Jeŭrasajuz suprać Minska — zamach na rubiel, udar na kapiejku

Hłušyć «apošniuju dyktaturu» ekanamičnymi sankcyjami Jeŭropa pakul nie stała. I, vierahodna, nie stanie naohuł, ličać ekśpierty. Na svaim pasiedžańni 23 maja ministry zamiežnych spravaŭ dziaržavaŭ ES abmiežavalisia tym, što pašyryli čorny śpis nieŭjaznych biełaruskich čynoŭnikaŭ.

U vyniku pierśpiektyvy pačytać Cheminhueja ŭ paryžskaj kaviarni pazbavilisia jašče 13 pierson - u asnoŭnym prakurory i sudździ, jakija majuć dačynieńnie da novych žorstkich prysudaŭ udzielnikam Płoščy. Usiaho Jeŭropa «zabaniła» takim čynam užo pad dźvie sotni biełaruskich čynoŭnikaŭ.

Vizavyja sankcyi - jak miortvamu pryparki?

Zrešty, šmat chto ŭ apazicyi i hramadzianskaj supolnaści ličyć, što vizavyja zabarony - jak miortvamu pryparki. Na hornych łyžach kali nie ŭ Alpach, dyk u Krasnaj Palanie možna ŭdostal nakatacca.

Da kropkavych ekanamičnych sankcyj suprać režymu, jaki dabivaje apazicyju i niezaležnuju presu, adkrytym tekstam zaklikali niadaŭna vykanaŭčuju ŭładu ES tradycyjna bolš rašučyja jeŭraparłamientaryi.

Byŭ źliŭ, što ŭžo hatovy inšy čorny śpis, z čatyroch pradpryjemstvaŭ - «Biełnaftachima», «Trajpła», «Biełtechekspartu» i «Biełaruśkalija». Pieralik dla ludziej daśviedčanych - vielmi jaskravy. Heta było b biez varyjantaŭ jak siarpom pa...

Ale Jeŭrasajuz, zamachnuŭšysia na rubiel, udaryŭ na kapiejku. Słabaki? Abo mudryja taktyki, dalnabačnyja stratehi?

Dzianis Mieljancoŭ, analityk Biełaruskaha instytuta stratehičnych daśledavańniaŭ, u intervju dla Naviny.by adznačyŭ: "Na maju dumku, Jeŭrapiejski sajuz ciapier nie hatovy iści na poŭnamaštabnuju ekanamičnuju vajnu ź Biełaruśsiu».

Z adnaho boku, adznačaje ekśpiert, ES nie moža ŭvieści ekanamičnyja sankcyi ŭ strohim sensie hetaha słova (zabarona na impart i ekspart), «bo isnujuć ekanamičnyja intaresy asobnych krain-čalcoŭ i adsutničaje farmalnaja nahoda - Biełaruś nie parušaje mižnarodnaha prava».

A ź inšaha boku, dadaje Dzianis Mieljancoŭ, u jeŭrapiejskich palitykaŭ i ekśpiertaŭ jość surjoznaja aściaroha, što «navat abmiežavanyja ekanamičnyja represalii mohuć pryvieści da poŭnaj samaizalacyi Biełarusi, stracie Jeŭrasajuzam usich ryčahoŭ upłyvu na situacyju ŭ krainie».

Dva kancy kija

A što, ciapier jość niejkija ryčahi ŭździejańnia na ŭładu? - spytaje jaršysty čytač. Dušać usio, što varušycca, jak asfaltavym katkom - i jak ničoha nijakaha.

Nu jak skazać... Pahroza ekanamičnych sankcyjaŭ vidavočna prymusiła kiroŭnuju viarchušku zaniervavacca. Z adnaho boku, razdałasia hroznaja rytoryka ŭ adkaz (apazicyju zrobim nievyjaznoj, ambasadaraŭ vašych pavykidajem), ale z druhoha - pačalisia manieŭry. Eks-kandydatu ŭ prezidenty Uładzimiru Niaklajevu i jašče šerahu fihurantaŭ «spravy 19 śniežnia» dali terminy ŭmoŭnyja abo z adterminoŭkaj. A prysud jašče adnoj hrupie na čale z eks-kandydatami Mikałajem Statkievičam i Dźmitryjem Usam raptam adkłali, aficyjna - praz chvarobu sudździ Hračovaj. Ekśpiert varšaŭskaha Centra mižnarodnych adnosin Vojciech Barodzič-Smaliński ŭ intervju Naviny.by adznačyŭ: viadoma, nie vyklučanaje jak fizičnaje niezdaroŭje sudździ, tak i jaje maralnyja pakuty. Ale mahčymyja i palityčnyja hulni.

Dla takich hulniaŭ u Minska jość peŭnaje pole, i jany «prynosiać niejki efiekt», adznačaje polski ekśpiert. Sa svajho boku, Jeŭrasajuz, pa-pieršaje, nieadnastajny, da taho ž ad sankcyj nie choča stračvać dyvidendy biznes; pa-druhoje, Brusel usio ž sprabuje dać biełaruskim uładam šaniec adumacca.

Barodzič-Smaliński asabliva padkreślivaje, što «šmat zahadak pakinuŭ niadaŭni vizit Pucina ŭ Minsk». U Bruseli aścierahajucca, što moža adbycca ekanamičnaja inkarparacyja. Hruba kažučy, rasijski kapitał pavykuplaje Biełaruś, kali dźviery na Zachad buduć dla jaje nahłucha začynienyja.

Toje, što Brusel nie staŭ hnać koniej z ekanamičnymi sankcyjami, - usio ž chutčej mudraść, čym słabaść, ličyć biełaruski palityčny analityk Juryj Drakachrust.

«Choć abodva varyjanty - i ŭviadzieńnie sankcyj, i nieŭviadzieńnie - nie pazbaŭlenyja ryzyki, - dadaŭ jon u intervju dla Naviny.by. - Sankcyi mohuć nie padziejničać, mohuć nastroić nasielnictva suprać ES, jašče hłybiej uciahnuć Jeŭropu ŭ kanflikt, adabrać u jaje svabodu manieŭru, pazbavić Minsk mahčymaści adstupić biez straty tvaru. Nu i naadvarot - admovu ad uviadzieńnia sankcyj Minsk moža ŭspryniać jak słabaść Jeŭropy».

Na kaho narakać?

Takim čynam, što ž dalej? Jak paviaduć siabie baki? Zrešty, tut varta brać u raźlik i treciuju siłu - Rasiju, kaža Jury Drakachrust. Jon nie vyklučaje, što ŭ Brusela i Maskvy źjaviŭsia «niejki sumiesny płan nastaŭleńnia na rozum aficyjnaha Minska».

Sapraŭdy, dniami kiraŭnik rasijskaj dypłamatyi Siarhiej Łaŭroŭ, pa sutnaści, asudziŭ palityčnyja pracesy ŭ Biełarusi, choć i abmoviŭsia, što sankcyi suprać jaje Maskva ličyć niemetazhodnymi. «Mahčyma, dasiahnutaja damoŭlenaść ab tym, jak sadziejničać vyzvaleńniu palitviaźniaŭ sumiesnym dypłamatyčnym presinham z Zachadu i z Uschodu», - miarkuje Jury Drakachrust.

Nichto z analitykaŭ nie čakaje cudaŭ. «Minsk pasprabuje hulać, jak zaŭsiody - padavać sihnały, ale pa sutnaści ničoha nie mianiać", - sprahnazavaŭ u intervju dla Naviny.by minski palitołah Aleś Łahviniec. Biełaruskija ŭłady nie mohuć prosta ŭziać i vypuścić palitviaźniaŭ, dla ich heta było b demanstracyjaj niedazvalalnaj słabaści, dadaje, sa svajho boku, Vojciech Barodzič-Smaliński.

Adnak varšaŭski palitołah prahnazuje źmiakčeńnie losu palityčnych viaźniaŭ bližej da parłamienckich vybaraŭ 2012 hoda, kali ŭ Minsku, imavierna, uzmocnicca nieabchodnaść u hulni z Zachadam, demanstracyi niejkaj umoŭnaj adlihi va ŭnutranaj palitycy.

Zrešty, inšyja ahladalniki ličać, što ekanomika pryciśnie kiroŭnuju viarchušku značna chutčej.

Jany robiać vysnovu, što de-fakta ekanamičnyja sankcyi suprać Biełarusi ŭviali jaje ž ułady, nałamali drovaŭ i pierad vybarami (drukavańnie hrošaj-fancikaŭ), i ŭ dzień 19 śniežnia (šakavalny razhon i aryšty), i potym (raskručvańnie machavika represij, samaizalacyja, pramarudžvańnie z devalvacyjaj i h.d.).

Pytańnie ŭ tym, nakolki ŭśviedamlaje heta narod, padkreślivaje Aleś Łahviniec. Urešcie, reanimacyja adnosin ź Jeŭropaj - nie samameta i nie panaceja. Prablema budučyni Biełarusi ŭpirajecca ŭ pabudavanuju tut niahnutkuju i žorstkuju palityčnuju sistemu, anachranizm jakoj siońnia - jak na dałoni.

• 0
• 0
• 0
• 0
• 0
• 0
• 0
• 0