Skandał vakoł biełaruskaha pasolstva ŭ Maskvie nie ścichaje. Pasoł Biełarusi byŭ vyklikany ŭ MZS Rasiei
Jamu ŭručyli notu ab niedapuščalnaści vykarystańnia pamiaškańnia dyppradstaŭnictva dla hulniavoha biznesu.
Pasoł Biełarusi ŭ Maskvie Vasil Daŭhaloŭ byŭ vyklikany ŭ MZS Rasiei, dzie jamu była ŭručanaja nota nakont niedapuščalnaści vykarystańnia pamiaškańnia dypłamatyčnaha pradstaŭnictva dla hulniavoha biznesu.
«Pavodle infarmacyi, jakuju maje ministerstva, na terytoryi pasolstva peŭny čas niezakonna funkcyjanavała hulniavaja ŭstanova, rasiejski bok ličyć nieabchodnym źviarnuć uvahu biełaruskaha boku na niedapuščalnaść takoha kštałtu dziejnaści, jakaja supiarečyć pałažeńniam Vienskaj kanviencyi», — cytujuć dakumient «Iźviestija».
Analahičnaja nota była ŭručanaja pasolstvu KNDR.
Siońnia pradstaŭnik MZS Biełarusi Andrej Savinych čarhovy raz abvierh abvinavačańni na adras biełaruskaha pasolstva: «Nijakaha kazino ŭ biełaruskim pasolstvie ŭ Maskvie niama i być nie moža».
Havoračy ab rasiejskaj nocie pratestu, Andrej Savinych adznačyŭ, što nota MZS Rasii źmiaščaje zakłapočanaść, źviazanuju z historyjaj, jakuju raździmajuć asobnyja rasiejskija ŚMI. «My całkam adkrytyja dla ŭzajemadziejańnia z našymi kalehami i hatovyja na lubyja miery, jakija buduć spryjać likvidacyi hetych złosnych čutak», — skazaŭ jon.
14 krasavika ŭ haziecie «Iźviestija» byŭ apublikavany pieršy artykuł, pryśviečany kazino, jakoje, pavodle źviestak haziety, dziejničała ŭ biełaruskim pasolstvie ŭ Maskvie.
Paśla heta pasoł Daŭhaloŭ zaprasiŭ žurnalistaŭ u pasolstva, kab prademanstravać, što kazino tam niama. Adnak pavodle siońniašniaj publikacyi ŭ «Iźviestijach», žurnalistam było pakazana nie toje pamiaškańnie, dzie raźmieščanaja hulniavaja zona. «Adnak žurnalist nie staŭ abvinavačvać pasła ŭ niaščyraści ŭ prysutnaści pradstaŭnikoŭ ŚMI», — havorycca ŭ materyjale.
Na siońniašnim bryfinhu A.Savinych zajaviŭ: «Žurnalistaŭ praviali ŭ pamiaškańnie, na jakoje sama hazieta ŭkazała jak hulniavuju zonu. Akramia taho, pradstaŭnikam ŚMI była dadzienaja mahčymaść zajści i ŭ inšyja pamiaškańni na ich vybar. Takim čynam, pretenzii žurnalista na dalikatnaść, pra jakuju jon piša ŭ artykule, na spravie abaročvajucca chitraściu i niežadańniem pryznavać vidavočnaje».
Ciapier čytajuć
Byłyja žonka i dziaŭčyna Pratasieviča abjadnalisia i pryjšli da jaho novaj niaviesty, kab adpomścić. I pahražajuć sudom4
Kamientary