Ursuła fon der Lajen na biełaruskaj miažy: Kali vypraboŭvajuć Litvu, vypraboŭvajuć usiu Jeŭropu, my dapamožam

«Siońnia Jeŭropa staić razam ź Litvoj jak z prymiežnaj dziaržavaj: vy sutykajeciesia z Rasijaj u Kalininhradzie, vy sutykajeciesia ź Biełaruśsiu na miažy, vy pieražyvajecie hieapalityčnyja i ekanamičnyja vykliki, sutykajeciesia z pastajannymi vajennymi i hibrydnymi pahrozami», — skazała U. fon der Lajen u paniadziełak na pres‑kanfierencyi ŭ Miednikach.

«Ja čulia što ŭ minułym miesiacy dva drony pierasiekli litoŭska‑biełaruskuju miažu. Dazvolcie vas zapeŭnić: kali vypraboŭvajuć Litvu, vypraboŭvajuć i ŭsiu Jeŭropu. My razam z vami ŭsimi mahčymymi sposabami», — padkreśliła jana.

Hłava JEK paŭtaryła paviedamleńnie, zroblenaje ŭ niadzielu ŭ Polščy, što ŭ novym doŭhaterminovym biudžecie Jeŭrapiejskaha sajuza (ES) dla dziaržaŭ‑členaŭ, jakija miažujuć z Rasijaj i Biełaruśsiu, budzie praduhledžana dadatkovaje finansavańnie.

«U doŭhaterminovaj pierśpiektyvie jeŭrapiejskaha biudžetu my prapanavali ŭtraja pavialičyć raschody na mihracyju i achovu miežaŭ — na hetym robicca surjozny akcent. My chočam, kab krainy, što niepasredna miažujuć z Rasijaj i Biełaruśsiu, atrymali dadatkovyja srodki», — zajaviła U. fon der Lajen, padkreśliŭšy, što achova jeŭrapiejskich miežaŭ — heta adkaznaść usich krain ES.

Choć budučy biudžet ES i vyłučeńnie ŭ im srodkaŭ dla prymiežnych dziaržaŭ zastajucca pradmietam pieramoŭ, staršynia JEK adznačyła, što Sajuz užo istotna dapamoh Litvie ŭ achovie miažy. U. fon der Lajen nahadała, što ES udzielničaŭ u finansavańni sistem nazirańnia na miažy, vydzialaŭ srodki dla realizacyi vizyčnaj i mihracyjnaj palityki. Tym nie mienš, palityk pryznała, što dziejničać treba i zaraz.

U svaju čarhu prezident Hitanas Naŭsieda zajaviŭ, što vizit staršyni Jeŭrakamisii ŭ Litvu — heta jasny sihnał jeŭrapiejskaj salidarnaści, jaki demanstruje rašučaść usiaho Sajuza ŭmacoŭvać źniešnija miežy i praduchilać mahčymyja pahrozy.

«Vašaja prysutnaść tut — heta mocny sihnał jeŭrapiejskaj salidarnaści. Heta pakazvaje, što biaśpieka Litvy — heta biaśpieka ŭsiaho Jeŭrapiejskaha sajuza (…). Siońniašniaja sustreča demanstruje našu ahulnuju rašučaść abaranić uschodniuju miažu ES i pavysić ustojlivaść usioj Jeŭropy», — źviarnuŭsia prezident da staršyni JEK na pres‑kanfierencyi.

«Litva razam z Łatvijaj, Estonijaj, Finlandyjaj i Polščaj znachodzicca ŭ avanhardzie hetych namahańniaŭ. Naša zadača pa praduchileńni pahroz, umacavańni ŭstojlivaści i abaronie źniešnich miežaŭ dvojnaja: jana patrabuje jak terminovych, tak i doŭhaterminovych dziejańniaŭ», — skazaŭ H. Nausieda.

Prezident taksama źviarnuŭ uvahu na dva zafiksavanyja hetym letam vypadki, kali ŭ Litvu z boku Biełarusi ŭlacieli bieśpiłotnyja latalnyja aparaty. Pa jaho słovach, u budučyni, kab zabiaśpiečyć biaśpieku nasielnictva, Litva pavinna być zdolnaj nie tolki svoječasova vyjaŭlać takija bieśpiłotniki, ale i źbivać ich.

«Litva razumieje, što sučasnaja situacyja vielmi niebiaśpiečnaja, vielmi dalikatnaja, i my pavinny mieć mahčymaść vyjaŭlać nieviadomyja bieśpiłotnyja latalnyja aparaty, jakija čas ad času pierasiakajuć našu miažu, i pry nieabchodnaści źbivać ich», — padkreśliŭ H. Naŭsieda.

«Heta — harantyja biaśpieki našych hramadzian, i my stavimsia da hetaha vielmi surjozna», — dadaŭ jon.

• 0
• 0
• 0
• 0
• 0
• 0
• 0
• 0