U samym centry Minska prapanavali kvatery ŭ hatovaj novabudoŭli siarod staroj zabudovy. A što z cenami?
Heta novabudoŭla schavałasia siarod brežnievak i chruščovak u rajonie Załataja Horka niedaloka ad płoščy Pieramohi. Jana — toj samy prykład kropkavaj zabudovy va ŭžo isnujučych starych kvartałach. Jak praviła, takija abjekty źjaŭlajucca premijalnymi z-za vysokich vydatkaŭ, jakija kładucca na plečy kamiercyjnych zabudoŭščykaŭ.
I sapraŭdy, 12‑paviarchoŭka ŭ Hornym zavułku, 8, zaŭsiody pazicyjanavałasia jak dom premium-kłasa. Kvatery ŭ joj aktyŭna realizoŭvalisia ŭ dalokim 2019 hodzie. Ale voś siurpryz: niadaŭna na rynak vyvieli niamała hatovych «kansiervaŭ» (niežyłych kvater) roznaj płoščy, piša Onliner.by.
Nahadajem, što ŭščylnić rajon Załataja Horka vyrašyli jašče ŭ 2011 hodzie. U pačatku 2016‑ha kampanija «Atłant-M Bud» prystupiła da znosu starych damoŭ dla ŭźviadzieńnia adnaho novaha. Z tvaru ziamli ścierli stary dvuchpaviarchovy internat chlebazavoda i draŭlany dom z kamiennaj prybudovaj. Da 2019 hoda «śviečka» była poŭnaściu hatova. Vyhladaje jana davoli standartna dla novabudoŭlaŭ taho času: zvyčajnyja vokny, niemudrahielistyja adcieńni fasadaŭ. Fiškaj stali chiba što vokny-iluminatary ŭzdoŭž leśvicy.
Pad domam praduhledžany dvuchuzroŭnievy padziemny parkinh — heta taksama prykmieta premijalnaści. Dziciačaja placoŭka vyhladaje davoli standartna.
Azdableńnie miescaŭ ahulnaha karystańnia pastaralisia zrabić pad premijalnaje zvańnie. Choł na pieršym paviersie azdobleny kieramičnaj plitkaj pad marmur, majecca cikavaja padśvietka stoli i dekaratyŭnyja paneli z padśvietkaj numaroŭ kvater.
Usiaho ŭ domie było zaprajektavana 79 kvater. Historyja pamiataje, što ŭ 2019 hodzie «kvadrat» tut aceńvaŭsia ad $1600 da $1800.
Jakaja kolkaść žylla była pradadziena ŭ momant piku realizacyi, zastajecca zahadkaj. Adnak siońnia tut pradajuć niamała «kansiervaŭ» — kvater biez azdableńnia, što hadami čakajuć svaich haspadaroŭ.
Miarkujučy pa infarmacyi z abjavaŭ, svabodna da nabyćcia davoli vialikaja kolkaść varyjantaŭ, raźmieščanych z 9 pa 12 pavierchi:
- čatyry adnapakajoŭki płoščaj 49,4 kv. m;
- dźvie dvuchpakajoŭki płoščaj ad 78,6 da 84,3 kv. m;
- dźvie trochpakajoŭki płoščaj ad 123,8 da 124,5 kv. m;
- try čatyrochpakajoŭki płoščaj ad 126,0 da 126,4 kv. m.
1‑pakajovaja kvatera tut davoli prastornaja — 49,3 mietra. U toj čas jašče nie było pryniata zapaŭniać novabudoŭli małamietražkami. Płaniroŭka ŭ joj svabodnaja. Košt — $108 460.
2‑pakajovaja kvatera płoščaj 76,6 mietra pradajecca za $174 492. Cikava, što zabudoŭščyk užo praduhledzieŭ u joj płaniroŭku i ŭźvioŭ ścieny. Novamu ŭładalniku daviadziecca z hetym źmirycca albo pierajnačvać žyllo pad siabie.
Samaj darahoj źjaŭlajecca 4‑pakajovaja kvatera płoščaj 126,4 mietra. Jaje možna kupić za $316 000.
Nu što, davajcie paličym. Praz šmat hadoŭ mietr u premijalnym domie padładziŭsia pad rynkavyja ŭmovy i značna vyras.
Žyllo ŭ hatovaj novabudoŭli kaštuje ad $2200 da $2500 za «kvadrat».
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie5
Kamientary