Apłatu pasłuh ŽKH pa pavyšanych taryfach buduć rabić uładalniki 2 tys. katedžaŭ u Minsku
Apłatu pasłuh ŽKH pa pavyšanych taryfach u Minsku buduć ažyćciaŭlać uładalniki 2 tysiač 211 katedžaŭ.
Pra heta na pres‑kanfierencyi 16 červienia paviedamiŭ hienieralny dyrektar DVA «Minskaja haradskaja žyllovaja haspadarka» Uładzimir Rejentovič.
Pavodle jaho słoŭ, «śpisy ŭładalnikaŭ takich damoŭ pastajanna udakładniajucca». Usie ŭładalniki kamfartabielnych katedžaŭ prainfarmavany pra novyja umovy apłaty pasłuh ŽKH, dadaŭ jon.
Pavodle rašeńnia ŭrada, z 1 červienia 2010 hoda ŭładalniki siadzibnych žyłych damoŭ pavyšanaj kamfortnaści pavinny apłačvać kamunalnyja pasłuhi nie pa narmatyŭnym sabiekošcie, zaćvierdžanym rašeńniami miascovych vykankamaŭ, a pa «ekanamična abhruntavanych zatratach».
U pastanovie ŭdakładniajecca, što «da siadzibnych žyłych damoŭ pavyšanaj kamfortnaści adnosiacca siadzibnyja žyłyja damy (kvatery ŭ błakavanych žyłych damach) z ahulnaj płoščaj žyłych pamiaškańniaŭ bolš za 200 kv. mietraŭ, zabiaśpiečanyja haspadarča‑pitnym i haračym vodazabieśpiačeńniem, kanalizacyjaj, aciapleńniem i vientylacyjaj, elektraaśviatleńniem ad centralizavanych, miascovych ci indyvidualnych sistem». Taksama dakumientam praduhledžvajecca ŭskłaści na ŭładalnikaŭ adnaho ci niekalkich žyłych pamiaškańniaŭ 100‑pracentnuju apłatu za techničnaje absłuhoŭvańnie i ciepłazabieśpiačeńnie pry ŭmovie, što ŭ hetych žyłych pamiaškańniach adsutničajuć zarehistravanyja pa miescy žycharstva najmalnik, ułaśnik, člen arhanizacyi zabudoŭščykaŭ i (abo) členy ich siemjaŭ.
Što da ŭładalnikaŭ pustych kvater, to, pavodle słoŭ Rejentoviča, ich u Minsku prykładna 30 tysiač. Jany i raniej apłačvali pasłuhi techničnaha absłuhoŭvańnia pa raźlikovym sabiekošcie — 750 rubloŭ za kvadratny mietr. Z 1 červienia «ekanamična abhruntavanaja cana» stała navat nižejšaj — 622 rubli za kv. mietr, adznačyŭ hiendyrektar. «Adnak za aciapleńnie jany buduć płacić značna bolš», — padkreśliŭ jon.
Rejentovič nahadaŭ, što siońnia ŭ Minsku nasielnictva apłačvaje 42% ad raschodaŭ na žyllova‑kamunalnyja pasłuhi.
Kamientary