Rasijskija vajskoŭcy stralali adzin u adnaho dziela vypłat i ŭznaharod za ranieńni
Siužety pra ich «bajavyja podźvihi» vypuskaŭ «Pieršy kanał».
SK RF zaviaršyŭ rasśledavańnie pieršych kryminalnych spraŭ ab machinacyjach z ranieńniami ŭ 83-j asobnaj hvardziejskaj desantna-šturmavoj bryhadzie, piša «Ahienctva».
Usiaho pad padazreńniem 35 čałaviek. Adzin z padazravanych — padpałkoŭnik Kanstancin Frałoŭ (pazyŭny «Pałač») — pryznaŭsia ŭ tym, što atrymaŭ čatyry ranieńni nie ŭ bai, a ad sasłužyŭcaŭ dziela vypłat u 3 młn rubloŭ (kala 37 tysiač dalaraŭ).
Usio, što jon kazaŭ da hetaha, u tym liku ŭ ŚMI, akazałasia niapraŭdaj. Jak vyśvietliła «Ahienctva», siužet pra jaho vyjšaŭ na «Pieršym kanale» ŭ Dzień abaroncy Ajčyny.
Pavodle źviestak «Kommiersanta», načalnik hrupy śpiecyjalnych apieracyj 83-j bryhady Kanstancin Frałoŭ byŭ aryštavany ŭ červieni 2024 hoda, praź niekalki dzion uziali i jaho kamandzira, pałkoŭnika Arcioma Haradziłava. Haradziłavu inkryminujuć machlarstva ŭ asabliva bujnym pamiery, Frałovu — jašče i daču chabaru, niezakonny abarot zbroi, bojeprypasaŭ i vybuchovych pryład. Abodva pryznali svaju vinu.
Śledstva taksama ŭstanaviła 35 udzielnikaŭ machinacyj, jakija stralali adzin u adnaho. Im za ranieńni i traŭmy ź biudžetu vypłacili bolš za 200 młn rubloŭ (kala 2,5 młn dalaraŭ), uručali ordeny Mužnaści i miedali «Za advahu».
Kankretna Frałoŭ atrymaŭ čatyry ranieńni, jon sam nasiŭ znaki za dva lohkija i piać ciažkich ranieńniaŭ. Dziakujučy pakazańniam i ekśpiertyzam vyśvietliłasia, što ŭsie ranieńni byli atrymany nie ŭ bajavoj abstanoŭcy.
Vajskoviec pryznaŭsia, što pa jaho ž prośbie ŭ jaho stralali sasłužyŭcy, jakija celilisia tak, kab nie začapić žyćciova važnyja orhany. Čatyry ordeny Mužnaści i dva miedali «Za advahu» byli ŭručany jamu niezakonna, miarkuje śledstva.
Śledstva ličyć siužety pra Frałova ŭ fiederalnych ŚMI nie adpaviadajuć rečaisnaści. Siarod ich videa pra toje, što jon, budučy baćkam troch dačok, udačaryŭ nibyta vyratavanuju z-pad abstrełu dziaŭčynku.
Sumnieńni vyklikali publikacyi ŚMI pra toje, što Frałoŭ kamandavaŭ samaj vynikovaj hrupaj snajpieraŭ na tak zvanaj «SVA». Fejkavym nazvali i siužet pra toje, jak Frałova z-pad abstrełu vyratavaŭ jaho sasłužyviec-pałkoŭnik.
«Ahienctva» znajšło tyja fejkavyja siužety. «Pieršy kanał» 23 lutaha 2024 hoda pakazaŭ 4-chvilinnaje videa pra «ŭnikalnuju hrupu snajpieraŭ». Hrupaj, jak havaryłasia ŭ siužecie, kiravaŭ «adzin z samych vynikovych snajpieraŭ u zonie SVA» z pazyŭnym «Pałač».
Karespandent raspavioŭ, što praz aficerski honar vajskoviec paśla siomaha ranieńnia admoviŭsia ad reabilitacyi i viarnuŭsia ŭ stroj.
Mienavita ŭ siužecie «Pieršaha kanała» «Pałač» raspavioŭ, jak nibyta vynies z-pad abstrełu paranienuju dziaŭčynku, a zatym udačaryŭ jaje. Pavodle źviestak «Pieršaha kanała», bajcy hrupy ŭvieś čas dapamahajuć paranienym dzieciam i sirotam, vydatkoŭvajučy na heta bolšuju častku svajho zabieśpiačeńnia.
U siužecie «Pieršaha kanała» vajenny byŭ u šapcy i bałakłavie. Ale servis raspaznańnia tvaraŭ pa adkrytaj častcy tvaru vyznačyŭ, što ź vierahodnaściu da 98% na videa byŭ mienavita Kanstancin Frałoŭ.
«Ahienctva» vyśvietliła, što 38-hadovy Kanstancin Frałoŭ — syn Aleha Frałova, byłoha namieśnika kiraŭnika «Raskosmasa», jakoha taksama ciapier sudziać za machlarstva na dziaržkantraktach.
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ10
Kamientary