Niaklajeŭ, Ramančuk, Kastusioŭ i Rymašeŭski nabrali bolš za 10 tys. podpisaŭ

Niekatoryja pretendenty na pasadu prezidenta Biełarusi za čatyry dni zboru podpisaŭ pieraadoleli dziesiacitysiačny barjer.

U pryvatnaści, jak paviedamiła pres-sakratar lidara hramadzianskaj kampanii «Havary praŭdu!» Uładzimira Niaklajeva Julija Rymašeŭskaja, za čatyry dni ŭ padtrymku vyłučeńnia Niaklajeva kandydatam u prezidenty sabrana 15.714 podpisaŭ.

U padtrymku namieśnika staršyni Abjadnanaj hramadziankaj partyi Jarasłava Ramančuka pa stanie na viečar 2 kastryčnika padpisalisia prykładna 12 tysiač čałaviek, ź ich 8 tysiač — u Minsku, paviedamiła pres-sakratar palityka Hana Krasulina. «Pakul my padličvajem podpisy, sabranyja ŭ asnoŭnym na pikietach. My vyrašyli nie tracić na heta kožny dzień i vieści padlik raz u try dni, tak što nastupnaja infarmacyja ab kolkaści sabranych podpisaŭ źjavicca viečaram 5 kastryčnika», — skazała pres-sakratar.

Pavodle słoŭ Paŭła Sieviarynca, kiraŭnika vybarčaj kampanii sustaršyni arhkamiteta pa stvareńni partyi «Biełaruskaja chryścijanskaja demakratyja» Vitala Rymašeŭskaha, na viečar 3 kastryčnika było sabrana 12.170 podpisaŭ. Asnoŭnaja kolkaść podpisaŭ, kala 10 tysiač, była sabrana ŭ rehijonach. «U Babrujsku, na radzimie Rymašeŭskaha, za jaho padpisalisia 2,5 tysiačy čałaviek, u Breście — tysiača, pa 600–800 podpisaŭ- u Homieli, Viciebsku, Kalinkavičach. Tolki 3 kastryčnika my sabrali kala 4 tysiač podpisaŭ, vyjšli na płanavy štodzionny zbor i ŭpeŭnieny, što źbiarom kala 110 tysiač podpisaŭ», — skazaŭ Sieviaryniec.

Staršynia Partyi BNF Alaksiej Janukievič paviedamiŭ, što za čatyry dni ŭ padtrymku partyjnaha kandydata Ryhora Kastusiova sabrana prykładna 13.500 podpisaŭ. «Heta asnoŭnaja ličba, pakolki my pakul nie zdoleli źviazacca ź inicyjatyŭnymi hrupami ŭ niekatorych drobnych haradach», — zaznačyŭ palityk.

Lidar hramadzianskaj kampanii «Jeŭrapiejskaja Biełaruś» Andrej Sańnikaŭ paviedamiŭ, što dakładnaja kolkaść padadzienych u jaho padtrymku podpisaŭ dahetul nieviadomaja.

«Ich tak šmat, što my prosta nie paśpiavajem ich ličyć», — patłumačyŭ Sańnikaŭ.

Kiraŭnik Libieralna-demakratyčnaj partyi Biełarusi Siarhiej Hajdukievič taksama pakul nie moža nazvać kolkaść sabranych u jaho padtrymku podpisaŭ. «Našy aktyvisty pačali zbor podpisaŭ tolki ŭčora, tamu kazać pra niejkija vyniki pakul rana. Ale ŭ mianie niama nijakich sumnieńniaŭ, što 100 tysiač my nabiarem», — zajaviŭ Hajdukievič.

.

• 0
• 0
• 0
• 0
• 0
• 0
• 0
• 0