Možna budzie pabačyć praz teleskop — 24 krasavika ŭ Minsku projdzie śviata, prymierkavanaje da Mižnarodnaha dnia astranomii.
24 krasavika ŭ Centralnym dziciačym parku imia Horkaha projdzie śviata, prymierkavanaje da Mižnarodnaha dnia astranomii.
Arhanizataram mierapryjemstva vystupili absiervatoryja Biełdziaržuniviersiteta, łabaratoryja pryrodaznaŭčych viedaŭ «Płanietaryj» Minskaha dziaržaŭnaha Pałaca dziaciej i moładzi, staličny astrakłub i kłub amataraŭ astranomii.
Jak paviedamiŭ BiełaPAN dyrektar absiervatoryi BDU Alhierd Kuźniečyk, z 17.00 da 22.00 na nabiarežnaj raki Śvisłač kala pomnika Horkamu budzie ŭstanoŭlena kala 20 teleskopaŭ roznych madelaŭ, z dapamohaj jakich kožny achvotny zmoža ŭbačyć Sonca, Vienieru, Mars i inšyja niabiesnyja cieły. Akramia hetaha, u parku budzie razhornutaja vystava fotazdymkaŭ kaśmičnych abjektaŭ i źjaŭ. Astranomy padčas śviata pasprabujuć adkazać na ŭsie pytańni haradžan. Taksama ŭ płanietaryi parku Horkaha płanujecca papularnaja lekcyja ab zornym niebie.
Pavodle słoŭ dyrektara absiervatoryi, śviata pravodzicca ŭ Minsku druhi raz. Letaś u parku było ŭstanoŭlena 14 teleskopaŭ, i čarha da ich uviečary dasiahnuła 30 čałaviek. «Pytańni, jakija zadajuć naviedniki śviata, samyja roznyja — pačynajučy ad taho, ci nie namalavanyja kolcy Saturna, i zakančvajučy tym, dzie možna nabyć teleskop», — raskazaŭ Kuźniečyk.
Mižnarodny dzień astranomii źjaŭlajecca pierachodnym i adznačajecca pryblizna z 20 krasavika da pačatku maja — u subotu, kali Miesiac maje fazu pablizu pieršaj čverci. U 2009 hodzie, jaki byŭ abjaŭleny Mižnarodnym astranamičnym sajuzam i JUNIESKA Mižnarodnym hodam astranomii, hetaja data trapiła na 2 maja.
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary