrazovaj terminam da 6 miesiacaŭ i navat na hod.

Pavialičyć

Nie varta adkładvać

Ukazvać daty płanavanaha pieršaha ŭjezdu ŭ Šenhien možna nie paźniej čym za šeść miesiacaŭ ad daty zapaŭnieńnia, tamu navat tyja, chto płanuje pajezdku na kaniec leta, užo mohuć pačynać zajmacca atrymańniem vizy.

Vizavaja ekśpiertka Anastasija Łysakoŭskaja naohuł raić nie adkładać hety praces: «Lepš za ŭsio pačynać rabić vizu da siaredziny krasavika, bo paśla paśpieć atrymać vizu pad letni adpačynak stanie značna składaniej».

Sam fakt źjaŭleńnia takoj mahčymaści Łysakoŭskaja nazyvaje pazityŭnym krokam, choć i adznačaje, što pracuje heta ŭsio davoli pavolna. Aproč Francyi, ekśpiertka nazyvaje jašče niekalki krain, u jakich biełarusy mohuć atrymać turystyčnuju vizu.

Dzie jašče možna atrymać turystyčny Šenhien?

«Hrecyja hetaj zimoj niadrenna adkryvała vizy. Kali raniej u zimovy pieryjad mahło być 7—8 admoŭ na 10 zajaŭ, to ciapier było pa 2—3 admovy na 10 zajaŭ», — kaža ekśpiertka pra Hrecyju, na padaču vizy ŭ jakuju jašče možna adnosna prosta zapisacca. Ale Hrecyja ŭ asnoŭnym daje vizy adnarazovyja pad pajezdku abo terminam na 1 miesiac.

Pavialičyć

Ispaniju Łysakoŭskaja taksama nazyvaje krainaj, jakaja dobra vydaje vizy biełarusam, ale adznačaje, što zapisacca na padaču tudy składaniej, čym u Hrecyju: «Zajavy razhladajuć za 2—3 tydni, ale padavacca ŭsio adno možna tolki za 45 dzion da pajezdki».

Hiermanija, ź jaje słoŭ, zastajecca krainaj, jakaja dobra daje vizy, ale termin čakańnia słota — 1 hod, tamu niamieckaja viza — heta nie pra adpačynak u 2026 hodzie.

Italija — dziasiatki tysiač ludziej u čarzie i novy vizavy centr

«Italija ciapier aktyŭna apracoŭvaje nazapašanuju žyvuju čarhu. Ciapier vystavili słoty ŭ dyjapazonie 28—32 tysiač numaroŭ. U pieršyja dni sakavika jany płanujuć pravieści ekśpierymient pa «žyvoj čarzie». U vyznačanyja dni treba pryjści biez papiaredniaha zapisu i słotaŭ, prosta pastajać u čarzie na hanku», — tłumačyć ekśpiertka.

Pavialičyć

Što tyčycca Italii, Łysakoŭskaja adznačaje, što z 1 lipienia tam źmienicca vizavy centr, tamu niama harantyi, što čarha, u jakoj ciapier kala 40 tysiač čałaviek, zachavajecca pry źmienie apieratara.

«Z červienia italjanskija vizy buduć rabicca praz VFS Global. Ludziej u žyvuju čarhu praciahvajuć zapisvać, ale što budzie ź joj paśla 1 červienia — nieviadoma, tamu pa Italii ciapier adbyvajecca ŭsplosk aktyŭnaści z žyvoj čarhoj, bo ludzi chočuć paśpieć padać dakumienty da źmieny vizavaha centra», — tłumačyć ekśpiertka.

Jašče adna kraina — heta Vienhryja. Sa słoŭ Łysakoŭskaj, zapisacca tudy davoli składana, dy i ŭ tur treba budzie jechać abaviazkova. «U pusty pašpart Vienhryja, jak praviła, stavić adnarazovuju vizu pad pajezdku. Kali ŭ zajaŭnika ŭžo jość vizavaja historyja, to moža być šmatrazovaja viza na paŭhoda-hod. Jašče jość mahčymaść adkryvać vizu praz Bałharyju, ale ŭ tur taksama treba budzie abaviazkova jechać, inakš vizu anulujuć».

Polšča

Aproč vyšejpieraličanych krain, jość varyjant padavać dakumienty na polskuju turystyčnuju vizu, ale z zapisam na padaču pa-raniejšamu ŭsio vielmi składana. Asabliva ŭ Minsku, a pamahatyja biaruć za zapis pa 500—700 rubloŭ.

«Ludzi, u jakich raniej byli doŭhaterminovyja polskija vizy, atrymlivali 5‑hadovyja turystyčnyja vizy. Prynamsi, tak adbyvajecca pa Hrodzienskaj akruzie», — dzielicca nazirańniami ekśpiertka. Taksama, ź jaje słoŭ, nazirajecca «praśviatleńnie» i ŭ tych kiejsach, dzie ludzi raniej mieli niekalki karotkaterminovych turystyčnych viz.

Pavialičyć

«Taksama sustrakajucca kiejsy, kali Polšča vydavała šmatrazovyja vizy terminam da 5 hadoŭ. Ale heta vielmi randomnyja vypadki, i źjaŭleńnia niejkaha kanviejera pa vydačy šmathadovych viz pakul nie nazirajecca.

Prynamsi, pakul dakładna zrazumieć łohiku, čamu niechta atrymlivaje vizu pad pajezdku, a inšy — šmathadovuju, nie atrymlivajecca, ale pazityŭnyja zruchi ŭ bok adlihi pa Polščy jość».

Tamu Łysakoŭskaja ličyć, što jość sens padavać dakumienty na polskuju vizu ŭ nadziei na toje, što pry paŭtornaj padačy atrymajecca atrymać vizu na vialiki termin.

• 2
• 0
• 2
• 0
• 0
• 3
• 0
• 0