Amierykancy sapsavali iranskija centryfuhi z dapamohaj virusa

Virus Stuxnet moh sapsavać mnostva iranskich centryfuh dla ŭzbahačeńnia ŭranu.

Troje navukoŭcaŭ — Devid Ołbrajt, Poł Brenan i Kryścina Uołrand — pryjšli da vysnovy, što «padstupny čarviak» Stuxnet moh prynieści bolš značnuju škodu, čym pryznaje Tehieran. Nie vyklučana, što na rachunku virusa mnostva sapsavanych centryfuh dla ŭzbahačeńnia ŭranu na jadziernym abjekcie ŭ Natanzie.

U tym, što Stuxnet stvaryŭ u Natanzie prablemy, u kancy listapada pryznaŭsia navat sam prezident Irana Machmud Achmadziniežad,

Ale kali zdahadka navukoŭcaŭ z ISIS pravilnaja, to hetaja škoda vielmi vialikaja. Amierykanskija navukoŭcy miarkujuć, što Stuxnet sapsavaŭ kala 10% usich centryfuh. Jany nie vyklučajuć, što pryčyny ich paškodžańnia mahli być inšymi, naprykład, kanstruktyŭnyja niedachopy, adnak hetaja zdahadka zdajecca im małavierahodnaj.

Akramia taho, pakazvaje vydańnie, navukoŭcy ŭskosna paćviardžajuć, što Stuxnet — heta pradukt zachodnich śpiecsłužbaŭ, bo jaho raspracoŭščyki skarystalisia infarmacyjaj, jakoj nie mieła navat MAHATE.

Darečy, kali Stuxnet raspracavany amierykancami, jany mohuć nastupić na ŭłasnyja hrabli. U dakładzie, pradstaŭlenym Kanhresu, havorycca, što hety virus moža padarvać abaronazdolnaść samich Złučanych Štataŭ.

Madyfikavany Stuxnet moža padarvać vadapravodnyja stancyi, enierhietyčnyja mahutnaści, transpartnuju i inšuju infrastrukturu, nieabchodnuju dla funkcyjanavańnia sučasnaj supolnaści, piša hazieta The Christian Science Monitor.

Nahadajem, pavodle śćvierdžańnia kampanii Symantec, jakaja śpiecyjalizujecca na kamputarnaj biaśpiecy, hety virus byŭ raspracavany dla paškodžańnia elektronnych sistem na jadziernych abjektach Irana.

Pravierka, praviedzienaja ekśpiertami kampanii, pakazała, što kamputarny virus pavinien stvarać pieraškody ŭ pracy peŭnaha vidu abstalavańnia: častotnaha pieraŭtvaralnika, jaki pracuje z častatoj 807 — 1.210 Hc. Stuxnet zdolny źmianiać častatu pracy pryłady. Takija pieraŭtvaralniki vykarystoŭvajucca ŭ abmiežavanaj kolkaści aparataŭ, u pieršuju čarhu ŭ centryfuhach, jakija iranskija inžyniery ŭžyvajuć dla ŭzbahačeńnia ŭranu.

Ale pry lohkaj madernizacyi Stuxnet moža psavać ceły šerah abjektaŭ, a nie tolki častotnyja pieraŭtvaralniki, nastrojenyja na peŭnuju častatu. U daśledavańni, padrychtavanym analityčnaj słužbaj Kanhresu, havorycca, što virus moža pryvieści da spynieńnia pracy žyćciova važnaj infrastruktury na doŭhi čas, a heta, u svaju čarhu, pryviadzie da niazdolnaści ŭrada achoŭvać intaresy nacyjanalnaj biaśpieki.

• 0
• 0
• 0
• 0
• 0
• 0
• 0
• 0