Tramp skazaŭ Zialenskamu, što pakul nie maje namieru pastaŭlać Kijevu rakiety «Tamahaŭk»
U Biełym domie skončyłasia sustreča Donalda Trampa i Uładzimira Zialenskaha. Prezident ZŠA nastojvaje na mirnym vyrašeńni kanfliktu. Pra što jašče havaryłasia ŭ Vašynhtonie?
ZŠA zaraz nie płanujuć pastaŭlać kryłatyja rakiety «Tamahaŭk» Kijevu, paviedamlaje vydańnie Axios sa spasyłkaj na krynicy.
«Prezident Tramp zajaviŭ prezidentu Ukrainy padčas napružanaj sustrečy ŭ piatnicu, što jon nie maje namieru pastaŭlać dalnabojnyja rakiety «Tamahaŭk», prynamsi zaraz, paviedamili Axios dźvie krynicy, jakija viedali pra detali sustrečy», — havorycca ŭ materyjale.
Pavodle słoŭ krynic vydańnia, Tramp daŭ zrazumieć, što jaho pryjarytetam ciapier źjaŭlajecca dypłamatyja i pieramirje, i jon ličyć, što pastaŭki «Tamahaŭkaŭ» mohuć padarvać hetyja namahańni.
Uładzimir Zialenski ŭ svaich sacsietkach koratka raspavioŭ pra vyniki pieramovaŭ z Donaldam Trampam, a taksama padzialiŭsia fotazdymkami ź Biełaha doma, piša Bi-bi-si.
«Bolš za dźvie hadziny pradmietnaj razmovy z prezidentam ZŠA Donaldam Trampam, jaki moža realna nablizić zaviaršeńnie hetaj vajny. Abmierkavali ŭsie klučavyja pytańni: našy pazicyi na poli boju, dalnabojnaść i SPA, i, viadoma, dypłamatyčnyja pierśpiektyvy, — napisaŭ jon u telehramie. — Rasija pavinna spynić ahresiju, jakuju sama pačała i śviadoma zaciahvaje. Raźličvajem na cisk ZŠA».
Ukrainski lidar taksama raspavioŭ pra razmovu ź jeŭrapiejskimi partniorami — lidarami Brytanii, Hiermanii, Italii, Finlandyi, Narviehii, Polščy, a taksama kiraŭnikami Jeŭrasajuza i NATO.
«Raspavioŭ pra razmovu z prezidentam ZŠA Donaldam Trampam. Abmierkavali mnohija važnyja detali. Samaja hałoŭnaja reč ciapier — heta abaranić bolš žyćciaŭ, zabiaśpiečyć biaśpieku dla Ukrainy i ŭzmacnić usich nas u Jeŭropie. Mienavita dziela hetaha pracujem. […] Dziakuj za razmovu, usiu padtrymku i hatoŭnaść być z Ukrainaj».
Karespandent Bi-bi-si ŭ Vašynhtonie Tom Bejtman spytaŭ Zialenskaha, ci daŭ jamu Tramp niejkija dadatkovyja harantyi biaśpieki ZŠA dla Ukrainy.
Zialenski znoŭ zajaviŭ, što takija harantyi nadzvyčaj važnyja dla Ukrainy, ale admoviŭsia paviedamić, ci atrymaŭ jon niejkija novyja padrabiaznaści ad Trampa.
«Nam patrebny nadziejnyja harantyi biaśpieki, — skazaŭ Zialenski. — Naša kraina baicca, što kali my damožamsia spynieńnia ahniu, nam spatrebiacca harantyi biaśpieki ad ZŠA, kab Pucin nie viarnuŭsia z ahresijaj».
Paśla razmovy z prezidentam ZŠA Zialenskaha spytali, čaho, na jaho dumku, Pucin choča dasiahnuć ad sustrečy z Trampam u Budapiešcie, i ci nie imkniecca rasijski prezident prosta paciahnuć čas.
«Nie viedaju», — adkazaŭ Zialenski, ale dadaŭ, što pierśpiektyva źjaŭleńnia ŭ Ukrainy «Tamahaŭkaŭ» vyklikaje ŭ Rasii «strach, tamu što heta mahutnaja zbroja».
«Jany viedajuć, jakaja ŭ nas zbroja, i razumiejuć, što ŭ spałučeńni z «Tamahaŭkami»… jany razumiejuć, na što my zdolnyja», — skazaŭ prezident Ukrainy.
Zialenskaha spytali, ci pakidaje jon Vašynhton z bolšym aptymizmam nakont taho, što Ukraina kali-niebudź atrymaje «Tamahaŭki».
«Ja realist», — adkazaŭ jon.
Donald Tramp, jaki ŭžo pakinuŭ Bieły dom, napisaŭ:
«Sustreča z prezidentam Ukrainy Uładzimiram Zialenskim była vielmi cikavaj i sardečnaj. Ale ja skazaŭ jamu — jak raniej nastojliva raiŭ i prezidentu Pucinu, — što para spynić zabojstvy i zaklučyć ŹDZIEŁKU! Dastatkova kryvi pralita na miežach, praviedzienych vajnoj i advahaj. Niachaj spyniacca tam, dzie stajać. Niachaj abodva abvieściać pra pieramohu — a historyja rassudzić!
Bolš nijakich strełaŭ, nijakaj śmierci, nijakich kałasalnych i niepasilnych vydatkaŭ. Hetaja vajna nikoli b nie pačałasia, kali b ja byŭ prezidentam. Tysiačy ludziej zabivajuć kožny tydzień — CHOPIĆ! Viartajciesia dadomu da svaich siemjaŭ ź miram!»
Post Donalda Trampa daje bolš hleby dla analizu, čym papiarednija zajavy, piša Bi-bi-si: Ź jaho my bačym, što Tramp viarnuŭsia da svajoj pieršapačatkovaj pazicyi, zhodna ź jakoj u rasijska-ŭkrainskim kanflikcie pavinna nastupić spynieńnie bajavych dziejańniaŭ na ciapierašniaj linii sudakranańnia.
Pieršapačatkova jon prasoŭvaŭ mienavita hetuju ideju, i Ukraina była zhodnaja, ale na heta nie zhadziŭsia Uładzimir Pucin, jaki chacieŭ spačatku napisać vialikaje mirnaje pahadnieńnie, — a pakul jano pišacca, bajavyja dziejańni mohuć praciahvacca.
U niejki momant Tramp zhadziŭsia z Pucinym, ale ciapier pazicyja amierykanskaha prezidenta znoŭ źmianiłasia.
Vierahodna, mienavita hetuju pazicyju jon budzie abmiarkoŭvać z Pucinym u Budapiešcie. I kali Pucin nie zhadzicca na hety varyjant, to razmovy pra «Tamahaŭki» mohuć pierajści na inšy ŭzrovień. Zaraz Tramp nie choča davać «Tamahaŭki» ŭ nadziei, što Pucin zhadzicca.
Kamientujučy heta, Uładzimir Zialenski skazaŭ, što mienavita ŭ hetym i zaklučajecca jaho zadača — spynić bajavyja dziejańni. Hetaje pytańnie Uładzimir Zialenski nazvaŭ samym adčuvalnym zaraz.
«Rasijanie sapraŭdy chacieli b akupavać usiu terytoryju. Ale pierad spynieńniem ahniu rabić niejkija ŭzhadnieńni pa terytoryjach i inšych aśpiektach… Ja dumaju, važna zrabić pieršy krok — spynieńnie ahniu», — adznačyŭ prezident Ukrainy.
Zialenski padkreślivaje, što hetaje pytańnie dakładna budzie ŭzdymacca na pieramovach z Rasijaj, kali takija adbuducca.
Kamientary