Iranskaja armija abstralała amierykanski samalot dalokaha radyjołakacyjnaha vyjaŭleńnia i kiravańnia AWACS (Airborne Warning and Control System). Heta zdaryłasia 27 sakavika padčas iranskaha ŭdaru pa avijabazie imia prynca Sułtana ŭ Saudaŭskaj Aravii. 12 amierykanskich vajskoŭcaŭ atrymali ranieńni, dvoje ź ich u ciažkim stanie. Samalot, jak možna mierkavać pa fota ŭ ŚMI, źniščany.
Heta była kambinavanaja ataka z vykarystańniem rakiet i ŭdarnych bieśpiłotnikaŭ. Akramia AWACS, paškodžańni atrymali minimum dva samaloty-zapraŭščyki Boeing KC-135. Ułady ZŠA pakul nie kamientavali zdareńnie.
Samalot Boeing E-3 Sentry AWACS — lehiendarnaja latajučaja radyjołakacyjnaja stancyja (RŁS) i armiejski kamandny punkt, piša «Novaja hazieta. Jeŭropa». E-3 Sentry byŭ raspracavany ŭ Złučanych Štatach, ale pieradavaŭsia ŭzbrojenym siłam Francyi, Vialikabrytanii i Saudaŭskaj Aravii. Pabudavany sumiesna z kampanijaj Boeing na asnovie hramadzianskaha samalota Boeing 707 i abstalavany radarnaj sistemaj kampanii Northrop Grumman, E-3 upieršyniu padniaŭsia ŭ pavietra ŭ 1975 hodzie.
Radar AWACS — heta, pa sutnaści, vočy i vušy ŭzbrojenych sił; jon zabiaśpiečvaje 360‑hradusnaje pakryćcio i moža vyjaŭlać samaloty na adlehłaści da 400 km, a taksama celi na małoj vyšyni, jakija praz asablivaści łandšaftu i skryŭleńnia ziamli nie bačać naziemnyja RŁS. U adroźnieńnie ad stacyjanarnych radaraŭ, AWACS maje mahčymaść chutka pieramiaścicca ŭ lubuju kropku śvietu, i jaho składaniej źniščyć, čym stacyjanarnyja abjekty. Apieratary na borcie kaardynujuć dziejańni źniščalnikaŭ, navodziać ich na celi, kirujuć dazapraŭkaj u pavietry i zabiaśpiečvajuć biaśpieku pavietranaj prastory. Samalot ekspłuatujecca ŭžo kala paŭstahodździa, i Pientahon siońnia raspracoŭvaje zamienu sastarełamu E-3 Sentry.
AWACS adyhryvaje najvažniejšuju rolu ŭ vajennych apieracyjach, zabiaśpiečvajučy nazirańnie, kamandavańnie i kantrol, a taksama kiravańnie trafikam u pavietranaj prastory.
Košt adnaho całkam ukamplektavanaha borta apošniaha pakaleńnia aceńvajecca ŭ 400—500 miljonaŭ dalaraŭ i vyšej. Kali infarmacyja budzie paćvierdžana aficyjna, heta stanie pieršaj bajavoj strataj samalota typu E-3 u historyi.
Ličycca, što ŭsiaho ŭ ZŠA na dadzieny momant jość u lotnym stanie 16 takich bartoŭ, i 7 abo 8 ź ich udzielničajuć u vajennych dziejańniach u Iranie.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary