Łukašenka: «Ja kateharyčna vykazaŭsia za nieprymalnaść insynuacyj»

Košt AAT «Biełtranshaz» budzie vyznačany pa vynikach pierahavoraŭ, a nie pavodle acenki banku. Heta niepryjemnaja navina dla «Hazpromu».

Takuju pazycyju biełaruski bok abaznačyŭ na praviedzienych u Maskvie pierahavorach na vyšejšym uzroŭni, paviedamiŭ siońnia A.Łukašenka na naradzie ab pytańniach zabieśpiačeńnia krainy enerhanośbitami. Heta paviedamlaje BiełTA. Dziaržaŭnaje ahienctva pryvodzić takija cytaty z vykazvańniaŭ kiraŭnika dziaržavy: «My za toje, kab stvaryć sumiesnaje pradpryjemstva z Rasiejskaj Fiederacyjaj na bazie «Biełtranshazu» j «Hazpromu». Ale rabić my heta budziem na rynkavych umovach - tak, jak Rasiejskaja Fiederacyja havoryć pra pastaŭki hazu j nafty. Heta značyć, my nia možam addać abo pieradać «Hazpromu» «Biełtranshaz» biaspłatna, ci to 10 pracentaŭ, 50 pracentaŭ abo lubuju inšaja kolkaść akcyj. Heta pavinna być na rynkavych umovach», - padkreśliŭ A.Łukašenka.

«Siońnia pravodzicca acenka aktyvaŭ «Biełtranshazu» niderlandzkim bankam. Heta acenka stanie peŭnym punktam adliku ŭ pierahavorach pa canie «Biełtranshazu», - adznačyŭ kiraŭnik Biełarusi. «Ja pryvioŭ Uładzimiru Pucinu kankretny prykład, kali niemcy kuplali českuju systemu, jakaja ŭ 2,5-3 razy mienšaja, čym biełaruskaja. I jany zapłacili ŭ dalaravym ekvivalencie $5,5 młrd. za jaje. Tamu kali aceńvać siońnia «Biełtranshaz», i heta nie jak českaja kampanija - adhalinavańnie zboku, a mahistralnyja hazapravody, to heta budzie značna daražej, prykładna ŭ 2 razy, bolš jak pad $10 młrd., a to i $12 młrd. Niekatoryja specyjalisty i da $17 młrd. aceńvajuć siońnia «Biełtranshaz». My budziem nastojvać na adekvatnaj acency. Jakaja heta budzie acenka - my vyrašym u vyniku pierahavoraŭ, a nie ŭ vyniku acenki banku. Tamu što acenka banka - heta adna z prapanovaŭ, a dalej my budziem usio ličyć. Z hetym i pahadzilisia. U zaležnaści ad hetaha, liču, budzie zaležać u perspektyvie cana na pryrodny haz, što pastaŭlajecca ŭ Biełaruś», - reziumavaŭ kiraŭnik biełaruskaj dziaržavy.

Voś što jašče paviedamlaje BiełTA:

Pazycyja Biełarusi adnosna pytańnia cany na pryrodny haz była ŭspryniataja rasiejskim kiraŭnictvam z razumieńniem. Pra heta paviedamiŭ siońnia prezydent Biełarusi na naradzie pa pytańniach zabieśpiačeńnia krainy enerhanośbitami, padsumoŭvajučy biełaruska-rasiejskija pieramovy na najvyšejšym uzroŭni ŭ Maskvie. «Ja kateharyčna vykazaŭsia za nieprymalnaść usialakich insynuacyj nakont cany ŭ 200 dalaraŭ za tysiaču kubametraŭ hazu. Na heta Ŭładzimier Pucin skazaŭ: nikoli takoj cany aficyjna nie nazyvali i nie vyznačali», – pracytavaŭ Alaksandar Łukašenka rasiejskaha kalehu. Na dumku biełaruskaha boku, dla Biełarusi cana nia moža być vyšejšaj ad Ukrainy, Armenii. «A Armenii siońnia Rasieja pastaŭlaje haz pa 110 dalaraŭ. Tamu ja na pieramovach skazaŭ, što dla nas hetaja cana nieprymalnaja, i my budziem nastojvać na datrymańni toj cany i taho pryncypu, jakija isnavali ŭ handli pryrodnym hazam da siońniašniaha dnia. U advarotnym vypadku pytańnie staić nia ŭ tym, jakuju Rasieja vystavić canu na haz. Pytańnie ŭ tym, što my budziem nia ŭ stanie zapłacić hetyja hrošy», – padkreśliŭ prezydent Biełarusi. Pavodle słovaŭ Alaksandra Łukašenki, na pieramovach z Uładzimieram Pucinym «heta taksama było ŭspryniata z razumieńniem». «Adrazu ž było skazana: my nie źbirajemsia tarpedavać pracesy ŭ ekanomicy Biełarusi. My vielmi zacikaŭlenyja, kab Biełaruś raźvivałasia pastupalna, dynamična. I z hetaha budziem sychodzić. Heta było zajaŭlena niekalki razoŭ», – dadaŭ A.Łukašenka.

