Za styrnom lepš słuchać aŭdyjaknihi, čym razmaŭlać pa telefonie. Navat praz hučnuju suviaź

Pra heta piša telehram-kanał «Sybulinka» sa spasyłkaj na niadaŭniaje daśledavańnie japonskich navukoŭcaŭ.

Ekśpierymient pakazaŭ, što nieabchodnaść adkazvać na pytańni ŭsłych istotna źnižaje zdolnaść čałavieka reahavać na vizualnyja stymuły. Vyniki znoŭ staviać pad sumnieŭ biaśpieku lubych telefonnych razmoŭ za styrnom.

U čym sutnaść ekśpierymienta

U daśledavańni brali ŭdzieł 30 čałaviek. Im prapanavali vykonvać prostaje vizualnaje zadańnie ŭ troch roznych umovach: u cišyni, padčas prasłuchoŭvańnia aŭdyja i padčas razmovy.

Zadača była nastupnaj: jak maha chutčej pieravodzić pozirk z centra ekrana na čyrvonuju plamu, jakaja źjaŭlałasia ŭ vypadkovych miescach. Ruchi vačej fiksavalisia z častatoj 60 kadraŭ u siekundu.

Padčas «razmoŭnaj» fazy daśledčyki zadavali ŭdzielnikam pytańni. Adny tyčylisia faktaŭ (naprykład, nazvać stalicy krain), inšyja patrabavali źviarnucca da ŭspaminaŭ (što čałaviek jeŭ na śniadanak ci što nadziavaŭ učora).

Šakavalnyja ličby

Analiz pakazaŭ kałasalnuju roźnicu pamiž słuchańniem i maŭleńniem. Navukoŭcy padzialili ruch vačej na try fazy: pačatak ruchu, pieramiaščeńnie pozirku i jaho stabilizacyja na abjekcie. Padčas razmovy paharšalisia ŭsie pakazčyki.

Kali sam ruch pozirku da celi padčas razmovy zajmaŭ kala 260 milisiekund (suprać 142—161 ms pry prasłuchoŭvańni aŭdyja), to ličby stabilizacyi akazalisia ašałamlalnymi.

Kab sfakusavać pozirk na plamie, udzielnikam padčas aktyŭnaj razmovy patrabavałasia ŭ siarednim bolš za siekundu. Tym, chto prosta słuchaŭ padkast, na heta treba było mienš za pałovu siekundy.

Pry hetym pakazčyki hrupy, jakaja prosta słuchała aŭdyja, amal nie adroźnivalisia ad tych, chto vykonvaŭ zadańnie ŭ poŭnaj cišyni.

Čamu tak adbyvajecca

Aŭtary daśledavańnia tłumačać heta tym, jak mozh raźmiarkoŭvaje resursy. Słuchańnie — heta pasiŭnaja apracoŭka infarmacyi. A voś dyjałoh patrabuje składanaha ałharytmu: pošuk źviestak u pamiaci, płanavańnie adkazu, kaardynacyja maŭlenčaha aparatu. Hetyja pracesy pačynajuć «kankuravać» ź sistemami, jakija adkazvajuć za chutkija ruchi vačej.

U čym hałoŭnaja niebiaśpieka

Choć testy prachodzili ŭ łabaratoryi, vysnovy majuć pramoje značeńnie dla darožnaj biaśpieki, bo 90% infarmacyi kiroŭca atrymlivaje praz zrok.

Asablivuju tryvohu vyklikaje toj fakt, što najhoršyja vyniki «razmoŭnaja» hrupa pakazvała tady, kali mišeń źjaŭlałasia ŭnizie ekrana. Mienavita ŭ nižnim vizualnym poli kiroŭcy zvyčajna ŭźnikajuć dzieci, žyvioły, jamy na darozie i darožnaja raźmietka.

• 3
• 0
• 0
• 0
• 0
• 0
• 0
• 0