Na Kipry znajšli miortvaje cieła, jakoje moža naležać Uładzisłavu Baŭmhiertnieru
Na Kipry, u addalenym prybiarežnym rajonie pamiž pasiołkami Pisury i Aŭdzimu, znajšli cieła, jakoje moža naležać źnikłamu rasijskamu biznesmienu Uładzisłavu Baŭmhiertnieru. Pakul čakajuć aficyjnaha paćviardžeńnia hetaha.
Cieła znajšli na ciažkadastupnym, skalistym učastku ŭźbiarežža, dzie raniej pošukavyja hrupy kancentravali svaje pošuki.
Uładzisłaŭ Baŭmhiertnier, były hienieralny dyrektar rasijskaj kampanii «Urałkalij», źnik 7 studzienia. Apošni raz jaho bačyli ŭ Limasole, kali jon siadaŭ u taksi da Pisury.
Pošukavaja apieracyja była ŭskładnienaja zimovymi burami i ŭklučała vykarystańnie dronaŭ i ŭdzieł supracoŭnikaŭ brytanskich vajskovych baz, raźmieščanych na Kipry. Pakolki cieła znachodzicca ŭ mocna paškodžanym stanie, dla dakładnaj jaho identyfikacyi mohuć spatrebicca DNK-testy abo paraŭnańnie zapisaŭ dantystaŭ.
Pa źviestkach vydańnia «Fontanka», Baŭmhiertniera paśla źniknieńnia pačali šukać u harach i ŭ vyniku znajšli ŭ ciaśninie. Jon nibyta aktyŭna zajmaŭsia skałałažańniem i ŭ hety raz, jak miarkujecca, vyrašyŭ pieraadoleć čarhovy maršrut. U dzień, kali Baŭmhiertnier zadumaŭ heta zrabić, na Kipry było vietrana.
Paśla źniknieńnia pradprymalnika vykazvajecca šmat mierkavańniaŭ, što jano nievypadkovaje. Adnak i blizkija da Baŭmhiertniera ludzi, i miascovaja palicyja ad pačatku schilnyja ličyć, što heta ŭsio ž taki niaščasny vypadak.
Baŭmhiertnier šmat hadoŭ tamu byŭ źviazany adnym z epizodaŭ svajoj bijahrafii ź Biełaruśsiu. Kali ŭ 2013 hodzie jon prylacieŭ u Biełaruś pa zaprašeńni tahačasnaha premjer-ministra Michaiła Miaśnikoviča, jaho aryštavali. Trymali ŭ SIZA KDB.
Jahonamu aryštu papiaredničaŭ biełaruska-rasijski kalijny kanflikt, jaki pačaŭsia paśla taho, jak «Urałkalij» abviaściŭ pra spynieńnie prodažaŭ praz sumiesnaje ź Biełaruśsiu ZAT «Biełaruskaja kalijnaja kampanija». Praz hetaha trejdara ažyćciaŭlali prodažy i «Urałkalij», i dziaržpradpryjemstva «Biełaruśkalij». Pry hetym abodva baki abvinavačvali adzin adnaho ŭ niaŭzhodnienych prodažach u abchod BKK.
Pieršapačatkova Baŭmhiertniera abvinavacili va złoŭžyvańni ŭładaj i słužbovymi paŭnamoctvami, zatym abvinavačvańnie było dapoŭniena kradziažom. Paśla biznesmiena departavali ŭ Rasiju, dzie ŭ dačynieńni da jaho taksama była raspačata kryminalnaja sprava. Paźniej spravu zakryli «ŭ suviazi z adsutnaściu ŭ jaho dziejańniach składu złačynstva».
U 2015‑2017 hadach Baŭmhiertnier pracavaŭ na pasadzie hiendyrektara partovaj kampanii Global Ports. Paśla ŭznačalvaŭ šviejcarskuju kampaniju Alevo.
Na Kipry źnik Uładzisłaŭ Baŭmhiertnier, były hiendyrektar «Urałkalija». Jaho zatrymlivali pa skandalnaj spravie ŭ Minsku
Rasijskaha dypłamata na Kipry znajšli miortvym paśla źniknieńnia Baŭmhiertniera
Rasijski dypłamat, jaki zahinuŭ na Kipry, chutčej za ŭsio, pracavaŭ na HRU. Mahčyma, jon chacieŭ pierabiehčy na Zachad
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie3
Kamientary