Na čempijanacie śvietu pa lohkaj atletycy Kryścina Cimanoŭskaja pabiažyć tolki ŭ adnoj dyscyplinie
U minułuju subotu ŭ stalicy Japonii startavaŭ čempijanat śvietu pa lohkaj atletycy. U Tokia viarnułasia biełaruska, jakaja zaraz vystupaje za zbornuju Polščy.
Čatyry hady tamu Kryścina pakinuła Alimpijadu ŭ Tokia. U žniŭni 2021-ha padčas Alimpijskich hulniaŭ u Japonii aficyjnaja biełaruskaja delehacyja sprabavała prymusam vyvieźci spryntarku paśla taho, jak jana publična paskardziłasia na toje, što jaje biez zhody ŭnieśli ŭ skład niaprofilnaj estafiety 4 pa 400 mietraŭ. U aeraporcie Cimanoŭskaja admoviłasia siadać u samalot, paprasiła abarony ŭ japonskaj palicyi i atrymała humanitarnuju vizu ŭ ambasadzie Polščy, nahadvaje «Trybuna».
Sioleta na čempijanacie śvietu Cimanoŭskaja maje vystupić tolki ŭ žanočaj estafiecie 4×100 m. Razam ź joj u kamandnaj zajaŭcy fihurujuć Eva Svaboda, Mahdalena Niamčuk, Alaksandra Pijatroŭskaja, Mahdalena Stefanovič, Marlena Hranašeŭskaja (ź ich na darožku vyjduć tolki čaćviora, kali nie zdarycca jakoha fors-mažora).
Papiarednija zabiehi projduć 20 vieraśnia, finał ža pryznačany na 21-je.
A čamu Cimanoŭskaja vystupaje tolki ŭ estafiecie?
Tut usio prosta. Kvalifikacyjnyja normy na čempijanat śvietu — 11,07 na 100 m i 22,57 na 200 m. Cimanoŭskaja ich nie vykanała. Pa suśvietnym rejtynhu jana taksama nie prajšła (152-ja na 100 m i 112-ja na 200 m). Polskaja fiederacyja lohkaj atletyki ŭziała spartsmienku vyklučna pad estafietu (indyvidualna ŭ žanočych 100 m Polšču pradstaŭlaje tolki Svaboda).
U siezonie-2025 Cimanoŭskaja pakazała na stomietroŭcy najlepšy čas padčas čempijanatu Polščy. 11,38 dazvolili ŭziać tytuł — ale nie adabracca na ČS u indyvidualnuju prahramu. Spartoŭka musiła biehčy i ŭ finale na 200 m, ale źniałasia praz drobnuju traŭmu. U hetym siezona jaje najlepšy čas na takoj dystancyi składaje 23,20.
Biełaruskija i rasijskija kamandy na čempijanat śvietu nie dapuščanyja.
Kamientary