Meta zapatentavała ŠI, jaki moža vieści akaŭnt karystalnika paśla śmierci

Jak paviedamlaje Business Insider, adpaviedny dakumient byŭ uchvaleny ŭ kancy śniežnia. U im havorycca, što madel moža vykarystoŭvacca «dla simulacyi karystalnika, kali jon adsutničaje ŭ sacyjalnaj sietcy — naprykład, kali jon biare praciahły pierapynak albo pamior».

Sistema praduhledžvaje stvareńnie ličbavaha kłona na asnovie piersanalnych źviestak karystalnika: historyi aktyŭnaści, kamientaroŭ, łajkaŭ, publikacyj, pierapiski i inšych źviestak płatformy. Taki kłon zmoža stavić łajki, kamientavać pasty, adkazvać na asabistyja paviedamleńni. U patencie taksama zhadvajecca mahčymaść simulacyi hałasavych i videazvankoŭ.

Asnoŭnym aŭtaram zajaŭki paznačany techdyrektar Meta Endru Basvart. Patent byŭ padadzieny ŭ 2023 hodzie. U dakumiencie tłumačycca mahčymaja łohika praduktu: kali karystalnik pierastaje publikavać kantent, heta ŭpłyvaje na dośvied jaho padpisčykaŭ. Praściej kažučy, jany buduć sumavać. U vypadku śmierci «ŭpłyŭ na inšych karystalnikaŭ našmat bolš surjozny i praciahły».

U kampanii zajavili, što nie płanujuć ukaraniać niešta kankretnaje.

«My padajom patenty, kab raskryvać kancepcyi, ale heta nie aznačaje, što kampanija abaviazkova budzie raspracoŭvać abo ŭkaraniać takija rašeńni», — paviedamiŭ pradstaŭnik Meta.

Rynak «technałohij žałoby»

Meta nie pieršaja kampanija, jakaja pracuje ŭ hetym napramku. Raniej Microsoft patentavała čat-bot, zdolny imitavać pamierłaha čałavieka. Na rynku ŭžo jość startapy, jakija stvarajuć tak zvanyja death bots ci grief tech — ličbavyja viersii ludziej dla zachavańnia pamiaci pra ich.

Prafiesar prava Birminhiemskaha ŭniviersiteta Edyna Charbińja, jakaja śpiecyjalizujecca na ličbavych pravach i paśmiarotnaj pryvatnaści, adznačaje, što takija technałohii zakranajuć nie tolki jurydyčnyja, ale i «vielmi važnyja sacyjalnyja, etyčnyja i hłyboka fiłasofskija pytańni».

Sacyjołah z Univiersiteta Virdžynii Džozef Devis ličyć, što padobnyja instrumienty mohuć upłyvać na praces pieražyvańnia straty.

«Adna z zadač žałoby — pryniać realnuju stratu. Niachaj miortvyja zastajucca miortvymi. Ideja viarnuć ich — chacia nasamreč heta nie tak — stvaraje źbiantežanaść», — skazaŭ jon.

Ekśpierty taksama źviartajuć uvahu na mahčymuju biznes-matyvacyju: padobnyja instrumienty aznačajuć bolš uciahnutaści, bolš kantentu i bolš danych dla navučańnia ŠI.

• 0
• 0
• 0
• 2
• 0
• 0
• 1
• 1