Voś jak kamentuje siońniašnija zajavy Alaksandra Łukašenki naš palityčny ahladalnik Alaksandar Kłaskoŭski ŭ svaim błohu.

"Jak i prahnazavałasia, Alaksandar Łukašenka vykazaŭsia pa haračych śladach pieramovaŭ z Pucinym.

Pasprabujem zrabić papiaredniaje reziume (bo na hety momant ahiencyi praciahvajuć davać frahmentarnyja natatki z narady ŭ kiraŭnika dziaržavy):

1. Za "Biełtranshaz" ciapier załamana jašče bolšaja cana — ad 10 da 17 miljardaŭ dalaraŭ (raniej kazali pra 5-6). Heta apryjory niepryjmalna dla Maskvy.

2. Kali niechta naiŭny dumaŭ, što ŭ pytańni pra košt biełaruskaje "truby" vyznačalnym stanie verdykt halanskaha banku, dyk voś nie! Vy spytajecie, našto tady było ładzić ekspertyzu? Čyńnik času, daražeńkija! Ciahnuć ryzinu vyhadna biełaruskamu boku.

3. U pytańni nafty baki taksama ŭciahnucca ŭ viazki praces padrychtoŭki novaha pahadnieńnia.

4. Haz pa $200 — heta "insynuacyi".

5. Adzinaja valuta i kanstytucyjny akt, jak vynikaje z vykazvańniaŭ Łukašenki, uvohule adkładzieny ŭ doŭhuju skryniu — sama mała da skančeńnia prezydenckich vybaraŭ u Rasiei. A mo' i na śviatoje nikoli.

Uvohule ž jašče bolej akcentavana byŭ ahučany raniejšy nabor tezaŭ, klučavaja ź jakich voś heta: Maskva musić prytrymlivacca pryncypu roŭnych umoŭ haspadarańnia! U Kramli, musić, tysiaču razoŭ praklali farmuloŭku, jakuju niekali niadoŭha dumajučy ŭpisali ŭ sajuznuju damovu. Tady zdavałasia, što ŭsio adno nieŭzabavie tut budzie rasiejskaja hubiernia. Zaraz ža humavaja farmuloŭka dazvalaje biełaruskamu boku tarpedavać sproby Maskvy pieravieści ekanamičnyja dačynieńni na sapraŭdy rynkavyja rejki.

Nu a frazy pra toje, što "u Rasiei jość žadańnie zachavać dynamiku stasunkaŭ ź Biełaruśsiu", "iość palityčnaja vola nie zhubić toje, što napracavana", — u pierakładzie z dyplamatyčnaje movy aznačajuć, što na Pucina robić peŭnaje ŭražańnie pahroza stracić apošniaha chaŭruśnika. Karaciej, pracuje pijaraŭski čyńnik "tankaŭ NATO pad Smalenskam".

Naturalna, kožny bok ładzić svoj pijar. Zaŭtrašniaja maskoŭskaja presa peŭna ž padaść vyniki pieramovaŭ nie ŭ takim amal što tryŭmfalnym dla Miensku klučy.

Ale fakt toje, što kapitulacyi na ŭmovach Kramla nie adbyłosia. Jak i pradrakała mieniej emacyjnaja častka analitykaŭ, Miensk i Maskva buduć doŭžyć torh, u jakim kožny z bakoŭ maje surjoznyja kozyry".

• 0
• 0
• 0
• 0
• 0
• 0
• 0
• 0