U Minsku 86‑hadovaja kiroŭca na «Zaparožcy» źbiła 89‑hadovuju žančynu na pierachodzie i pajechała. Zaraz jaje buduć sudzić
Na razhlad u sud nakiravana kryminalnaja sprava ŭ adnosinach da 86‑hadovaj žančyny, jakaja źbiła piešachoda i źjechała ź miesca DTZ, raskazali Minsk-Navinam u prakuratury Minska.
Zdareńnie adbyłosia 2 lipienia kala 20:50, žančyna na «Zaparožcy» jechała pa druhoj pałasie prajezdžaj častki vuł. Zacharava ŭ napramku vuł. Andrejeŭskaj.
Pry vybary chutkaści piensijanierka nie ŭličyła intensiŭnaść ruchu i darožnyja ŭmovy, i nie ŭstupiła darohu 89‑hadovaj žančynie, jakaja pierachodziła darohu pa «ziebry», i ździejśniła najezd.
Paśla kiroŭca źjechała ź miesca zdareńnia, pakinuŭšy paciarpiełuju biez dapamohi. Chutkuju miedycynskuju dapamohu toj vyklikali vidavočcy.
Vyśvietliłasia, što piešachodu byli pryčynieny traŭmy, jakija, zhodna z zaklučeńniem ekśpierta, adnosiacca da katehoryi mienš ciažkich cialesnych paškodžańniaŭ.
U adnosinach da vinavataj avaryi raspačali kryminalnuju spravu adrazu pa dvuch artykułach Kryminalnaha kodeksa. Viadoma, što jaje aŭtamabil znachodziŭsia ŭ technična spraŭnym stanie, staž piensijanierki — z 1991 hoda, adnak u jaje adsutničała miedycynskaja daviedka ab stanie zdaroŭja — termin jaje dziejańnia skončyŭsia ŭ 2019 hodzie.
U chodzie śledstva žančyna raspaviała, što bačyła paciarpiełuju na piešachodnym pierachodzie, ale ličyła, što paśpieje prajechać. Usłychaŭšy huk škła, abvinavačanaja paličyła, što začapiła pravaj piaredniaj častkaj aŭtamabila tolki sietku, jakaja była ŭ rukach u paciarpiełaj. Paśla jana pryjechała da svajho domu, zaparkavała ZAZ, a nieŭzabavie joj patelefanavali ź milicyi.
— Abvinavačanaja maje vyšejšuju adukacyju, źjaŭlajecca invalidam III hrupy pa ahulnym zachvorvańni, raniej da kryminalnaj adkaznaści nie pryciahvałasia, — prakamientavała starejšy prakuror adździeła pa nahladzie za vykanańniem zakanadaŭstva ŭpraŭleńnia Śledčaha kamiteta Biełarusi pa h. Minsku prakuratury h. Minska Maryna Dalinkievič.
— Joj vystaŭlena abvinavačvańnie ŭ ździajśnieńni złačynstvaŭ, praduhledžanych č. 1 art. 317 («Parušeńnie pravił darožnaha ruchu abo ekspłuatacyi transpartnych srodkaŭ») i č. 3 art. 159 KK («Pakidańnie ŭ niebiaśpiecy»). Vinu hramadzianka całkam pryznała, u ździejśnienym raskajałasia. U adnosinach da jaje ŭžyta miera strymańnia ŭ vyhladzie zabarony kiravańnia transpartnym srodkam.
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary