Piaskoŭ panarakaŭ, što Rasija i ZŠA nie vykarystoŭvajuć «bliskučyja pierśpiektyvy» supracoŭnictva, a Jeŭropa čamuści ŭzbrojvajecca
Rasija spadziajecca, što Tramp pa-raniejšamu hatovy sadziejničać dypłamatyčnamu ŭrehulavańniu ŭkrainskaha kryzisu. Pra heta pres-sakratar prezidenta Rasii Dźmitryj Piaskoŭ paviedamiŭ u kamientary telekanału CNN.
«My pavinny palepšyć našy dvuchbakovyja adnosiny… My pavinny adkryć novyja mahčymaści dla handlu i ekanamičnaha supracoŭnictva», — adznačyŭ Dźmitryj Piaskoŭ.
Jon dadaŭ, što ŭ adnosinach dźviuch krain, maŭlaŭ, «bliskučyja pierśpiektyvy», adnak baki, niahledziačy na heta, pakul tolki hublajuć čas i hrošy.
Pierad hetym Dźmitryj Piaskoŭ u intervju prapahandystu Alaksandru Junašavu zajaviŭ, što bačańnie Maskvy supadaje ź mierkavańniem Prezidenta Sierbii Alaksandra Vučyča: u jeŭrapiejskich krainach, maŭlaŭ, nazirajucca mocnyja «pramilitarysckija nastroi». Jon adznačyŭ, što ŭ šerahu krain pa niezrazumiełych pryčynach raptam pavialičylisia vajskovyja biudžety.
Na dumku pucinskaha pres-sakratara, taki padychod pryniasie Jeŭrasajuzu bolš škody, čym karyści. Heta, maŭlaŭ, «viadzie da pieranapružańnia ekanomiki i vykliča potym u siarednieterminovaj pierśpiektyvie bolš ciažkija nastupstvy».
Što da Maskvy, to jana nibyta zaŭsiody razumieła, što takaja niebiaśpieka isnuje, tamu «ŭsie miery dla zabieśpiačeńnia svaich intaresaŭ i biaśpieki prymalisia zahadzia».
Kamientary